¹ Kã finï sa kofuziõ-la, Pol voie aple fue-iela i li koze ke ie i bai fos i kohaj pu ie. Ẽbe li ãbhase ie i li ale pu Macedonia. ² Li jãbe sa hejiõ-iela, ka bai boku kohaj i fos ke so mẽsaj pu khẽtxiẽ-iela. Djila li hive la Acaia, ³ kote li hete thoa mua. Kã li te phuepahe pu ale pu Siria, li save ki judeu-iela te gãiẽ mal itẽsiõ kõt li. Ẽbe li deside hutonẽ pu Macedonia. ⁴ Ale ke'l sa mun-iela: Sopatro, pitxit dji Pirro, dji vil dji Bereia; Aristarco i Secundo dji vil dji Tessalonica; Gaio dji Derbe; Timoteo; i osi Tiquico i Trofimo, ki a te dji Asia. ⁵ Sa om-iela ale djivã ie ãtan no la Troade. ⁶ Aphue dji *Lafet dji Djipẽ sa Fehmẽto, no ale dji vil dji Filipos. Sẽk ju aphue no kõthe ke ie la Troade i no hete laba un simen. ⁷ Samdji nãnuit no hasãble ke fue-iela pu pataje djipẽ-la. Pol pale lãdã sa heuniõ-la i li kõtxinẽ pale juk munuï, pase li te voiaje bõmãtẽ. ⁸ Te gãiẽ boku lalãp ka klehe lãdã lasal kote no te hasãble, kote te ka hete lãdã thoazem etaj dji kaz-la. ⁹ Un jon mun ki te k'aple Eutico te asi lãdã un jãnel. I, kumã Pol te kõtxinẽ pale pale dehãtxi boku tã, jon mun-la kumase sigale. Djinku, li dhõmi i tõbe dji jãnel-la. Kã ie leve'l, li te muhi. ¹⁰ Ẽbe Pol desan, li bese, i ãbhase jon mun-la i li dji: _ Zot pa hete pe, pase li vivã. ¹¹ Aphue Pol mõte ãko pataje djipẽ-la i ie mãje. Li koze tuju boku tã, juk bõmãtẽ, i aphue li ale. ¹² Djila ie ale ke jon mun-la, vivã, pu so kaz, i sa lese ie boku kõtã. ¹³ No ale djivã i nõ bake lãdã un bato ki pote no juk Assôs, kote no ãtan Pol. Li voie no fe sa , pase ki li te le ale pa late juk laba. ¹⁴ Kã li kõthe ke no la Assôs, no husuve'l lãdã bato-la i nõ kõtxinẽ navidje juk vil dji Mitilene. ¹⁵ Ẽbe no ale dji laba i, lãdã uot ju-la, no pase phox dji zile dji Quios. uot ju-la no te deha la zile dji Samos i un ju aphue no hive la Mileto. ¹⁶ Pol te deside pase luẽ dji vil dji Efeso pu pa tade boku la Asia. Li te boku phuese, pase li te le hive Jehuzalem, si posib, ãvã ju dji *Lapẽtkot. ¹⁷ La Mileto Pol voie aple presbitero-iela dji legliz dji Efeso pu ie kõthe ke'l. ¹⁸ Kã ie hive Pol dji: __ Zot save kumã mo viv tut sa tã ki mo te ãsam ke zot, djipi phõmiẽ ju ki mo hive la Asia. ¹⁹ Mo fe mo thavai kumã *siavito dji Sẽie, ke tut mo hespek, ka khie, i ke boku dji djifikute, palakos dji judeu-iela ki te hasãble kõt ko. ²⁰ Zot save osi ki mo fe tut pu ide zot, ka ãnüsie Bõ Nuvel i mõthe lamitã pov-la i dji kaz ã kaz. ²¹ Mo dji ke asihãs pu judeu-iela i nõ-Judeu-iela ki ie djivet hepãtxi dji ie pexe-iela, i tonẽ pu Bõdje i khe lasu no Sẽie Jezi. ²² Ato mo k'ale pu Jehuzalem, ka obei Sẽtesphui, sã save akisa ke hive ke mo laba. ²³ Mo save selmã ki lãdã tut vil-iela Sẽtesphui te viatxi mo ki phuiziõ i sufãs ka ãtan mo. ²⁴ Mẽ mo pa ka bai vale pu mo phop lavi. Ïpohtã a ki mo kõplete mo misiõ, i finï thavai ki Sẽie Jezi bai pu mo fe. I misiõ-la a sa: ãnüsie Bõ Nuvel dji *kõtãtmã dji Bõdje. ²⁵ Mo te ãt zot, ka ãnüsie *Lasosiete dji Bõdje, i ato mo save ki zot pa ke ue mo ãko. ²⁶ Pu sa, ki tut asihãs mo ka afihmẽ jodla ki, si un kek dji zot pedji, a pa mo fot. ²⁷ Pase mo pa lese dji ãnüsie pu zot tut sa ki Bõdje te le ki zot save. ²⁸ Ẽtxupe dji zot ko mem i dji tut patxizã-la ki Sẽtesphui lese pu zot ẽtxupe, kom pasteh-iela dji legliz dji Bõdje, ki li axte ke djisã dji so phop Pitxit Jezi. ²⁹ Pase mo save ki aphue ki mo ale, ke pahet boku xẽ ki mixã lamitã dji zot, ie pa ke gãiẽ lapen dji patxizã-la. ³⁰ I ke hive lokasiõ ki un de dji zot ke hakõte mãto, ka sase pote fue-iela pu zot bo. ³¹ Zot hete ka veie i xõje ki dehãtxi thoa mua, nuit i jonẽ i ka khie, mo pa hete dji mõthe un dji zot. ³² I ato mo ka hãde zot pu Bõdje i pu pahol dji so kõtãtmã. Pase li puve ide i edjifike zot i puve bai un hixez ãsam ke tut ki Li sepahe pu Li. ³³ Mo pa jẽ te le *prata, nẽ lo, nẽ lẽj dji pies mun. ³⁴ Zot save ki mo thavai ke mo phop lãmẽ-iela i mo hesi tut ki mo i mo kõpãiẽ-iela dji thavai te bẽzuẽ. ³⁵ Lãdã tut mo mõthe zot ki a ka thavai kõsa ki no puve ide mun ki pov-iela. Xõje dji pahol-iela dji Sẽie Jezi : "ghã kõtãtmã pu mun ki ka bai, pase pu sa ki ka husuve-la. " ³⁶ Kã Pol finï dji Koze, li ãjunü ke fue-iela i li phuie. ³⁷ Ẽbe ie tut khie boku, ie ãbhase i ie bo Pol. ³⁸ Ie te this, pase ki li te dji pu ie ki ie jẽ pa te ke ue'l ãko. Ẽbe ie akõpãiẽ'l juk lãdã bato-la.