¹ Ẽbe Pol gade pu mun dji Kõsei-la i li dji: __ Mo fue-iela, mo viv juk jodla ke mo kõsiãs phop djivã dji Bõdje. ² Mẽ Ananias, ghã sasedotxi-la, voie ki om-iela ki te phox dji Pol, bai un tap la so bux. ³ Djila Pol pu Ananias: __ hipokhit, Bõdje ke bai u pinitãs pu sa! U asi laba pu kõdãnẽ mo sosulõ lalua-la, a pa sa? Ẽbe kumã u voie fut mo? sa kõt lalua-la? ⁴ Om-iela ki te phox dji Pol ie dumãde: U ka solãte ghã sasedotxi-la, siavito dji Bõdje? ⁵ Pol hepon: _ Mo fue-iela mo pa te save ki li sa ghã sasedotxi-la. Pase Pahol Sẽ-la ka dji: "Pa koze mal dji pies otohite dji so pov". ⁶ Kã Pol piasuve ki un de dji Kõsei-la a te dji patxizã dji saduceu-iela i uot-iela dji patxizã dji fahiseu-iela, li dji biẽ fo:__ Mo fue-iela, mo sa fahiseu i pitxit dji fahiseu-iela. Mo esi ie ka kõdãnẽ mo, pase ki mo ka khe ki mun muhi-iela ke hesusite. ⁷ Kõsa kã li koze sa, fahiseu-iela i saduceu-iela kumase djiskite, i Kõsei-la pataje. ⁸ Saduceu-iela pa te ka khe ki mun muhi ke hesusite, ki gãiẽ zãj o lesphui-iela; mẽ fahiseu-iela te ka khe lasu sa bagaj-iela ⁹ I kõsa hele la hete pi gho. Ẽbe un de met dji lalua ki te ka patxizã dji fahiseu-iela leve ie kumase djiskite. Ie dji: __ No pa ue pies mal lasu sa om-la. Puve mem ki un zãj o un lesphui te koze ke li. ¹⁰ Bhuiga-la hive lãdã un tel puẽ, ki xef-la hete pe veie ie te fe Pol hete ã pedas. Pu sa li voie soda-iela desan pu txihe Pol dji lamitã dji ie i pote'l ãko pu ghã kaz-la (Fortaleza). ¹¹ Lãdã sa nuit-la Sẽie Jezi pahet pu Pol i li dji: __ Gãiẽ kohaj, Pol! U pale a mo hespek esi Jehuzalem i u ka ale pale la Roma. ¹² Uot ju-la un de judeu hasãble i ie phomet ki ie pa ke mãje nẽ bue ãiẽ ẽkãt ie pa txue Pol. ¹³ Om-iela ki te Kõbinẽ fe sa a te plis ki kahãt! ¹⁴ Ie ale koze ke xef dji sasedotxi-iela i ke lidehãs dji pov-la ie dji: _ No fe sa phomes-la : "ki Bõdje madjixõnẽ no si no mãje o bue nẽpot bagaj ẽkãt no pa txue Pol!" ¹⁵ Ato zot i Kõsei-la, voie dumãde dji xef-la pu pote Pol esi. Dji ki zot le Ezãminẽ pi biẽ so phoblem. Ẽbe, ãvã ki li hive no te ke phuepahe pu txue'l. ¹⁶ Me pitxit dji so dji Pol hete save dji ie itẽsiõ; li ãthe lãdã ghã kaz-la (Fortaleza) li hakõte tut pu Pol. ¹⁷ Ẽbe Pol aple un dji ofisial-iela li dji: _ pote sa jon mun-la pu xef-la. Li gãiẽ un bagaj pu hakõte pu li. ¹⁸ Ofisial-la pote jon mun-la pu xef-la li dji: _ sa om ki phui-la ki ie k'aple Pol voie aple mo i dumãde pu mo pote sa jon mun-la pase li gãiẽ un bagaj pu hakõte pu u. ¹⁹ Xef-la txẽbe jon mun-la la so lãmẽ, li ale ke'l pu un khã i li dumãde: _ Akisa ki u gãiẽ pu hakõte pu mo? ²⁰ Li hepon: un de judeu Kõbinẽ pu dumãde dji u pu pote Pol djimẽ pu Kõsei-la, ke sa mãto-la pu ezaminẽ pi biẽ so phoblem. ²¹ Mẽ pa khe lasu sa, pase plis dji kahãt dji ie ke hete sehe ie ko, ka ãtan Pol pu ie txue'l. Ie tut fe sa phomes-la: _ Ki Bõdje madjixõnẽ no si no mãje o bue nẽpot bagaj ãvã no txue Pol". ²² Ẽbe xef-la hepon: Pa hakõte pu pies mun ki u dji sa pu mo. I li voie jon mun-la ale. ²³ Ẽbe xef-la aple de ofisial li dji: _ phuepahe desã soda, plis ki soasãt_djis soda ke xuval, I desã soda ke lãs pu ale juk vil dji Cesareia. Zot phuepahe pu sotxi dji esi neve dji nuit. ²⁴ Phuepahe osi xuval pu Pol mõte i pote'l ke tut photesiõ pu guvelmã Felix. ²⁵ Aphue xef-la ekhi un let ki te ka dji kõsa: ²⁶ "Boku biẽ Guvelmã Felix , Saudasiõ " ²⁷ Un de judeu txẽbe sa om-la i ie te phox txue'l. Kã mo save ki li te sa mun dji Roma, mo ale ke mo soda-iela i mo pa lese ki ie txue'l. ²⁸ Mo te le save pukisa ie te ka kõdãnẽ'l a pu sa mo deside ale ke'l djivã Kõsei dji judeu-iela. ²⁹ Ẽbe mo dekhuvui ki li pa te fe ãiẽ pu mehite phuiziõ o lamo. ³⁰ Kã ie viatxi mo dji ki te gãiẽ un itẽsiõ pu txue'l, mo deside voie'l pu u. I mo dji pu sa judeu-iela fe akuzasiõ-iela la u phuezãs. "ladãte". "Claudio Lisias":. ³¹ Ẽbe soda-iela kõphui zod-iela . Ie phã Pol i ie ale ke'l dehãtxi nuit-la juk la vil dji Antipatride. ³² Lãdã uot ju-la soda-iela hutonẽ pu ghã kaz-la (Fortaleza), ie lese ki soda ke xuval-iela kõtxinẽ voiaje ke Pol. ³³ Ie ale ke'l pu Cesareia, ie bai let-la pu guvelmã-la ie hãde Pol pu li. ³⁴ Guvelmã-la li let-la i dumãde dji Pol dji kote li te sa. Kã li save ki Pol a te dji hejiõ dji Cilicia, ³⁵ li dji: Kã sa ki la fe akuzasiõ-iela hive, mo ke kute akisa u gãiẽ pu koze. Aphue li voie ki Pol hete phui lãdã Kaz dji guvelmã-la.