¹ Ban den toani caca, Simeyono buolu yaaba n den ga u biinlielu. Bi diema den ye Juda buolu yaaba ya diema siiga. ² Ya dogi n den ye bi diema nni den tie Beli-Seba, Seba, Molada, ³ Hatisali-Suali, Bala, Atisema, ⁴ Elitoladi, Betuli, Holima, ⁵ Tisikilagi, Beti-Malikaboti, Hatisadi-Susa, ⁶ Beti-Lebaoti leni Saduseni. Likuli den tie piiga n dogi taa leni i koajaana. ⁷ Li go den pia A yini, Limoni, Etedi leni Asana dogi naa leni yi koajaana. ⁸ Ki taani leni ya koajaana n den ye laa gaanma, ki yaa caa hali Baalati-Beli dogu yu n go tie nuganu ya Lamati. ⁹ Likuli den tie Simeyono buolu yaaba yaa biinu. Bi den ñani Juda buolu yaaba ya diema nne Simeyono buolu yaaba ya biinu, kelima Juda buolu yaaba n den baa ya diema den yaba ki kandi bi po. Lani yaapo yo ke Simeyono buolu ya diema den ye ban Juda buolu yaaba ya yaama siiga. ¹⁰ Ban den toani caca, Sabilono buolu yaaba n den ga u biintaalu. Bi diema den tandi ganu po ki ban pundi hali Sadidi dogu. ¹¹ U bianu den ñani lankani ki teli nintuali po ki ban pundi Madeyala dogu, ki pendi ki ñani Dabeseti dogu, ki ban dagini ya kpenu n puubu Jokineyami dogu puoli. ¹² U den ñani Sadidi ki gondi ki teli puoli, ki ban punti hali Kisiloti-Talidi dogu bianu. U den tagini ki ñani Dabilati dogu ban pundi hali Jafia dogu. ¹³ U den suagi ki go teli puoli ki ban ñani Ita-Katisini ki gedi Gita-Hefedi. U den ban dagini Limoni dogu, ki pegidi ki cubini Neya dogu. ¹⁴ Nujienu po u bianu den ligini Hanatoni dogu ki ban tuoni Jifita-Eli joaloangu. Mi diema yeni den pia piiga n dogi lie leni yi koajaana. ¹⁵ Ya dogi tie na den tie laa dogi siiga i tiami: Katati, Nahalali, Simidoni, Jideyala leni Betelema. ¹⁶ Laa dogi kuli den ye ban toani caca ke Sabilono buolu yaaba baa ya diema ya niinni. ¹⁷ Ban den toani caca, Isakala buolu yaaba n den baa u biinnaalu. ¹⁸ Ya dogi n den ye bi diema nni den tie Jisileeli, Kesuloti, Sunemi, ¹⁹ Hafadayima, Sioni, Anahadati, ²⁰ Labiti, Kisijoni, Abetisi, ²¹ Demeti, Eni-Ganimi, Eni-Hada leni Beti-Patisetisi. ²² U bianu den tagini ki ñani Tabodi, Sasatisima, Beti-Semesi ki ban juodi Judana kani. Bi diema den pia piiga n dogi luoba leni yi koajaana. ²³ Laa dogi kuli den ye ban toani caca ke Isakala buolu yaaba baa ya diema ya niinni. ²⁴ Ban den toani caca, Asela buolu yaaba n den baa u biinmuulu. ²⁵ ya dogi n den ye bi diema nni den tie Helikati, Hali, Beteni, Akesafi, Amaleki, Ameyadi, leni Misali. ²⁶ Nintuali po u bianu hoadi Siholi-Libinati kpenu ki gedi ki ban tuoni Kalimeli juali. ²⁷ Puoli po u den teli Beti-Dagoni dogu ki ban pundi Sabulono buolu yaaba diema leni Jelifita-Eli joaloangu nni. U den pegidi ki teli nujienu po ki ban tuoni Beti-Emeki leni Neyieli. ²⁸ U den ŋoadi yeni ki ban cua ki ñani ya dogi tie na: Kabuli Ebiloni, Lehobi, Hamoni leni Kana, ki ban dagini Sidoni u dociamu. ²⁹ Lankani u bianu den gondi ki teli Lama dogu leni ban maa i bilinciami ki lindi Tili dogu yu. U den suagi ki teli Hosa dogu, ki cua ki ñani Mahalabi, Akisibi, ³⁰ Uma, Afeka leni Lehobi, ki ban juodi Meditelane mi ñincianma kani. Mi diema dogi kuli den taani ki tie piilie n dogi lie leni yim koajaana. ³¹ Laa dogi kuli den ye ban toani caca ke Asela buolu yaaba baa ya diema ya niinni.