¹ Aphue djisa, Pol sotxi dji Atenas i li ale pu Corinto. ² Li kõthe laba un judeu ki ie k'aple Aquila, ki a te dji vil dji Ponto. Pa te ka fe boku tã ki li te hive dji Itália ke so fam Priscila. Ie te sotxi dji laba pase ki, Claudio te bai zod pu tut judeu-iela sotxi dji Roma. Pol ale vizite ie ³ i li hete laba pu thavai ke ie, pase ki phofisiõ dji Pol a te mem la ke ie pa, ki a te fe bahak. ⁴ I tut samdji-iela li te ka koze lãdã sinagog-la li te ka fe judeu-iela i nõ-judeu-iela khe. ⁵ Aphue ki Silas i Timoteo hive dji Macedonia, Pol kumase bai tut so tã pu ãnüsie mẽsaj-la. Li te ka afihmẽ pu judeu-iela ki Jezi a 🔯Messias. ⁶ Mẽ un de dji ie hete kõt Pol i ie solãte'l, i li sukuie lapusie dji so lẽj-iela i li dji: zot sa hespõsab pu zot phop djisthuisiõ! mo inosã. Dji ato pu djivã mo ke ãnüsie mẽsaj-la pu nõ-judeu-iela. ⁷ Ẽbe li sotxi dji laba i li ale hete la kaz dji un om ki ie k'aple Ticio Justo, un nõ-judeu ki te ka adohe Bõdje. So kaz te ka hete obo sinagog-la. ⁸ Crispo, ki a te xef dji sinagog-la, osi khe lasu Sẽie Jezi, i tut mun-iela dji so kaz osi khe. Boku mun dji vil dji Corinto tãde mẽsaj-la i ie ale batxize. ⁹ Lãdã un nuit Pol te gãiẽ un viziõ, i lãdã'l Sẽie dji: _ Pa hete pe, kõtxinẽ pale i pa hete dji pale, ¹⁰ pase ki mo ke u. Pies mun pa puve fe u pies djimal, pase boku mun dji sa vil-la a mopa. ¹¹ I Pol hete laba un ãnẽ edjimï ka mõthe pahol dji Bõdje pu sa mun-iela. ¹² Kã Galio tonẽ guvelmã dji vilaj dji Acaia, judeu-iela hasãble kõt Pol. Ie txẽbe'l, i pote'l pu thibunal ¹³ I ie dji pu guvelmã-la: _ sa om-la le fe pov-la adohe adohe Bõdje dji un mãiẽ ki kõt no lalua. ¹⁴ Kã Pol te ke koze, Galio dji pu judeu-iela: _judeu-iela si sa a te un kek fot ghav o un ghã khim, li te jis pu mo kute zot ke pasiãs. ¹⁵ Mẽ ,kumã a selmã un kestxiõ dji pahol, dji nõ-iela i dji zot phop lalua, êtxupe dji sa zot mem. Mo pa ke sa un mun pu kõdãnẽ sa kestxiõ-la. ¹⁶ I aphue li voie txihe ie dji thibunal-la. ¹⁷ Ẽbe ie txẽbe Sostenes, xef dji sinagog-la, i ie fut li djivã thibunal-la. Mẽ Galio pa fe ãiẽ. ¹⁸ Pol hete boku ju ke khẽtxiẽ-iela la Corinto. Aphue li pale pu fue-iela ki li k'ale, i li bake lãdã un bato ka navidje pu Siria, ãsam ke Priscila i so om Aquila. Ãvã li bake la Cencreia, li kupe so xive i so tet hete net, kumã un sin dji ki li te kõphui un phomes ki li te fe ke Bõdje. ¹⁹ Ie hive la vil dji Efeso, i Priscila i Aquila hete laba. Pol ãthe lãdã sinagog-la i li pale ke judeu-iela. ²⁰ Ẽbe ie dumãde'l pu li hete ke ie pi boku tã, mẽ li pa te le. ²¹ I, kã li ale li dji: Mo ke hutonẽ, si Bõdje le. Ẽbe Pol bake i li ale dji Efeso. ²² Kã li debake la Cezareia, li ale vit pu Jehuzalem. Laba li vizite legliz-la vit i aphue li ale pu Antioquia dji Síria. ²³ Aphue dji hete un tã la Antioquia, li ale. Li pase pu hejiõ dji Galacia i dji Frigia, li te k'ale dji un kote ou uot li te ka bai fos i kohaj pu tuy khẽtxiẽ-iela. ²⁴ Un judeu ki ie k'aple Apolo, li fet la vil dji Alexandria, li te hive la Efeso. Li te ka pale boku biẽ i te gãiẽ un ghã konetmã dji pahol Sẽ-iela. ²⁵ Li te gãiẽ konetmã osi dji Ximẽ dji Sẽie, li te ka pale ke ghã volõte, i kumã li te ka mõthe a hespek dji Jezi te jis ; li te konet selmã batem dji Jã. ²⁶ Li kumase pale ke kohaj lãdã sinagog-la. Priscila i so om Aquila ie tãde'l te ka pale, ẽbe ie pote'l pu ie kaz ie esplike'l pi biẽ ximẽ dji Bõdje. ²⁷ Kã Pol deside ale pu Acaia, khẽtxiẽ-iela dji Efeso, bai kohaj pu li i ie ekhi let pu fue-iela dji laba, dumãde pu ie husuve'l biẽ. ²⁸ Apolo ke ghã laphuev fo, li te ka dethi judeu-iela lãdã djiskusiõ-iela, li te ka bai laphuev lãdã pahol Sẽ-iela ki Jezi a te 🔯Messias.