¹ Ban den toani caca ke Juda buolu yaaba baa ya diema den tandi nuganu po ki goa puoli waamu ki ban dagini Edoni bianu. Hali nuganu cain den tie Tisini fanpienma. ² Lanwani nuganu po mi bi diema bianu den cili mi ñincianyaama juodima kani, mi ñima n lugi ki tinga naakani. ³ U bianu yeni den cua ki ñani Akilabima gbangbanli kani leni Tisini fanpienma ganu po. Kadesa-Balineya ganu po mo, u den cua ki Hetisiloni ki ya ca Aladi dogu, ki ban gondi ki teli Kadika. ⁴ U den suagi ki ñani Atisimoni dogu ki ban ca hali Ejipiti kpenu ki ban tuoni mi ñincianma Meditelane. Lani n tie Juda buolu yaaba banlu niganu po. ⁵ Puoli po mo, bi diema bianu den tie mi ñincianyaama ki ya caa ki ban dagini hali Judana n cua ki kua laa ñima nni naani. Nintuali po mo u bianu den cili lankani, ⁶ ki taa ki gedi gedi Beti-Hogila dogu, ki ñani Beti-Alaba dogu ki suagi ki pundi hali Lubena bijua Bohana Tanli. ⁷ U den poandi Akola joaloangu nni ki gedi debili dogu. Nijienu po, u dogu gondi ki teli Giligali, Adumini gbangbanli nintuali kpenu ganu po. U den balini ki Eni-Semesi ñima ki ban pundi hali Eni-Logeli. ⁸ U den ñani lankani ki poandi Hinomi joaloangu, Jebusa yaaba juaga jiidima ganu po, Jelusalema dogu n ye naani. U den tagini ki doni ya juali n ye Hinomi joaloangu nintuali leni Befayima buolu yaaba ya joaloangu jienu po. ⁹ U den nagini li juali yeni yuli po ki gondi ki teli Nefitoa ñinbuna, ki suagi ki gedi Efilona juali dogi po, ki pendi ki teli Baala dogu ya ka Kilijati-Jealima. ¹⁰ U banlu den ñani lankani ki teli nintuali ya juali seyili jiidima ganu po, Kesaloni dogu kani, ki jiidi ki gedi Beti-Semesi, ki ban ña Timina dogu. ¹¹ U den pendi ki teli Ekiloni dogu ganu po, ki gondi ki gedi cubini Sikidoni dogu. U den ñani Baala juali po ki teli Jabineeli, ki gedi ki ban dagini Meditelane ñincianma. ¹² Nintuali po bi diema bianu den tie Meditelane. Lani n tie Juda buolu yaaba n den baa ya diema biani. ¹³ Jefune bijua Kalebi den baa o biinu juda buolu yaaba siiga, nani Li Miali Diedo n den yedi Josue maama. Bi den teni o Kilijati-Aliba dogu yu n go tie Ebiloni. Aliba yeni tie Anaka baa. ¹⁴ Kalebi den deli ki ñani Anaka buolu yaaba, lani n tie o yaabitaada: Sesayi, Ahimani leni Talimayi puolihuani. ¹⁵ O den ñani lankani ki gedi ki ban baa Debiti dogu yaaba. Debiti den kpa yi Kiliyati-Sefeli. ¹⁶ Wani Kalebi den yedi: Yua n fidi ki paadi Kilijati-Sefedi n baa pa o n bisalo Akisa wan tua o pua. ¹⁷ Kalebi waalo Kenasa bijua Otinieli den paadi u dogu yeni ke Kalebi puni o o bisalo Akisa ke o tua o pua. ¹⁸ Wan den pundi Otinieli kani o den tundi wani Otinieli ke wan mia o baa Kalebi u kuanu. Wani Akisa n den pundi o baa kani ki jiidi o hunbo po, o baa den buali o wan bua yaala. ¹⁹ O den goa ki yedi o: N cua miaboe. Pa nni naani n pia a