¹ Ẽkãt Apolo te la Corinto, Pol voiaje pu hejiõ dji Asia i li hive la Efeso. Laba li kõthe un de khẽtxiẽ, ² i li dumãde ie: Kã zot khe, zot husuve Sẽtesphui? Ie hepon: _ Nõ, no pa te save si te gãiẽ Sẽtesphui. ³ Pol dumãde: ki kalite batem zot husuve? Ie hepon: _ batem dji Jã Batxist. ⁴ Ẽbe Pol dji: Jã te ka batxize sa mun ki te ka hepãtxi dji ie pexe-iela. I osi li te ka pale pu pov dji Izhael ki ie te djivet khe lasu sa ki te ke vinï aphue dji li, ki a Jezi. ⁵ Aphue ki ie tãde sa, om-iela ale batxize lasu nõ dji Sẽie Jezi. ⁶ Djila Pol poze so lãmẽ lasu ie, i Sẽtesphui desan lasu ie. Ẽbe ie kumase koze ã lang ẽthãj i ãnüsie osi mẽsaj dji Bõdje. ⁷ Sa om-iela a te ie duz. ⁸ Dehãtxi thoa mua Pol ale lãdã sinagog-la i pale ke kohaj pu pov-la. Li te ka koze ke ie i li te ka seie fe ie khe a hespek dji Lasosiete dji Bõdje . ⁹ Mẽ un de pa te khe i, djivã tut mun, tuju ie te ka koze mal dji Ximẽ dji Sẽie Jezi. Ẽbe Pol ãbãdonẽ sinagog-la, i khẽtxiẽ-iela ale ke li, i li te ka pale tut ju-iela lãdã lekol dji un om ki ie te k'aple Tirano. ¹⁰ Li fe sa dehãtxi de ãnẽ, juk kã tut mun-iela dji Asia, kumã judeu i nõ-judeu, tãde mẽsaj dji Sẽie. ¹¹ Pol te ka fe boku mihak ke povua dji Bõdje te bai pu li, ¹² ki mun-iela te ka phã so ghiõ o lẽj ki li te ka ize ie te ka pote pu mun malad-iela tuxe ie. I kã, ie te ka tuxe pedas ghiõ o lẽj-la, ie te ka djiehi; i dji uot mun-iela te ka sotxi lesphui mal. ¹³ Un de judeu ki te ka maxe dji un kote pu uot, ki te ka txihe lesphui mal, ie te le ize nõ dji Sẽie Jezi pu txihe lesphui mal-iela, ie te ka dji: __ Pu povua dji nõ dji Jezi, sa mem ki Pol ka ãnüsie, no ka voie ki zot sotxi! ¹⁴ Om-iela ki te ka fe sa, a te set pitxit-iela dji un judeu ki ie k'aple Ceva, ki a te ghã sasedotxi. ¹⁵ Mẽ un ju un lesphui mal dji pu ie: _ mo konet Jezi i mo konet akimun ki a Pol. Mẽ akimun ki a zot? ¹⁶ Ẽbe om ki te ka lesphui mal-la bhuiga ke ie, li fut ke boku violãs, ki ie mahõ dji kaz-la blese i ke ie lẽj-iela fãde. ¹⁷ I tut mu ki te ka hete la Efeso, judeu-iela i nõ-Judeu-iela, save djisa. Ie hete boku pe, i ie hespete nõ dji Sẽie Jezi pi boku. ¹⁸ Ẽbe boku djisa ki khe-iela vinï i kõfese ie pexe-iela ki ie fe. ¹⁹ I boku djisa ki te ka fe maji nue ie hasãble ie lib-iela i pote ie pu bule djivã tut mun. Kã ie kalkile phui djisa liv-iela ki ie bule-iela, hive sẽkãt mil ãghẽnẽ dji prata. ²⁰ Kõsa, djisa mãiẽ-la, mẽsaj-la dji Sẽie te ka ãnüsie, i li te ka kate plis boku i ke ghã povua. ²¹ Aphue djisa, Pol deside pase pu Macedonia i Acaia i ale juk Jehuzalem. Li te ka dji: __ Aphue ki mo vizite Jehuzalem, mo bẽzuẽ ale la Roma. ²² Ẽbe Pol voie pu Macedonia de dji so mun ki ka ide'l, Timoteo