¹ Aphue ki no sepahe dji ie, no bake i no navidje djihekmã pu zile dji Cos. Uot ju-la no hive la degha dji Rodes, i dji laba no kõtxinẽ juk la vil dji Patara, ² kote no kõthe un bato ki te k'ale pu Fenícia . Ẽbe no bake lãdã'l i no voiaje. ³ Kã no ue zile dji Chipre, no pase bo agox dji li, i no navidje la djihesiõ dji Siria. No hive la vil dji Tiro, kote no debake, pase ie te bẽzuẽ dexaje bato-la. ⁴ Lãdã sa vil-la no kõthe un de khẽtxiẽ i no hete ke ie un simen. I pu Sẽtesphui ie te ka dji pu Pol pa ale pu Jehuzalem. ⁵ Mẽ, kã hive ju pu ale, no kõtxinẽ no voiaj. Tut sa fue-iela, ke ie fam-iela i ie pitxit-iela, ie akõpãiẽ no juk deho dji vil-la; i tut ãjunü laba obo lahivie-la i no phuie. ⁶ Aphue no sepahe dji ie, no bake lãdã bato-la, i ie hutonẽ pu ie kaz. ⁷ No kõtxinẽ voiaje, no navidje dji Tiro pu Ptolemaida. Laba no kõthe i kõphuimẽte fue-iela i no pase un ju ke ie. ⁸ Lãdã uot ju-la no ale i no hive la vil dji Cesareia. Laba no ale pu kaz dji * evangelista Filip i no hete ke li. Filip a te un dji set om-iela ki ie te xuezi la Jehuzalem. ⁹ Li te gãiẽ kat pitxit fam phofet. ¹⁰ Un de ju aphue ki no hive, un phofet ki ie k'aple Agabo Vinï dji hejiõ dji Judeia. ¹¹ Li hive phox dji no, li txẽbe sẽtxie dji Pol, li mahe so phop pie-iela i so phop lãmẽ-iela i li dji: __ Sẽtesphui dji sa: Kõsa la Jehuzalem judeu-iela ke mahe sa om ki a met djisa sẽtxie-la ie ke hãde'l la lãmẽ dji nõ-judeu-iela. ¹² Kã no tãde sa, no i fue-iela dji Cesareia no dji pu Pol pa ale pu Jehuzalem. ¹³ Mẽ li hepon: _ Pukisa zot ka khie kõsa? i zot ka fe hete this! mo phuepahe a pa selmã pu ie mahe mo, mẽ juk pu muhi la Jehuzalem palakos dji Sẽie Jezi. ¹⁴ I no pa hesi fe ki li pa ale. Ẽbe no lese'l i no dji: _ fe kumã volõte dji Sẽie! ¹⁵ Aphue dji pase un de ju laba, no hasãble no bagaj-iela i no ale pu Jehuzalem. ¹⁶ Un de djisip dji Cesareia akõpãiẽ no i ie pote no juk kaz kote no te ke hete. Met dji kaz-la a te Menasom ki fet la Chipre i un dji phõmiẽ djisip-iela. ¹⁷ Kã no hive Jehuzalem fue-iela husuve no ke boku kõtãtmã. ¹⁸ Lãdã uot-la Pol ale ke no juk la kaz dji Tiago pu kõthe ke li. I tut presbitero-iela dji legliz-la te laba. ¹⁹ Ẽbe Pol kõphuimẽte ie i li hakõte tut sa ki Bõdje te fe pu li ãt nõ-judeu-iela. ²⁰ Aphue ki ie kute'l, ie tut adohe i lue Bõdje i ie dji: _ Gade biẽ, fue! Gãiẽ miliõ dji judeu ki tonẽ khẽtxiẽ i ie tut fiam lasu *Lalua dji Moises. ²¹ Ie tãde ki u te ka mõthe uot judeu-iela ki ka hete lãdã uot pei-iela ãbãdonẽ lalua-la, u te ka dji pu ie pa xathe(circuncisão) ie pitxit-iela, nẽ hespete labitxuid dji judeu-iela. ²² Akisa no ke fe? Asihe ki ie deha save ki u hive. ²³ Fe sa ki no ke dji pu u: Esi la ãt no kat om ki gãiẽ dji kõphui un phomes du Bõdje. ²⁴ Ẽbe ale ãsam ke sa om-iela