¹ Lefi buolu yaaba yudanba den cua ki la o kopadiciamo Eliyasala, leni Nuni bijua Josue leni Isalele yaaba yudanba. ² Li den sua ke bi ye Silo Kanana diema nni ban den maadi yaa yogunu, ki yediba: Li Miali Diedo den teni Musa li ŋoabonli ke ban teni ti i dogi naani kani ke ti baa yaa ye, li kani yaa gaanma ti yandi po. ³ Lanwani Isalele yaaba den gandi bi diema nni yaa dogi tie nne, leni i gaanma ki den teni Lefi buolu yaaba, nani Li Miali Diedo n den yedi maama. ⁴ Bi den toani caca Kehati buolu yaaba po;lan tie Lefi buolu, bani o kopadiciamo Alono yaabina den baa piiga n dogi taa ke yi ye Juda buolu yaaba leni Simeyono buolu yaaba leni Benjamina buolu yaaba diema nni; ⁵ Kehati buolu yaaba yaaba n den sieni den baa dogi piiga Efilayima buolu yaaba diema nni, leni Dana buolu yaaba leni Manase buolu yaaba boagidima diema nni. ⁶ Bi go den toani caca ke Gelisoni yaa puoliŋoani mo ko piiga n dogi taa Isakala buou yaaba diema nni, leni Asela buolu yaaba leni Nefitali buolu yaaba leni Manase buolu boagidima yaaba n kaa Basana yaa diema nni. ⁷ Melali yaa puoliŋoani den baa piiga n dogi Lubena buolu yaaba diema nni, leni Gada buolu yaaba leni Sabilono buolu yaaba diema nni. ⁸ Ban den toani caca Isalele yaaba den teniteni laa dogi kuli leni li gaanma Lefi buolu yaaba naani Li Miali Diedo n den waani Musa maama. ⁹ Yaa dogi yene n tie ban gandi yi Juda buolu yaaba diema nni leni Simeyono buolu yaaba diema nni. ¹⁰ Yi den tie Alono yaabina lan tie Kehati puoliŋoani, bani Lefi buolu yaaba, n den gaa yaa dogi, kelima ban den toani caca, bi den baa cili boagidi banne. ¹¹ Bi den teni ba Kilijati-Aliba lan tie Ebiloni dogu, Juda juali nni, leni u lindi gaanma kuli. Aliba den tie Anaka yaa ba. ¹² Ama, mi diema yeni dogi leni li tinkundogi kuli den tie Jefune bijua Kalebi n den diedi naani. ¹³ Lanwani bi den teni o kopadiciamo Alono yaabina u wuonkaanu yaa dogi yua n kpa o lielo ke laa bi tie ke bua, lani n tie Ebiloni dogu leni li gaanma, leni Libina leni li gaanma, ¹⁴ Jatili leni li gaanma, Esitemoa leni li gaanma, ¹⁵ Holono leni laa gaanma, Debili leni laa gaanma, Ayini leni laa gaanma, ¹⁶ Juta leni laa gaanma leni Beti-semesi leni laa gaanma. ¹⁷ Benjamina buolu yaaba yaa diema nni, bi den baa Gabaono leni laa gaanma, Geba leni laa gaanma ¹⁸ Anatoti leni laa gaanma, leni Alimoni leni laa gaanma li den fii dogi naa. ¹⁹ Bi kopadicianba Alono yaabina n den baa yaa dogi kuli den taani ki tie piiga n dogi taa leni li gaanma. ²⁰ Ban go den toani caca, Lefi buolu yaaba, Kehati puoliŋoani yaaba n den sieni den baa Efilayima buolu yaaba yaa dogi. ²¹ Bi den teni ba wuonkaanu dogu yua n kpa o lielo ki naa bi bua ka, yaa dogi n tie nne; Sikema leni li yaa gaanma, Efilayima