¹ Sẽk ju aphue ghã sasedotxi Ananias ale juk la Cesareia ke un de lidehãs dji pov-la i ke un avoka ki ie k'aple Tertulo. Ie phuezãte ie ko pu guvelmã Felix pu fe akuzasiõ kõt Pol. ² Aphue ki ie aple Pol, Tertulo kumase akuzasiõ-la, li dji: _boku biẽ, sẽie guvelmã, u pote boku tã dji thãkilite pu no lãdã u kumãde i ghemesi u, ke boku ïtelijãs lãdã adjiministhasiõ boku bagaj ki bõ u fe pu djibiẽ djisa pov-la. ³ No ka ghemesi boku pu tut sa ki no te husuve lãdã tut lokasiõ-iela i lãdã tut kote-iela. ⁵ No thuve ki ,vuemã sa om-la a un mixã mun. Li ka leve thẽ ãt judeu-iela dji tã-la ãtxe i li sa osi dji patxizã dji "Nazareno-iela" ⁶ li osi seie koze mal dji Kaz dji Adohasiõ-la, ẽbe no phui'l. No te ke kõdãnẽ'l sosulõ ke no lalua, ⁷ mẽ xef Lisias vinï i li txihe'l dji no a fos. ⁸ Djila phop Lisias voie ki sa mun ki ka fe akuzasiõ-iela vinï juk esi i pu ie fe akuzasiõ djivã u. Si u dumãde dji sa om-la, li mem ke kõfihmẽ tut sa akuzasiõ-iela ki no ka fe kõt li. ⁹ Ẽbe judeu-iela dako, ie dji ki tut a te lavehite. ¹⁰ Guvelmã-la fe sin pu ki Pol koze. Ẽbe li dji: _ Mo save ki gãiẽ boku ãnẽ ki u sa mun ki ka kõdãnẽ (juiz) dji pov judeu-iela i a pu sa ki mo ke plezi pu defie mo ko la u phuezãs. ¹¹ Kumã u mem puve bai sa laphuev-la, ka fe selmã duz ju ki mo ale pu Jehuzalem pu adohe Bõdje ¹² Judeu-iela pa ue mo ka djiskite ke pies mun lãdã Kaz dji Adohasiõ-la, nẽ leve thẽ lãdã sinagog-iela, nẽ lãdã lahi-iela dji vil-la. ¹³ Ie pa puve bai pies laphuev dji akuzasiõ ki ato ie ka fe kõt mo. ¹⁴ Un bagaj mo ka dji pu u: __ Mo ka suiv Ximẽ ki judeu-iela ka dji ki a mãto; mẽ a djisa mãiẽ-la ki mo ka siavi Bõdje dji no ãtepase-iela. Mo ka khe lãdã tut sa ki ekhi lãdã lalua dji Moises i lãdã Liv dji phofet-iela. ¹⁵ Mo i sa mun-iela ki ka fe akuzasiõ kõt mo, no gãiẽ sa mem espehãs-la lasu Bõdje: no tut ke hesusite, kumã mun ki bõ-iela i ki mixã-iela. ¹⁶ Pu sa mo ka fe tut pu tuju mo kõsiãs hete phop djivã Bõdje i mun-iela. ¹⁷ Pol kõtxinẽ: _ Aphue dji mo te hete deho dji Jehuzalem un de ãnẽ, mo hutonẽ ãfẽ dji pote un kek lajã pu mo phop pov i pu ofui *sakhifis. ¹⁸ Kã mo te ka fe sa, aphue dji mo te finï dji sãtxifike, un de judeu kõthe mo lãdã Kaz dji Adohasiõ-la. Pa te gãiẽ boku mun ke mo i nẽ thẽ. ¹⁹ Mẽ un de judeu dji Asia te laba. A te ie te djivet phuezãte djivã u i fe akuzasiõ-iela, si gãiẽ un kek bagaj kõt mo. ²⁰ O Ẽbe ki sa om-iela ki esi dji, a ki khim ie thuve lasu mo kã mo ale djivã K Kõsei-la. ²¹ Kã mo te djibut djivã ie, mo selmã te dji sa pahol-iela : _ "Jodla zot ka kõdãnẽ, pase ki mo ka khe ki mun muhi ke hesusite ãko. ²² Ẽbe Felix ki te biẽ save a hespek dji Ximẽ-la, lese phoblem-la pu aphue, li dji pu ie: _ Kã xef Lisias ke hive, mo ke deside zot phoblem. ²³ Li voie ki ofisial mete un soda pu veie Pol, mẽ li libiate i peãmite ki so kamahad-iela vizite'l i ki pu ie bai pu li sa ki li te bẽzuẽ. ²⁴ Un de ju aphue Felix vinï ke so fam Drusila, ki a te judeu. Voie aple Pol i ie de kute'l ka pale a hespek dji sa espua lasu Jezi Khi. ²⁵ Mẽ, Kã Pol kumase pale lasu un lavi ki jis, pu dominẽ u phop ko, i lasu ju dji kõdẽnasiõ ki ka vinï, Felix hete li dji: __ Ato puve ale. Kã mo ke puve, mo ke aple u ãko. ²⁶ Felix te ka ãtan osi ki Pol te bai pu li in kek lajã. Pu sa li te ka aple'l boku fue i te ka bladje ke li. ²⁷ De ãnẽ aphue Porcio Festo hete lãdã plas dji Felix kumã guvelmã. Felix te le fe judeu-iela kõtã; pu sa, kã li sotxi, li lese Pol la phuiziõ.