ke Erasto, mẽ li hete tuju un tã la Asia. ²³ A lãdã sa lokasiõ-la ki hive la vil dji Efeso un ghã thẽ palakos dji Ximẽ dji Sẽie. ²⁴ Un mun ki te ka vãde i fabhuike bagaj dji lo, ki ie te k'aple Demetrio te ka fe txi model dji kaz dji bõdje Diana, i so thavai te ka bai boku lajã pu sa mun-iela ki te ka thavai ke li. ²⁵ Ẽbe li aple sa mun-iela i uot-iela dji mem thavai i li dji: _ Mo kamahad-iela, zot save ki no hixez ka vinï djisa no thavai-la. ²⁶ Zot mem puve ue i tãde akisa sa om Pol-la ka fe. Li ka afihmẽ ki sa bõdje-iela ki om-iela ka fe ke lãmẽ ie pa sa Bõdje dji lavehite. I li ka hesi fe boku mun khe, kumã dji esi i kõsa osi dji phox tut Asia. ²⁷ Kõsa pov-la puve pa kõsidehe no thavai. I a pa selmã sa. I veie osi kaz dji ghã bõdje Diana pa hete vu pu ãiẽ i veie osi ie lese dji adohel i piad so ipohtãs lãdã tut Asia i lãdã tã-la ãtxe. ²⁸ Kã ban mun-iela tãde sa ie hete ãhaj i ie kumase hele: ghã a Diana dji Efeso! ²⁹ I kõfusiõ-la kate pu tut vil-la. Ban mun-iela txẽbe Gaio i Aristarco, de mun dji Macedonia ki te ka voiaje ke Pol, i ban mun-iela hale ie juk lãdã un *Teatro ( (un ghã kaz ki ka husuve tut kalite muhmã). ³⁰ Pol te le pale pu pov-la, mẽ fue-iela pa lese. ³¹ Un de füsiõne dji vil-la, ki a te kamahad dji Pol, voie un nuvel pu li, pu li pa ale pu teatro-la (un ghã kaz ki ka husuve tut kalite muhmã). ³² Lãdã sa lokasiõ-la ban mun-iela ki te lãdã teatro-la te lãdã un thẽ kõpletmã: Un te ka koze un bagaj, i uot-iela te ka hele uot bagaj, i boku dji ie pa te save pukisa ie te laba. ³³ Un de mun hete ka majinẽ ki a te fot dji Alexandre, i judeu-iela oblije'l ale hete laba djivã. Djila Alexandre fe sin ke so lãmẽ i li seie koze pu defie so ko djivã pov-la . ³⁴ Mẽ, kã ie piasuve ki li te sa judeu, ie hele tut ãsam, mem bagaj dehãtxi 2 le dji tã: Ghã a Diana dji efesio-iela! ³⁵ Finalmã sekhete dji phuefe dji vil-la hesi kalmẽ pov-la. Li dji kõsa: __Mun-iela dji Efeso! zot tut save ki no vil ki ka sehe kaz dji ghã bõdje Diana i hox ki sẽ ki tõbe dji siel-la. ³⁶ Pies mun pa puve dji ki sa a mãto. Kõsa zot hete this zot pa fe ãiẽ sã majinẽ biẽ. ³⁷ Zot pote esi la sa om-iela, mẽ ie pa volo kaz-la, nẽ ie pa demãtxi no Bõdje Diana. ³⁸ Si Demetrio i so mun-iela ki ka idel gãiẽ un kek akusasiõ kõt kek mun, ie puve phuezãte ie akuzasiõ-iela lãdã thibunal-la, pase pu sa gãiẽ ju jis dji heuniõ, i osi gãiẽ guvelmã-iela. ³⁹ Si zot le kek bagaj tuju, sa ie ke thete lãdã heuniõ dji pov-la kõfom no lalua. ⁴⁰ Veie ie dji ki a no fot ki fe sa kõfusiõ, palakos djisa ki hive jodla.. Pa gãiẽ hezõ pu tut sa kofuziõ-la, i no pa gãiẽ kumã pu esplike tut sa. ⁴¹ Aphue ki li djisa pahol-iela, li finï heuniõ.