¹ Lesphwi-la ka koze akle ki la finĩsiõ dji tã-la mu-iela ke ãbãdonẽ ie fie i ie ke bai ãtãsiõ pu lesphwi ki ka kwenẽ i lalwa dji demõ- iela, ² Palakós dji mãto u ka sehe u ko dji u phop lesphwi ka tumãte. ³ Ie ka ãpexe ha la maiaz-la ie ka bai lod pu ie pa mãje dji alimẽtasiõ ki bõdje fe pu pataje ke fos ke ghemesi ke mun ki fie-iela i ki konét lavehite . ⁴ Pase tut bagaj ki bõdje ka fe ie bõ.Ãie ki u ka husuve i ki u ka fe u puve dji no, ⁵ Pase i sepahe pu pahol dji bõdje i pu phwie. ⁶ Si u mete tut ha bagaj-iela djivã u fwe-iela,u ke sa un bõ sehv dji jezi khi,pase u ke gãiẽ alimẽtasiõ dji pahol dji fie i pu un bõ mõthe ki u swiv. ⁷ Mẽ dji nõ pu ixtwa ki pabõ i dji u phop ko i mun ki vie kaduka.Pase sa, thavai ke kõtã. ⁸ Pase Ezehsis fizik gãiẽ tximoho utxilize,mẽ a kõtã i valé pu tut bagaj i phomes pu u lavi i pu djivã. ⁹ Ha nuvel-la a dji kõfias i dji hespek i tut ki no ka asete. ¹⁰ Pase apuha no ka fose no ko i no ka thavai buku, pase no gãiẽ kõfias la un bõdje ki viv,ki asauvasiõ dji tut mun-iela,i expesial dji ha ki ka khe-iela. ¹¹ Koze i mõthe ha bagaj-iela. ¹² Pa lese pies mun demal hespete u jones,pase sa a un lekzam pu ha ki ka khe,la koze la kõtãtmã i la fie i phop. ¹³ Juk tã mo tonẽ, ãtãsiõ pu li i kõseie i pu mõthe. ¹⁴ Pa neglijã ha dõ ki la hu to,ki vinĩ dji ãdjidã pu to i pu djivã ,ke posiõ dji lamẽ dji ãsiẽ-iela. ¹⁵ Ẽtxupe dji ha bagaj-iela,hete la hwie,pu u fos hete akle pu tut ha mun-iela. ¹⁶ Ẽtxupe dji to mem i pu mõthe.Kõtxinẽ la ha bagaj-iela pase si u fe sa u ke sove u mem mem i mun ki ka tãdeu.