¹ Lanwani Josue den yini Luibena buolu yaaba, Gada buolu yaaba, leni Manase buolu yaaba boagidima ² ki yedi ba: "Yi tuo ki hoadi Li Miali Diedo naacemo Musa n den bili yi po ya ñoamabonli kuli, ki go tieni n mo n yedi yaala kuli. ³ Lan waagi ki pundi hali ya bianu nne yii ŋa yi lieba, yeni n doagini ke yi tuo ki kubi Li Miali Diedo yi Tienu ñoabona. ⁴ Moala Li Miali Diedo yi Tienu puni yi lieba ke bi baa ki kali mi diema nni nani wan den yedi maama. Lanwani yi ji baa fidi ki lebidi ki guani yi denpo. Yin guani ki ban kali nLi Miali Diedo naacemo Musa n den boagidi ki teni yi ya diema nni Judana puoli po. ⁵ Yin li tuo ki yaa hua Li Miali Diedo naacemo Musa n den soagini yi ya balimaama be. Lani n tie ke yin yaa bua Li Miali Diedo yi Tiemu, ki tuo ki yaa tiendi wan bua yaaala, ki yaa kubi o ñoamabona, ki yaabi o ki tuuni opo leni yi pala kuli leni yi yan tiana kuli." ⁶ Li yaa puoli Josue den gaali ba ki cabi ba. ⁷ Ki yedi: "Yin taa mani yin baa ya piacianma: yi yankuli, halinjifa, wula, ti kumoandi, ti kuboandi leni ti tiayiekaadi kuli boncianla ki kuni. ⁸ Yin ban boagidi leni yi lieba laa fagidi, tini yin fie yaadi yi yibalinba kani." Musa den teni Manase buolu yaaba boagidima ki tinga Basana nni, Judana kpenu nintuali nani wan den teni ya buoli n sieni maama. ⁹ Lubena buolu yaaba, Gada buolu yaaba den leni Manase buolu yaaba den lebidi ki kuni bi denpo. Bi den ha Isalele yaaba yaaba n sieni Silo, Kanana diema nni. Bi den guani Galaadi ya diema nni ban den baa yaama nani Li Miali Diedo n den waani Musa maama. ¹⁰ Lubena buolu yaaba, Gada buolu yaaba leni Manase buolu yaaba boagidima n den pundi Judana kpenu kani ki da ye Kanana diema nni, bi den maa ya padibinbinli n yaba boncianla ki ku u kpenu. ¹¹ Isalele yaaba kuli den gbadi ke bi niba tua: Diidi Lubena buolu yaaba, Gada buolu yaaba leni Manase buolu yaaba boagima maa padibinbinli Judana kani ki goa Isalele yaaba po Kanana diema nni." ¹² Isalele yaaba n den gbadi laa laabaali bi kuli den taani Silo kani ki baa gedi ki ban baa ba bu toabu. ¹³ Isalele yaaba den soani o kopadiciamo Eleyasala bijua Feneya Galaadi diema nni, wan ban maadi leni ba. ¹⁴ Bi den teni ke yudanba piiga, buolu kuli yudanyendo yegi leni o. Bi kuli den tie diedanba Isalele yaaba siiga. ¹⁵ Bi den gedi Lubena buolu yaaba, Gada buolu yaaba leni Manase buolu yaaba boagima kani Galaadi diema ki caa Isalele yaaba yaaba n sieni tondu ki yedi: ¹⁶ "Yin tieni ya tudibiadima Isalele yaaba Tienu po ne bua ki yedi be? Be yaapo ke moala yi yaadi ki haa Li Miali Diedo ki maa yi yaa padibinbinli ki fiini Li Miali Diedo po mi yiema? ¹⁷ Peyoli ti den kpa tieni tuonbiadi yaadi ya panpaani n baa jagi ti po baa ke Li Miali Diedo den teni ke laa yogunu o falabiado jiidi o niba po. Lani daa dagidii? ¹⁸ Ña yi didi go yaadi ki ha Li Miali Diedo yo? Yi ya fiini Li Miali Diedo po mi yiema dinla, saala o pabienli baa jiidi Isalele yaaba kuli yula poe. ¹⁹ Yi ya nua ke yi Diema joagi kaa dagidi Li Miali Diedo po, yin goa ki kua wan die ya diema nni, o yekaanu n ye naani. Yin guani ki kua ki baa mu tinmu ti siiga. Ama yin da fiini yiema Li Miali Diedo po leni tinba yaapo ki kandi ki ha Li Miali Diedo Yi Tienu padibinbinli ki go maa bontoali. ²⁰ Sedaka puolihuanu Akana n den tudi tudibiadima U Tienu n den kuani ba ya kuali ki yedi ke ban da ta wan yedi ban bolini yaala yeni niinni, Li Miali Diedo pabienli ki den cuo Isalele buolu kuli kaa? Wani Akana bebe ka den bodi o tudima yeni po." ²¹ Lubena buolu yaaba, Gaba yaaba leni Manase yaaba boagidima den goa ki yedi Isalele buolu yaaba n sieni yeni line: ²² "U Tienu, U Tienu, Li Miali Diedo U Tienu, U Tienu wani Li Miali Diedo bani yaala yaapo ke ti tieni yeni. Isalele yaaba kuli moko baa bandi la. Li ya tie ke ti fiini yieme, bi ke ti tieni tudibiadime Li Miali Diedo po, wan da cedi tin yaa ye. ²³ Li yaa tie ke ti maa ti padibinbinceli ki bua ki yaadi ki ha Li Miali Diedo ki ya padi lipo a padijuukaana bi ki yaa kpendi nni bu paabu U Tienu po, bi ki yaa padi i jaandi yaa pada, U Tienu wani oba n cuo ti cuonbiadu. ²⁴ Laa tie yeni ka. Ama ti tieni kelima ti jie saala po, yi yaabila n da yedi ti yaa yaabila: 'Be ya hantaado n ye yinba leni Li Miali Diedo, Isalele yaaba Tienu siiga? ²⁵ Li Miali Diedo wani oba poani Judana ke u tie bianu tinba leni yinba Lubena buolu yaaba leni Gada buolu yaaba siiga, yii pia hantaado ba leni U Tienu. To, yeni mo yi yaabila baa teni ke ti ya yaabila kan go kpiagidi Li Miali Diedo. ²⁶ Lani yaapo yo ke ti jagi ki maa li padibinbinli. Ama laa tie ke ti baa yaa padi lipo a padijuukaana bi padi toana ka. ²⁷ Tin bua yaaba bebe tie ke li naa padibinbinli n tua seedi tinba leni yinba leni ti yaabila leni yi ya yaabila kuli po ke ti pia u sanu ki kpiagi Li Miali diedo leni ti padijuukaana, sugili pada leni i jaandi ya pada. Yeni yi yaabila kan fidi ki yedi ti ya yaabila ke baa pia hantaado ba leni Li Miali Diedo.