¹ Bi den toani caca ki teni Manase yaaba moko bi yaa biinu kelima Manase den tie Josefi bijakpelo. Li den sua ke bi teni Manase bijakpelo Makili, yua n tie Galaadi baa o ya biinu. O den ga Galaadi diema leni Basana Judana boanduoli no, kelima o den tie jakoando. ² Bi den toani caca ki Manase buolu yaaba yaaba n sieni mo bi ya biinu. Li den tie Josefi bijua Manase bijaba Abieseli, Heleki, Asilieli, Sikema, Hefeli leni Semida. ³ Tiselofadi ki den pia bonjaga. Wani Tiselofadi yeni den tie Hefeli bijua ke Hefedi mo tie Galaadi bijua, Galaadi mo n ya tie Manase bijua Makili ya biga. Waa den pia bonjaga ama o den pia a bonpola. Bi den yi Mala, Noa, Hogila, Milika leni Tilitisa. ⁴ Bi den gedi ki laa o kopadiciamo Eleyasala leni Nuni bijua Josue leni Isalele yaaba yudanba ki yedi ba: "Li Miali Diedo den waani Musa ke wan boagidi ki teni timo ti ya biinu ti buolu yaaba siiga." Bi den teni ba bi yaa biinu bi baa naataanjaba siiga. ⁵ Lawani Manase buolu yaaba den baa biinpiiga ka ta leni Galaadi leni Basana diema yaama n ye Judana boaduoli. ⁶ Kelima baa den teni Manase buolu yaaba bijaba bebe ka mu tinmu, bi den teni bi puoba moko, ke Galaadi ya diema mo tie Manase buolu yaaba yaaba n sieni ya biinu. ⁷ Manase buolu yaaba diema banlu den ñani Asela dogi ki ya caa hali Mikimetati dogu ki ye Sikema dogu puoli. O den ñani Mikimetati yeni ki teli nuganu ki ban dagini Eni-Tapua dogu yaaba kani. ⁸ Tapua dogu den ye Manase buolu yaaba diema bianu kani. Bani Manase buolu yaaba n den die u gaanma tinga. Ama Efilayima n den die u dogu wuni uba wani. ⁹ U bianu den gedi ki ban tuoni Kana kpenu nuganu ya jaali kani. De ya dogi n den ye u kpenu nuganu po den tie Efilayima buolu yaaba ya dogi ba ke yi den ye Manase buolu yaaba ya diema nni. U bianu den ñani lankani ki ban dagini Meditelane ñincianma. ¹⁰ Yeni, Efelayima buolu yaaba den die nuganu po, Manase buolu yaaba mo n ya die nujienu po. Meditelani ñincianma n den tie bi bianu nintuali po. Asela buolu yaaba den ye Manase buolu yaaba jienu ki kpigi ki goa nintuali po, Isakala buolu yaaba mo n ya ye bi jienu ki kpigi ki goa puoli po. ¹¹ Isakala leni Asela buolu yaaba diema nni, Manase buolu yaaba den baa ya dogi n tie na: Beti-Seyani leni Jibeleema leni yin den die ya dobila leni Doli, Eni-Doli, Taanaki, Megido leni yi niba, leni yi koajaana, lani n tie Doli gaanma tinbuona. ¹² Ama Manase yaaba yeni ki den fidi ki deli laa dogi niba, lanwani bani Kanana buolu yaaba yeni den suogi ki ye likani. ¹³ Baa Isalele n den ti baa u paalu ki pugini, baa den deli ba, bi den teni ke bi tuuni a tuona leni u paalu. ¹⁴ Josefi puolihuani den cua ki yedi Josue: "Be yaapo ke a boagidi ki teni ti biinyendu bebe, tinba yaaba ke Li Miali Dielo seligi ti ki teni ke ti yaba boncianla?" ¹⁵ Josue den yedi ba: "Yi ya yaba ki sua ke Efilayima juali kan dagidi yi, yin gedi ki ban pedi Felesa yaaba leni Lefayima yaaba fuali ki pugini." ¹⁶ Josefi puolihuani den goa ki yedi: "Li tie moani ke li juali kan dagidi ti. Ama Kanana buolu yaaba yaaba n ye i tiali nni leni yaaba n ye Beti-Seyani leni u tinkundogi nni leni yaaba n ye Jisileeli joaloangu nni kuli pia toateliti ke li tie kudi." ¹⁷ Josue den yedi Josefi puolihuani, lani n tie Efilayima buolu yaaba leni Manase buolu yaaba boagidima yeni: "Yi yaba ki go pia u fidu mo boncianla. Lanwani yi kan baa biinyendu bebe. ¹⁸ Ya juali n tie fuajali yeni baa tua yi ya yaale. Yin pedi li ki diedi li kani cain. Y baa fidi ki deli ki ñani Kanana buolu yaaba li kani baa ke bi pia ya toateliti n tie kudi ki go pia u fidu mo."