¹ Ban den toani caca ke Josefi buolu yaaba n baa yaa diema den cili Judana ki kuu leni Jeliko ki gua Jeliko ñinbuna kani puoli po. ² u banlu den ŋoadi ki cili mi fanpiema po ki gua Jeliko ki ban kua Betela juali nni. U den suagi ki gedi hali Lusi dogu, ki ban tagini ki ñani Ataloti Adika yaaba n ye naani. ³ U den jiidi ki teli nintuali po, ki goa Jafileti yaaba diema po, ki poandi Beti-Holoni jiidima leni Geseli dogu, ki ban pundi ki dagini mi ñincianma kani. ⁴ Lan kane ke Josefi yaabila Manase leni Efilayima den gaa bi diema biinu. ⁵ Efilayima yaaba buolu n den baa yaa diema yaa bianu ki ŋoadi bi diedi n da maama tie nne; mi bianu den cili puoli , Ataloti- Adali dogu kani ki yaa caa hali Beti-Holoni tanpoli po. ⁶ U den suagi nijienu po ki ban balini leni Mikimetati dogu ki gondi ki teli puoli Tanati-Silo ki tagini ki noanli puoli ki ban ñani Jonoaki dogu. ⁷ U bianu yeni den ñani Jonoaki kin jiidi ki gedi Ataloti leni Naadata ki ban pundi Jeliko, ki suagi hali Judana kpenu ⁸ U den ñani Tapua ki teli nintuali Kana kpenu po, ki ban ñani hali mi ñincianma kani. lan n tie Efilayima buolu yaaba n den baa yaa diema biinu ki ŋoadi bi diedi n da maama. ⁹ Efilayima buolu yaaba go den baa i dogi ciami leni yaa dogibila n kukuu ba ki ye Manase buolu yaaba diema nni. ¹⁰ Efilayima buolu yaaba ki den deli Kanana yaaba yaaba n den ye Geseli dogu nni, Kanana yaaba baa ye Efilayima buoli yaaba siiga hali leni dinla. ama bi den teni ke bi tuuni bi po a tuona leni paalu.