juali nni Geseli leni li yaa gaanma, ²² Kibiti-Sayimi leni yaa gaanma leni Beti-Holoni leni li yaa gaanma, li kuli fii dogi naa. ²³ Dana buolu yaaba diema nni bi den baa dogi naa leni yi gaanma: Eliteke, Gibetoni ²⁴ Ayalona leni Gati-limoni; ²⁵ Manase buolu yaaba yaaba boagidima den baa Tanaki leni Gati-Limoni leni yi gaanma kuli, dogi lie. ²⁶ Kehati puoliŋoani yaaba n den baa yaa dogi kuli taanma den fii dogi piiga. ²⁷ Bi den teni Lefi buolu yaaba siiga, Gelisoni puoliŋoani; Manase buolu boagidima diema nni, lani tie Basana nni Golani dogu yu den tie wuonkaani dogi niini siiga dogi yendu, leni Basana leni Beesitela dogu, leni li yaa Gaanma; li kuli fii dogi lie. ²⁸ Isakala buolu yaaba diema nni, bi den dogi naa leni yi gaanma: Kisijoni, Dabilati, ²⁹ Jalimuti, leni Eni-Ganimi; ³⁰ Asela buolu yaaba diema nni, bi go den baa; dogi naa leni yi gaanma: Misekayeli, Abidoni, ³¹ Helikati leni Lehobi. ³² Nefitali buolu yaaba yaa diema nni u wuonkaanu dogu yuan kpa o lielo leni jalibu yaapo den tie, Kedesi Galile nni leni u gaanma, Hamoti-Doti leni u gaanma, leni Kaditani leni u gaanma. li kuli den fii dogi taa. ³³ Gelisoni puoliŋoani n den baa yaa dogi kuli den taani ki tie piiga n dogi taa leni yi gaanma. ³⁴ Bi den teni Lefi buolu yaaba yaaba n den sieni ki tie Melali puoliŋuani: Sabilono buolu yaaba diema nni, lan tie Jokineyami dogu leni u gaanma, Kadita leni u gaanma ³⁵ Limina leni u gaanma, Nahalali dogu leni u gaanma. li den fii dogi naa. ³⁶ Lubena yaa buolu yaaba diema nni bi den baa Betisedi dogu leni u gaanma, Jaatisa dogu leni u gaanma ³⁷ Kedemoti dogu leni u gaanma Mefaati dogu leni u gaanma li kuli den fii dogi dogi naa; ³⁸ Gada buolu yaaba diema nni, bi den baa wuonkaanu dogi yuan kpa o lielo leni jalibu yaapo, Lamoti Galaati dogu nni leni u gaanma, Manahima dogu leni u gaanma, ³⁹ Hesiboni dogu leni u gaanma leni Jayesedi dogu leni u gaanma. li kuli den fii dogi naa. ⁴⁰ Ban den toani caca Lefi buolu yaaba yaaba den tie Melali puoliŋuani, n den baa yaa dogi kuli den tie piiga n dogi lie. ⁴¹ Lefi buolu yaaba n baa Isalele yaaba diema nni yaa dogi kukuli den taani ki tie piina n dogi nii leni yaa dogibila n ye yi gaanma kuli. ⁴² Dogu kuli den pia u lindi gaanma; li den tie yeni mo i dogi yeni kuli po. ⁴³ Yene Li Miali Diedo den teni Isalele yaaba wan den niani ke o baa pa bi yaajanba yaa diema kukuli. bi den diedi ma ki den kali mi niini. ⁴⁴ Li Miali Diedo den puni ba mi yanduanma bi diema gaanma kuli nani wan niani bi yaajanba maama. Li Miali Diedo den teni ke bi paadi yibanlinba kuli ke bi siiga o baa kuli ki den tuogi ki fiidi ba. ⁴⁵ Yeni Li Miali Diedo n den niani yaaba yaa ŋoaniani kuli den baa mi gbienma ke baa yendu ki den tua fanma.