¹ Ha afihmasiõ-la a pu hespete ke kõfiãs: si un mun ãvi sa un bisp, i ãvi fe un bõ thavai. ² A kõhã bisp-iela gãiẽ pu i jis, wom dji un sél fam, kõthole, sẽtximã, hespek, jãtxi pahe pu mõthe. ³ I pa puve bwe djivẽ, nẽ bhuiga, pu sa, jãtxi i bõ ke tut mun. I pa puve phwi la lajã. ⁴ Bẽswẽ kũdji biẽ ho phóp kaz, i ho pitxit-iela bẽswẽ obeil ke tut hespek. ⁵ Ẽbe si un wom pa save kumã pu i kũdji biẽ ho phóp kaz, kumã i ke ẽtxupe dji legliz dji Bõdje? ⁶ Li pa puve sa un mun ki thãsfomẽ nóv, pu u pa tonẽ vo, pu pa tõbe kumã djiab-la tõbe. ⁷ Osi gãiẽ pu gãiẽ un bõ kõsidehasiõ pu wat ki deho, la final pu pa tõbe la thap dji djiab-la. ⁸ Djiak-iela, ãsam, no djivét ka hespete ie, dji un sél pahól. I pa puve bwe boku djivẽ, i nẽ kõtã lajã. ⁹ Djivét fe thavai ke fie i ke un lesphwi phóp. ¹⁰ Ie mem osi djivét pase phomiẽ, sél kõhã i puve sevi pase i jis. ¹¹ Fam-iela dji mem mãiẽ-la, djivét hespete ie, pa puve sa fam dji fe mãto, mẽ kõthole i gãiẽ fie lãdã tut bagaj. ¹² Djiak-iela djivét sa wom dji un sél fam i kũdji biẽ ho pitxit-iela i ho kaz. ¹³ Pase haki ka sevi biẽ i ka aukãse un bõ kõsidehasiõ i un gho kõfiãs ki la Jezi Khi. ¹⁴ Ga ekhi ha bagaj-iela i ãtan mo ale viziteu pi vit. ¹⁵ Mẽ si mo mize u save kumã pu kõtxinẽ la kaz dji Bõdje, ki a legliz dji Bõdje viv, poto ki ka txẽbe lavehite. ¹⁶ Pa puve dji ki gho thavai a lapen: ''Ie ale mõthe la laxe, justxifike pu lesphwi dji Bõdje, ki zãj-iela we, pale pu nasiõ-iela i khe la tã-la i husuve la glória."