i sãtxifike ãsam ke ie, peie pu ie kõt-iela pu kupe ie xive-iela pu tet hete net. Kõsa tut ke save ki a pa lavehite sa ki ie ka pale dji u. Mẽ ie ke hete save ki, vuemã, ka viv sosulõ ke Lalua dji Moises. ²⁵ Mẽ, pu nõ-judeu-iela ki tonẽ khẽtxiẽ, no deha voie un let pu ie, no dji kõsa: _ Pa mãje laxe dji animal ki ie ka ofui kumã Sakhifis pu bõdje-iela, nẽ djisã, nẽ laxe dji animal dji animal ki ie ãgue pu li muhi. I osi pa phatxike mixã labitxuid seksual. ²⁶ Ẽbe Pol pale ke koze ke kat-iela i, lãdã uot ju-la li ãthe ãsam ke ie lãdã sãtxifikasiõ-la. Aphue li ãthe lãdã kaz-la pu viatxi ki tã te ke finï ju-iela dji sãtxifikasiõ-la, sa a lokasiõ ki xakẽ un dji kat om-iela te djivet ofui ie sakhifis. ²⁷ Kã set ju-iela dji * sãtxifikasiõ-la te phox finï, un de judeu dji Asia ue Pol lãdã kaz-la. Ẽbe ie mete ban mun-iela kõt Pol, i ie txẽbe'l ²⁸ i ie kumase hele: om-iela dji Izhael, ide no! Sa a om-la ki ka ale pu tã-la ãtxe li ka koze pu tut mun-iela i li ka koze mãto kõt pov dji Izhael, kõt Lalua dji Moises i kõt sa kaz-la. I ato li ka pote nõ-judeu-iela pu ãdjidã *Kaz dji Adohasiõ-la, ka demãtxi kõsa sa kote Sẽ-la. ²⁹ Ie dji sa pase ki ie te ue Trofimo, ki a te dji Efeso, lãdã vil-la ke Pol. Ie te ka majinẽ ki Pol te Pote'l pu ãdjidã *Kaz dji Adohasiõ-la. ³⁰ Kõfuziõ-la kate pu tut vil-la, i pov-la vinï ka kuhi dji tut bo-iela. Ie txẽbe Pol, i hale'l pu deho dji Kaz-la, i ie fõmẽ lapot-iela. ³¹ Kã ban mun-iela te k'ale pu txue Pol, xef dji patxizã dji soda-iela dji Roma husuve nuvel dji ki tut vil dji Jehuzalem te lãdã thẽ. ³² Ẽbe li hasãble pi vit un de ofisial i soda-iela i ie kuhi pu lamitã dji pov-la. Kã ban mun-iela ue xef-la i soda-iela, ie hete vit dji fut Pol. ³³ Xef-la hive phox dji Pol, li phui'l i voie mahe'l ke de xen. Aphue li dumãde: _ Akimun sa om-la? Akisa li fe? ³⁴ Mẽ lãdã ban mun-iela un de te ka hele un bagaj, uot-iela te ka hele uot bagaj. Kofuziõ te tho gho, ki xef-la pa te puve dekhuvui akisa te fet. Ẽbe li voie soda-iela ale ke Pol pu ãdjidã Ghã Kaz-la (Fortaleza). ³⁵ Kã ie hive phox dji lexel-la, soda-iela xaie Pol, palakos dji violãs dji ban mun-iela. ³⁶ Ki te ka vinï deie ka hele: txue'l! txue'l!. ³⁷ Kã ie te ka pote'l pu ãdjidã Ghã Kaz-la (Fortaleza), Pol dji pu xef-la: "Mo puve dji un bagaj pu u: Xef-la dumãde'l u ka pale *Greg? ³⁸ A pa u kisa sa egipcio-la ki un tã deie kumase un hevolusiõ i u pote kat mil *mun ki ka txue ( terrorista) pu kote ki pa gãiẽ ãiẽ (deserto)." ³⁹ Pol hepon: mo sa judeu, mo fet la Tarso, vil boku ïpohtã dji hejiõ dji Cilicia. Mo ka dumãde suple, lese mo pale ke pov-la. ⁴⁰ Ẽbe xef-la lese'l. Pol hete djibut lãdã lexel-la li fe sin ke so lãmẽ pu pov-la, dumãde pu ie hete this. Kã ie tut hete this, Pol kumase koze ã *Hebraico li dji: