¹ Josue den taani Isalele yaaba buolu kuli Sikema nni, o den go yini bi nikpela bi yudanba, bi bujiaba,leni bi koanbala. bi cua U Tienu nintuali. ² Josue den yedi bi niba kuli mi nne: Li Miali Diedo, Isalele yaaba Tienu yedi: yi yaajanba lani n tie Abalahama leni Nahola ba Tela, den kaa hali yogu u kpenciamu duoli po ki ŋua i buli. ³ N den ta ki ñani yi yaaja Abalahama u kpenciamu duoli po, ki teni ke o gaani Kanana diema nni kuli; N den puni o i puoliŋuani boncianla, N den puni o Isaaka. ⁴ N den puni Isaaka mo Jakobo leni Esayu. N den teni Esayu Seyila juali wan diedi, ama Jakobo leni o bijaba wan den jiidi Ejibiti diema nni. ⁵ N den ti soani Musa leni Alono, ki luni Ejipiti yaaba leni mi bancianma yaama ke n den tiendi bi siiga, ki den yuandi ki ñani yi. ⁶ N den ñani yi yaajanba Ejipiti nni, ke bi ban pundi mi ñincianma kani. Ejipiti yaaba den fii leni bi toateliti leni bi tandanba ki ŋuadi yi yaajanba hali mi ñincianma kani. ⁷ Lanwani, yi yaajanba den mua ki mia Mini Li Miali Diedo. Mini Li Mili Diedo n den teni ke li biigili kua yinba leni Ejipiti yaaba siiga. N den teni ke mi ñinciama gua ki milini bi kuli. yi den laa min tieni Ejipiti yaaba maama. li yaa puoli i den waagi ki ye mi fanpienma nni. ⁸ Lani pendi N den gobidi ki gedini yi Amola yaaba diema nni, yaaba n den kaa Judana duoli, bi den tuogi leni yeni bu toabu. N den teni ke yi paadi ba ki diedi bi diema,kelima N den bolini ba i yaapo. ⁹ Moaba diema bado Balaka, Tisipoli bijua, moko den fii ki tuogi leni Isalele yaaba bu toabu. o den soani ke bi ban yini Beola bijua Balama, ke wan cua ki soli yi. ¹⁰ Ama mii den bua ki cengi Balama; ki teni ke o gaali yi, yeni N den faabi yi Balaka nuu nni. ¹¹ Yi den ñani duodi Judana kpenu ki ban pundi Jeliko. Jeliko yaaba moko den tuogi leni yi bu toabu leni Amola yaaba, Felesea yaaba, Canana yaaba,Heta yaaba, Giligasa yaaba, Hefa yaaba Jebusa yaab,. ama n den teni ke yi paadi bi kuli. ¹² N den teni ke anaalonlonbiada den teli ki foagidi ba yipo nani min teli Amola yaaba batieba maama yi nintuali yeni. laa den tie leni yi jusiemu leni yi dabana ka. ¹³ N den puni yi yin kaa koni yaa diema, yin ki maa yaa dogi ke yi ye lienni, Duven leni Olifie tiidi yii ke yii den ŋuu yi den toa yipo bonjekaala. ¹⁴ Moala yin fangi mani Li Miali Diedo ki yaa ŋua O leni i moamoani leni yaa yantiali n kaa pia janbi. yin bolini yi siiga yaa buli ke yi yaajanba den ŋua ban den ye u kpenciamu duoli po , leni Ejipiti po, ki yaa ŋua Li Miali Diedo. ¹⁵ Yi yaa sua ke laa mani yipo yin ŋuadi Li Miali Diedo, gandi mani dinla yin bua ki yaa ŋua yua, yi yaajanba n den ŋua yaa buli u kpenu duoli po bii yin ye naani kani Amola yaaba yaa buli. mini leni n diegu yaaba wani ti baa yaa ŋua Li Miali Diedo. ¹⁶ Bi niba yeni den yedi o: U Tienu n luoni tipo tin ŋaa Li Miali Diedo, ki yaa ŋua i buli! ¹⁷ Kelima Li Miali Diedo N tie ti Tienu; Wani n ñianti ti yonbidi nni Ejipiti diema nni, tinba leni ti yaajanba; ti den laa ke O tieni tipo mi bandicianma, ki den kubiti ti sancenli nni leni i nibuoli yaaba ke ti den poandi bi siiga. ¹⁸ O den teli i nibuoli kuli ti nintuali, leni Amola yaaba yaaba n den ye yaa diema n yene niinni, ti moko ti baa ŋuadi Li Miali Diedo kelima Wani n Tie ti Tienu. ¹⁹ Josue den yedi ba: yi kaa pia yaa fidu n baa ŋuadi Li Miali Diedo, kelima O Tie yaa Tienu gagidi ki ñani cain, ki go pia li ninponli mo; O kan paa sugili yi yiema leni tuonbiadi kuli po. ²⁰ Yi yaa lebidi ki ŋaa Li Miali Diedo ki ŋuadi i nilanbuli, O baa lebidi o yama ki tieni yi yaalin bia, ki bolini, baa ke O den kpa tieni yi mi ŋanma. ²¹ Bi niba kuli den yedi Josue: li kan tua yeni, kelima ti baa ŋua Li Miali Diedo. ²² Josue den yediba: yi tie yi yula po siedi ke yinba yi ba n gandi ke yi baa yaa ŋua Li Miali Diedo. bi den goa ki lebidi o: yene ti tie siedi. ²³ Lanwani ñani mani bi nilanbi buli kuli yii n ye yi siiga, yi pala njigidi nuanli Li Miali Diedo, Isalele yaaba Tienu. ²⁴ Bi niba kuli den yedi Josue, ti baa yaa ŋua Li Miali Diedo ti Tienu ki yaa tiendi Wan yedi yaala. ²⁵ Laa daali Josue den kuani o ŋantaado U Tienu leni Isalele yaaba siiga, ki den teni ba a ñoabona leni mi mabilikaama Sikema. ²⁶ Josue den diani lan kuli U Tienu balimaama tili nni. o den taa tanciangu ki den sienu gu bu ticianbu kani nani kani tie kangagidiŋamu Li Miali Diedo po. ²⁷ Josue go den yedi bi niba kuli: diidi mani yaa tangun yene baa tua tipo siedi mini leni yinba siiga, kelima ku gbadi Li Miali Diedo n yedi ti yaa maama kuli; ku baa tie siedi lan tie yin da yie yi Tienu. ²⁸ Li yaa puoli Josue den cabi ku nilugu ke yua kuli den lebidi ki kuni wan den baa yaa diema po. ²⁹ Lan kuli yaa puoli Nuni bijua Josue Li Miali Diedo den den kpe ki pia kobiga n bina piiga. ³⁰ Bi den piini o wan den baa yaa diema yaa niinni, Timinaki-Selaki dogu nni, Efilayima juana nni, gaasi juali jienu po. ³¹ Isalele yaaba den ŋua Josue o miali dana banlu kuli, leni yaa nikpela n den laa Li Miali Diedo ŋanbili kuli Isalele yaaba po ke Josue kpe ki ŋaaba ban moko yaa miana dana banlu kuli. ³² Josefi kpaba yaa ke Isalele den ñani ŋa Ejipiti, bi den piini ŋa Sikema yaa tiga yaa niini ke Jakobo den daa Sikema baaHamola bijaba kani leni kesita bonbi kobiga, ke li kani ji den tua Josefi buolu yaaba yaa biinu. ³³ Eleyasala Alono bijua moko den kpe ke bi piini o Gibeya nni,ban den puni o bijua Finea yaa dogu ke u ye Efilayima juana nni.