¹ Li Miali Diedo den maadi leni Josue ki yedi: ² ŋan maadi leni Isalele yaaba ki yedi: yin gandi yaa dogi n baa yaa tie i wuonkaani nani min den waani Musa maama. ³ Li yaa ti ban tie jalibu ke nilo kpa o lielo ki naa bi bua, o baa fiidi ki sani ki ban wuoni laa nni; yi baa tua yipo wuonkaani ki faabi leni yuan baa tu o kpiemo po li panli. ⁴ yuan n kpa o nilo yeni baa sani ki gedi i dogi yeni siiga dogu yendu nni, o yaa ban pundi o dogu yeni buliñoabu kani, o baa sedi, ki togidi laa dogu yaaba nikpela yaali n tieni; ban mo baa ba o po u kaanu wan yaa ye lankani. ⁵ yuan n baa tu li panli yeni yaa ŋoadi o hali u dogu yeni kani, bi kan ñani yuan n kpa o nilo yeni ki teni o; kelima waa bua ka k kpa o lielo, laa tie ke o bi cili nani o mo ka. ⁶ o baa yaa ye u dogu yeni niini hali yaa daali ke o baa sedi li nitaanli siiga ban jia o buudi, leni hali o kopadiciamo yuan n kaa ti kpandi po n baa ti kpe. li yaa puoli o baa fiidi ki lebidi ki goa ki kuni o denpo o dan dogu nni, wan den sani ki ñani naani. ⁷ Bi den gandi Kedesi dogu yu n ye Galile nni, Nefitali juali nni, leni Sikema dogu yu n ye Efilayima juali nni,leni Kilijati-aliba dogu yaaka Ebiloni yu n ye Judana juali nni. ⁸ Judana buanduoli, Jeliko puoli po mo, bi den gandi Betseli yu n ye mi fanpienma nni, Lubena buolu yaaba diema nni, ki go gandi Lamoti yu n ye Galati nni, Gada buolu yaaba diema nni leni Golani doguyu n ye Basana nni, Manase buolu yaaba yaa diema nni. ⁹ Bi den gandi laa dogike yin tua wuonkaani Isalele yaaba po leni yaa nilanba n ye bi siiga po. yeni yuan n kpa nilo kaa bua , o sani ki ban wuoni lienni, ki ciadi leni yuan n baa tu li panli, ke ban da kpa o hali li nitaanli daa jia o buudi.