¹ Isalele yaaba n den paadi mi diema, bi kuli den taani Silo dogu nni ki caani li kani u kadikaanu gbandieli. ² Bi siiga buoli lele n den sieni kaa ba tinmu. ³ Lanwani Josue den yedi ba: "Yi baa guudi hali u laa yogunu ki Li Miali Diedo yi baanba Tienu n puni yi ya diema? ⁴ Yin gandi buolu nni kuli Jaba taa. N baa soani ba ban gaani ki goandi mi diema, ki diidi bohanla ban bua yaala n tua bi buolu tinga, ki diani kan tietie maama ki goa ki waani nni. ⁵ bi baa boagidi mi diema yeni kaani lele; Juda buolu yaaba baa yaa ye bi yaa diema nni niganu po, Josefi yaa puoliŋuani mo yaa diema n yaa ye nijienu po. ⁶ yinba, yi baa diani i kaanleledi yeni n tietie maama ki yuandi ki guani n kani. n baa toa yipo caca Li Miali Diedo ti Teinu nintuali ki teni buolu leni u biinu. ⁷ Ama Lefinba buolu wani ki pia biinu yi siiga, kelima ban padi Li Miali Diedo po yaa pada n tie bi biinu. Gada buolu yaaba, Lubena buolu yaaba, leni Manase buolu yaaba boagidima, Li Miali Diedo naacemo Musa den teni bi yaa biinu Judana boanduoli puoli. ⁸ Bi jaba yeni n den bogini fii yaa yogunu ke bi baa gedi ki ban goandi mi diema ki diani man tietie maama, Josue den teni ba yaa ñoabonli n tie nne: gedi mani ki ban goandi mi diema, ki diani man tietie maama, ki yuandi ki guani n kani; lanwani nakanba Silo , n baa toa yipo caca Li Miali Diedo nintuali ki boagidi ki teni yua kuli o biinu. ⁹ Laa jaba den gedi, ki ban gaani mi diema nni kuli, ki go den diani ku tigbangu po ki boagidima kaani lele ki waani kaani kuli n tietie maama leni yaa dogi n ye lienni. li yaa puoli bi den guani Josue kani li nagili nni Silo. ¹⁰ Josue den toani bipo caca Silo Li Miali Diedo nintuali ki boagidi mi diema bani Isalele yaaba siiga yua kuli leni o biinu. ¹¹ Ban den toani caca, Benjamina buolu yaaba n den kpa gaa bi yaa biinu ki ŋoadi bi diedi n da maama. ban den baa yaa diema den ye Juda buolu yaaba diema leni Josefi puoliŋuani yaaba siiga. ¹² Nijienu po bi bianu den cili Judana kpenu kani, ki tagini Jeliko dogu u jienu po ki pendi ki poandi a juana nni ki teli nintuali po ki ban dagini Beti-afeni fanpiema. ¹³ U bianu den tagini ki ñani Lusi dogu, ki ban cua ki ñani Lusi dogu yu n go yi Betela yeni ganu. ¹⁴ u den jiidi ki gedi Ataloti-Adali ki poandi yaa juali n ye jiidima Beti-Holoni ganu po; u den suagi ganu po ki ban ñani kilijati-baali ki go tie Kilijati-jealima, ki tie juda buolu yaaba dogu. li den ti nintuali po guama. ¹⁵ Niganu po u bianu den cili kilijati-jealima. ki pendi ki teli nintuali ki ban dagini Nefita ñinbuna kani. ¹⁶ u den jiidi ki ban pundi yaa juali n tiegi leni Beni-hiloni joaloangu ki ye Lafayima yaaba yaa joanloangu jienu po. u bali den Hiloni joaloangu, Jebusa yaaba juaga ganu po ki ban pundi hali Eni-Logeli ñinbunli kani. ¹⁷ U den gondi ki teli jienu po, Eni-Semesi dogu po, ki suagi ki pundi Geliloti ki tiegi leni Adumini gbangbanli, ki den jiidi ki pundi Lubena bijua Bohana tanli. ¹⁸ U den poandi jienu po ki tiegi leni Alaba juali ki jiidi Alaba, ¹⁹ u den suagi ki ñani Beti-Hogila dogu jienu po, ki ban dagini mi ñinciayaama n juodi naani nujienu po, ki ban kua Judana kpenu nni nuganu po. u bianu n den tagini maama den tie yene niganu po. ²⁰ Puoli po Judana kpenu n den tie u bianu. lani n tie Benjamina buolu yaaba n den ba yaa diema bianu ki ŋoadi bi diedi n da maama bianu ²¹ yaa dogi ke Benjamina buoli yaaba den diedi ki den ŋoadi nani bi diedi n da maama den tie: Jeliko Beti-Hogila, Emeki-Ketisitisi, ²² Beti-alaba, Tisemalayimi, Betela, ²³ Afimi,Pada, Ofili, ²⁴ Kefadi-Amoniyi,Ofini leni Geba. li kuli tie piiga n dogi lie leni i tinkundogi. ²⁵ Li go den pia Gabaono, Lama, Beeloti, ²⁶ Mitisipa, Kefila, Motisa, ²⁷ Dekemi, Jidipeeli, Tadeyala, Tisela, Elefi, Jebusa, lani tie Jelusalema, ²⁸ Gibeyati leni Kilijati, piiga n dogi naa leni i tinkundogi. li kuli den tie Benjamina buolu yaaba yaa biinu.