¹ Pol hive lãdã vil dji Derbe i Listra. La Listra te ka hete un khẽtxiẽ ki ie k'aple Timoteo. So mãmã, un fam khẽtxiẽ, a te dji has dji judeu-iela, mẽ so papa a te un grego. ² Tut fue-iela ki te ka hete la Listra i Iconio te ka pale biẽ dji Timoteo. ³ Pol te le ale ke'l i pu sa li xathe'l pase tut judeu-iela ki te ka hete lãdã sa kote-iela te save ki papa dji Timoteo a te un grego. ⁴ Lãdã tut vil-iela kote ie te ka pase, ie te ka pale pu khẽtxiẽ-iela desiziõ-iela ki apostolo-iela, presbitero-iela dji legliz-la te deside, i pu ie te obei sa desiziõ-iela. ⁵ Kõsa legliz-iela te ka hete pi fo lãdã espua, i lemeho dji khẽtxiẽ-iela te ka boku xak ju. ⁶ kumã Sẽtesphui pa lese ki ie ãnüsie pahol-la la Asia, Pol i Silas voiaje pu hejiõ dji Frigia-Galacia. ⁷ Kã ie hive phox dji Misia, ie seie ale pu Bitinia, mẽ Lesphui dji Jezi pa lese ie ale. ⁸ Ẽbe ie pase pu Misia i ie hive la vil dji Troade. ⁹ Lãdã sa nuit-la Pol te gãiẽ un viziõ. Li ue om dji Macedonia, ki te djibut i te ka dji: "Vinï pu Macedonia i ide no!" ¹⁰ Aphue djisa viziõ-la, no deside ale vit pu Macedonia, pase no te save ki Bõdje te aple no pu ãnüsie *bõ nuvel-la laba. ¹¹ No bake la Troade i no ale djihekmã pu zile dji Samotracia. Lãdã uot ju-la no hive la degha Neapolis. ¹² Dji laba no ale pu Filipos un vil ïpohtã dji hejiõ dji Macedonia i osi *Colonia dji Roma, kote no hete boku ju. ¹³ Samdji no sotxi dji vil-la no ale obo lahivie-la, pase ki no te ka majinẽ ki laba te djivet gãiẽ un kote pu judeu-iela phuie. No asi i no kumase bladje ke fam-iela ki te hasãble laba. ¹⁴ Un djisa fam-iela ki te ka kute no a te Lidia, un mun ki te ka vãde lẽj dji *purpura, dji vil dji Tiatira. Li te ka adohe Bõdje, i Sẽie luvui so mẽmua pu li kõphan akisa Pol te ka koze. ¹⁵ Li i mun-iela dji so kaz ale batxize. Aphue Lidia ẽvite no, li dji: Vinï hete la mo kaz, si zot ka khe, ki vuemã, mo ka khe lasu Sẽie. Kõsa li oblije no hete la so kaz. ¹⁶ Un ju, kã no te k'ale pu un kote dji phuie, vinï kote no un fam esklav. Sa fam-la te dominẽ pu un lesphui mal ki te ka **adjiviẽ🔯, ke sa so met-iela te ka gãiẽ boku lajã ke **adjiviasiõ🔯 ki li te ka fe. ¹⁷ Fam-la kumase suiv no, li te ka hele kõsa: __ sa om-iela sa siavito dji Bõdje ki boku hot i ie ka ãnüsie kumã pu zot puve sove! ¹⁸ Fam-la fe sa boku ju. Lãdã finisiõ-la Pol hete ãhaj, li gade kote fam-la i li bai zod pu lesphui-la. _ pu povua dji nõ dji Jezi Khi, mo ka voie ki u sotxi dji sa fam-la! I lãdã mem lokasiõ, lesphui-la sotxi. ¹⁹ Kã met-iela dji fam-la ue ki ie pa te ke gãiẽ lajã ãko ke so