¹ Pol i Silas pase pu vil dji Anfipolis i Apolonia i ie lãdã vil dji Tessalonica, kote te gãiẽ un sinagog. ² Kõfom so labitxuid, Pol ale laba i dehãtxi thoa samdji li pale suje pahol sẽ-iela ke mun-iela ki te laba lãdã sinagog-la. ³ Pol esplike i mõthe ki 🔯Messias-la te bẽzuẽ sufui, i ki aphue dji muhi, li te gãiẽ pu hesusite. Pol te ka dji: __ Sa Jezi ki mo ka ãnüsie pu zot a 🔯Messias. ⁴ Un de judeu ki te ka kute asekte i ie hasãble ke Pol i Silas. Un ghã lemeho dji nõ-judeu ki te ka khe lasu Bõdje i boku madam ki te ïpohtã dji vil-la osi hasãble lãdã patxizã-la. ⁵ Mẽ judeu-iela hete ke jalu. Ie ale sase un de om ki mixã ãt mun ki maleve-iela dji lahi-iela ie fõmẽ un patxizã. Ie fe boku kõfusiõ lãdã vil-la ie atake kaz dji Jasão, ka sase Pol i Silas pu pote ie pu lamitã dji pov-la. ⁶ Mẽ kumã ie pa thuve Pol i Silas, ie ale ã fos ke Jasão ie un de fue juk la phuezãs dji otohite-iela dji vil-la, ie te ka hele: Sa om-iela ki pote dezadhimã lãdã tut kote-iela! ato ie hive juk lãdã no vil, ⁷ i Jasão fe ie hete lãdã so kaz. Ie ka dezobei lalua-iela dji Cesar, ie ka dji ki gãiẽ uot vue, ki ie k'aple Jezi. ⁸ Kã pov-la i otohite-iela tãde sa ie hete kole. ⁹ I otohite-iela libiate Jasão i uot-iela, aphue ki ie peie kãtxite ki otohite-iela dumãde pu sa. ¹⁰ Kã hive nuit-la, fue-iela voie Pol i Silas pu vil dji Bereia. Kã hive laba, ie ale lãdã sinagog-la. ¹¹ mun-iela ki ka hete laba ie mẽmua te pi luvui pase mun-iela dji Tessalonica i ie kute mẽsaj dji Pol ke bõ volõte. Tut ju-iela ie te ka lekol Pahol Sẽ-iela pu save si Pol te ka dji a te lavehite. ¹² Kõsa boku judeu djisa vil-la khe, i osi nõ-judeu-iela, kumã fam-iela ki pi ïpohtã dji vil-la, kumã osi boku om. ¹³ Mẽ, kã judeu-iela dji Tessalonica save ki Pol te ka ãnüsie pahol dji Bõdje osi la Bereia, ie ale juk laba i ie kumase fe pov-la hete kõt ie . ¹⁴ Ẽbe fue-iela voie Pol pi vit pu obo ghã lahivie; mẽ Silas i Timoteo hete la Bereia. ¹⁵ Sa fue-iela ki te ka akõpãiẽ Pol ie ale ke'l juk vil dji Atenas. Aphue ie hutonẽ pu Bereia, ie pote un nuvel dji Pol; Li dumãde ki Silas i Timoteo ale kõthe ke'l la Atenas pi vit posib. ¹⁶ Ẽkãt Pol te ka ãtan Silas i Timoteo, li hete kole kã li ue vil-la plẽ ke txibodjẽ. ¹⁷ Li te k'ale pu sinagog-la i laba li te ka pale ke judeu-iela i ke nõ-judeu-iela ki te ka khe lasu Bõdje. I tut ju-iela, lãdã plas-la, li te ka pale ke mun-iela ki te laba. ¹⁸ Un de methes (epicureus) mun ki gãiẽ plesi lasu bagaj sẽsual, i un de (estoico) om ki siaie lãdã labitxuid-iela, ie te ka djiskite ke Pol. Kã li pale pu ie dji Jezi i dji hesuheisiõ, ie dumãde: akisa sa bladjo-la le dji ke sa? uot-iela te ka dji: komsi li ka pale dji bõdje-iela ẽthãje-iela. Ie te ka dji sa pase ki Pol te ka ãnüsie Jezi i hesuheisiõ-la. ¹⁹ Ẽbe ie pote Pol pu un heuniõ dji Kõsei-la dji vil-la i ie dji: no le save a ki nov pahol sa ki u ka pote pu no. ²⁰ Pase u ka dji bagaj ki pu no ẽthãj, i no le save akisa ie le dji. ²¹ Pase ki tut mun dji Atenas i ẽthãje-iela ki te ka hete laba te kõtã ka pase tã ka hakõte i kute un kek nuvel. ²² Ẽbe Pol hete djibut djivã ie lãdã heuniõ dji Kõsei-la, i li dji: Om-iela dji Atenas! mo ka ue ki lãdã tut bagaj-iela zot ka suiv helijiõ. ²³ Vuemã, kã mo te ka maxe lãdã vil-la mo te ka gade kote-iela kote zot ka adohe zot bõdje-iela, mo un 🔯altar( tab pu sakhifis) ki ekhi kõsa: *Pu Bõdje ki no pa konet*. Pase sa Bõdje ki zot ka adohe sã konet, jistemã a sa ki mo ka ãnüsie pu zot. ²⁴ Bõdje fe tã-la i tut sa ki li gãiẽ, i Sẽie dji siel-la i late-la pa ka hete lãdã Kaz ki om-iela ka fe. ²⁵ I osi Li pa bẽzuẽ ki ie fe ãiẽ pu Li, pase a Li mem ka bai lavi pu tut, hespihasiõ i tut bagaj-iela. ²⁶ Dji selmã un om Li fe tut has dji mun-iela pu viv lasu late. Ãvã li te fe pov-iela, Bõdje te make pu ie plas kote ie te ke hete i kõbie tã ie te ke hete laba. ²⁷ Li fe sa tut puve sase'l, i mem ka tate, no puve kõthe'l. Li, vuemã pa luẽ dji xakẽ un dji no. ²⁸ Pase ki, kumã kek mun dji: "lasu'l no ka viv, no ka maxe i no esi". I un de dji zot *poeta (mun ki ka koze biẽ), dji: "No osi sa so pitxit". ²⁹ I, kumã no sa so pitxit, no pa djivet majinẽ ki Bõdje sãble un bõdje dji lo, "*prata o dji hox, ki mun ke ie lãmẽ. ³⁰ Lõtã Bõdje pa hete kõtã ke pov-la palakos dji sa bagaj-iela. Mẽ ato Li ka voie ki tut mun-iela, lãdã tut kote-iela, hepãtxi dji ie pexe-iela. ³¹ Pase Li make ju ki Li ke kõdãnẽ tã-la ke *Justis, pu un mun ki Li xuezi. I Li bai laphuev djisa pu tut kã Li hesusite sa om-la. ³² Kã ie tãde Pol ka pale a hespek dji hesuheisiõ-la, un de futan dji li, mẽ uot-iela dji: lãdã uot lokasiõ no le kute u pale suje sa. ³³ Ẽbe Pol ale dji laba. ³⁴ Mẽ un de mun khe i ie hasãble ke li. Ãt sa mun-iela te laba Dionizio, ki a te un mun dji Kõsei-la, un fam ki ie k'aple Damaris i plis uot mun.