¹ __ fue-iela i papa-iela, zot kute akisa mo ke dji pu defie mo ko djivã zot, ² kã ie tãdẽ'l ka koze ã *Hebraico, ie hete pi this. Ẽbe Pol dji: ³ _ Mo sa judeu, mo fet la Tarso, lãdã hejiõ dji Cilicia, mẽ mo leve esi la Jehuzalem kumã alun dji Gamaliel. Kumã alun dji li mo ãphan ke boku fos *Lalua dji no ãtepase-iela. Mo te ka adohe Bõdje lãdã tut sa ki mo te ka fe, kumã zot tut esi ka fe jodla. ⁴ Mo fe violãs kõt sa mun-iela ki te ka suiv sa Ximẽ-la i mo fe ki un de ale kõdãnẽ pu lamo. Mo phui om-iela i fam-iela i mo jite ie la phuiziõ. ⁵ Ghã sasedotxi-la i tut Kõsei-la puve bai laphuev ki mo ka pale lavehite, mo husuve let dji ie, ki ekhi pu fue judeu-iela ki ka hete la Damasco. I mo ale juk laba pu phui sa mun-iela ki ka suiv sa Ximẽ-la i mo pote ie phui ke xen pu Jehuzalem pu no bai ie pinitãs. ⁶ I Pol kõtxinẽ: _ Mo te ka voiaje, deha phox dji Damasco, te phox midji. Djinku, un fo klehite ki vinï dji siel-la klehite-la kõhõnẽ mo. ⁷ I mo tõbe lasu late-la i mo tãde un vue ki te ka dji pu mo: _ "Saulo, Saulo, pukisa u ka fe violãs kõt mo?" ⁸ Ẽbe mo dumãde: "akimun u sa"? _ vue hepon: "Mo sa Jezi dji Nazahe, sa ki u ka fe pase pu pinitãs"? ⁹ Sa om-iela ki te ka voiaje ke mo ie ue sa klehite-la, mẽ ie pa tãde vue-la dji mun ki te ka pale ke mo. ¹⁰ Mo dumãde : "Sẽie, akisa no djivet fe"? __ I Sẽie-la hepon: "leve i ãthe la vil dji Damasco. Laba un kek mun ke dji pu u tut sa ki Bõdje le u fe". ¹¹ Sa klehite ki te klehe-la te lese mo pa ka ue. Pu sa mo kõpãiẽ-iela txẽbe la mo lãmẽ i ie pote mo ju Damasco. ¹² Laba te gãiẽ un om ki ie te k'aple Ananias. Li te ka suiv helijiõ, i li te ka obei no Lalua, i tut judeu-iela ki te ka hete la Damasco te ka hespete'l. ¹³ Sa om-la vinï sase mo, i hive phox dji mo i li dji: " Fue Pol, gade ãko!" __ Lãdã mem lokaziõ mo kumase ue ãko i mo gade pu li. ¹⁴ Ẽbe li dji: "Saulo, Bõdje dji no ãtepase-iela, xuezi u pu konet so volõte, pu ue so Bõ Siavito, i Siavito-la pale ke u ke so phop bux. ¹⁵ Pase u ke sa so tẽmuẽ pu dji pu tut mun sa ki u ue i tãde. ¹⁶ I ato pa ãtan tuju. Leve, dumãde pu Sẽie ide u i ale batxize, i u pexe-iela ke padõnẽ". ¹⁷ Pol kõtxinẽ dji: __ Ẽbe mo tonẽ pu Jehuzalem. Kã mo te ka phuie lãdã Kaz dji Adohasiõ-la, mo te gãiẽ un viziõ. ¹⁸ Mo ue Sẽie-la, i li dji pu mo: "sotxi pi vit dji Jehuzalem pase ki mun-iela dji esi pa ke asekte sa ki u ke dji a mo hespek"! ¹⁹ Mo hepon: " Sẽie ie save biẽ ki mo te k'ale lãdã sinagog-iela, i mo te ka phui sa ki te ka khe lasu u, i mo te ka fut ie." ²⁰ Kã ie te ka txue Estevão, ki te ka pale a hespek dji u, Sẽie , mo te laba, mo te dako ke sa khim-la. I mo juk ẽtxupe dji *kap djisa mun-iela ki txue'l. ²¹ Djila Sẽie-la dji: "ale, pase mo ke voie u pu biẽ luẽ; mo ke voie u pu nõ-Judeu-iela". ²² Ban mun-iela hete ka kute Pol juk Kã li pale sa pahol-iela, mẽ Djila ie kumase hele ke tut fos: __ Zot txue sa om-la! li pa mehite viv! ²³ Ie te ka hele, i sukuie ie lej-iela lãdã le-la i te ka jite lapusie pu ãle. ²⁴ Ẽbe xef-la voie ki so soda-iela ale ke Pol pu ãdjidã Ghã Kaz-la (Fortaleza). Xef-la voie osi ki ie fut Pol pu li hakõte pukisa ban mun-iela te ka hele kõt li. ²⁵ Ẽbe ie te ka mahe'l pu ie fut li, Pol dumãde dji ofisial dji Roma ki te phox dji li: _ khe ki zot gãiẽ dhue dji fut un mun ki ka hete la Roma, espesialmã un ki pa ale kõdãnẽ pu pies khim. ²⁶ Kã ofisial-la tãde sa, i ale koze ke xef-la, li dji: akisa ki u ke fe? sa om-la a un mun dji Roma! ²⁷ Ẽbe xef-la ale koze ke Pol i li dumãde: __ Dji pu mo un bagaj: u sa mun dji Roma mem?__ Pol hepon: Mo sa! ²⁸ Djila xef-la dji: Mo osi sa, i sa kute mo boku lajã. Pol hepon: Mo sa mun dji Roma pase mo fet laba. ²⁹ Vitmã sa om-iela ki te ke fut li tonẽ pu deie. I phop xef-la hete pe kã li save ki Pol a te mun dji Roma i li te voie mahe'l. ³⁰ Xef-la te le save ke asihãs pukisa judeu-iela te kõt Pol. Ẽbe lãdã uot ju-la li, voie ki ie txihe xen-iela ki te phui'l i voie ki xef dji sasedotxi-iela i Kõsei-la hasãble. Aphue li voie ki soda-iela pote Pol i mete'l djivã ie.