adjiviasiõ🔯, ie txẽbe Pol i Silas ie pote ie pu phuezãs dji otohite-iela juk la plas-la. ²⁰ Ie phuezãte ie pu otohite-iela dji Roma i ie dji: Sa om-iela sa judeu i ie ka xakaia ke no vil. ²¹ Ie ka mõthe labitxuid, ki kõt no lalua. No, ki sa dji Roma, no pa puve asekte sa labitxuid-iela. ²² Djila un ban mun hasãble pu bhuiga ke Pol i Silas. I otohite-iela voie txihe ie lẽj-iela pu ie fut Pol i Silas ke batõ. ²³ Aphue ki ie fut Pol i Silas boku, otohite-iela jite de-iela lãdã phuiziõ i ie bai zod pu soda dji phuiziõ-la pu veie ie ke tut fos. ²⁴ Aphue ki li husuve sa zod-la, soda dji phuiziõ-la jite la phuiziõ ki ka hete ofõ lajol-la , i li phui ie pie-iela ãt de gho madhie. ²⁵ Un munuï dji nuit, Pol i Silas te ka phuie i te ka xãte pu Bõdje, i uot mun ki te phui-iela te ka kute. ²⁶ Djinku, late-la thãble boku, ki sukuie fe dji phuiziõ-la. Lãdã sa lokasiõ-la tut lapot-iela luvui, i xen-iela ki te phui mun-iela ie kase. ²⁷ Djila soda dji phuiziõ-la leve. Kã li ue ki lapot-iela dji phuiziõ-la te luvui, li majinẽ ki mun ki te phui-iela te mahõ. Ẽbe li hale so espad pu te txue so ko, ²⁸ mẽ Pol hele biẽ fo: _pa fe sa! no tut esi la! ²⁹ Djila soda-la dumãde un lalãp pu li, li ãthe vit kote ie te phui i li ãjunü djivã Pol i Silas. ³⁰ Aphue li ale ke de-iela pu deho i li dumãde dji ie: _ akisa mo djivet fe pu mo puve sove? ³¹ Ie hepon: _ khe lasu Sẽie Jezi i ke sove, u i mun-iela dji u kaz. ³² Ẽbe ie ãnüsie pahol dji Sẽie pu soda-la i tut mun-iela dji so kaz. ³³ Lãdã sa mem lo dji nuit-la, soda-la kumase ẽtxupe dji ie, li lave ie blese-iela dji pohad ki ie te phã. Aphue li i tut mun-iela dji so kaz ale batxize. ³⁴ Aphue li ale ke Pol i Silas pu so kaz i li bai mãje pu ie. Soda-la i mun dji so kaz hete boku kõtã pase ki ato ie te ka khe lasu Bõdje. ³⁵ Kã ju bõmãtẽ, otohite-iela dji Roma voie un de soda ke sa zod-la pu sa soda ki te ka veie phuiziõ-la: "libiate sa om-iela ". ³⁶ Ẽbe soda-la dji pu Pol: otohite-iela voie libiate zot. Zot puve ale ato thãkil. ³⁷ Mẽ Pol dji pu soda-iela: Mo i Silas no sa mun dji Roma i, mem kõsa, sã fe ãiẽ, ie fut no lamitã ban mun. I aphue ie jite no la phuiziõ. I ato ie le voie no ale ãseghe? sa nõ! ki phop otohite-iela vini i libiate no! ³⁸ Soda-iela ale hakõte pu otohite-iela akisa Pol te dji. Kã otohite-iela save ki Pol i Silas sa mun dji Roma, ie hete pe, ³⁹ ie ale dumãde padõ. Ẽbe otohite-iela txihe ie dji phuiziõ i dji pu ie ale dji vil-la. ⁴⁰ Pol i Silas sotxi dji phuiziõ i ie ale pu Kaz dji Lidia. Laba ie kõthe ke fue-iela, ie bai fos pu tut. Aphue ie ale.