ñinbuna moko kelima han puni nni ya tinga nujienu po yeni tie tinkuonge, ñima ki ye. Lanwani Kalebi den puni o ya ñinbuna n ye naapo n duobi leni naanpo n jiidi. ²⁰ Lani n tie Juda buolu yaaba n den baa ya diema ki hoadi bi diedi n dani maama. ²¹ Ya dogi n den ye Juda buolu yaaba diema nuganu po ki goa bani leni Edomi u bianu po den tie ya dogi n tie na: Labitiseli, Edeli, Jagudi, ²² Kina, Dimona, Adada, ²³ Kedesi, Asoli, Itani, ²⁴ Sifi, Telema, Beyaloti. ²⁵ Asoli, Hadata, Kilijoti-Etisiloni yu n go yi Hasoli, ²⁶ Amami, Sema, Molada, ²⁷ Hatisali-Gada, Sesimomi, Beti-Peleti, ²⁸ Atisali-Suali, Beli-Seba, Besijotija. ²⁹ Baala, Ijimi, Atisema, ³⁰ Elitoladi, Kesili, Holima, ³¹ Tisikilagi, Madimana, Sansanna, ³² Lebayoti, Silihimi, Ayini, leni Limoni. Li kuli taanma tie piilie n dogi yia leni yi koajaana. ³³ Ya dogi n den ye u tialu nni den tie Esitoali, Tisolea, Asina, ³⁴ Sanoa, Eni-Ganimi, Tapua, Enami, ³⁵ Jalimuti, Adulama, Soko, Aseka, ³⁶ Sadayimi, Aditayima, Gedela, Gedelotayimi. Li kuli tie piiga n doginaa leni yi koajaana. ³⁷ Li go den pia Tisenani, Hadasa, Migidali-Gada, ³⁸ Dileyani Mitisipa, Jokiteeli, ³⁹ Lakisi, Botisikati, Egilona, ⁴⁰ Laboni, Lakimasi, Kitilisi, ⁴¹ Gedeloti, Beti-Dagoni, Naama leni Makeda. Li kuli tie piiga n dogi luoba leni yi koajaana. ⁴² Li go den pia ya dogi n tie na: Libina, Etedi, Esanai, ⁴³ Jifita, Asina, Netisidi, ⁴⁴ Keyila, Akisibi, Madesa. yini mo dogi yia leni yi koajaana. ⁴⁵ U tialu yeni niini go den pia Ekiloni leni wun den die ya dogi leni u koajaana, ⁴⁶ Leni ya dociami leni dobila n lindi Asidodi ki ye Ekiloni leni Meditelani siiga kuli. ⁴⁷ Leni Asidodi leni Gasa leni yin den die ya dociami leni i tinkundogi ki ya ca hali Ejipiti kpeni leni Meditelane jaali. ⁴⁸ Ya dogi n den ye li juali nni den tie Samidi, Jatili, Soko, ⁴⁹ Danna, Kilijati-Sanna yu n go yi Debili, ⁵⁰ Anabi, Esitemo, Anima, ⁵¹ Gosena, Holono, leni Gilo. Likuli taani ki tie piiga n doyendu leni a koajaana. ⁵² Li go den pia Alabi, Duma, Eseyani, ⁵³ Janumi, Beti-Tapua, Afeka, ⁵⁴ Humita, Kilijati-Aliba, yu n go yi Ebiloni, leni Tisioli. Li kuli den tie dogi yia leni yi koajaana. ⁵⁵ Li go den pia Mayona, Kalimeli, Sifi, Juta, ⁵⁶ Jisileeli, Jokideyami, Sanoa, ⁵⁷ Kayini, Gibeya, leni Timina. Li kuli tie dogi piiga leni i koajaana. ⁵⁸ Li go den pia Haluli, Beti-Tisuli, Gedoli, ⁵⁹ Maadati, Beti-Anoti, leni Elitekoni. Likuli tie dogi luoba leni i koajaana. ⁶⁰ Li go pia Kilijati-Baali, yu n go yi Kilijati-Jealima leni Laba dogi lie leni i koajaana. ⁶¹ Yaa dogi n den ye mi fanpienma nni den tie Beti-Alaba, Midini, Sekaka, ⁶² Nibisani, Idi-Hamela leni Eni-Gedi. Likuli tie dogi luoba leni i koajaana. ⁶³ Juda buolu yaaba ki den fidi ki deli Jebusa yaaba yaaba n den ye Jelusalema. Lanwani Jebusa yaaba leni Juda buolu yaaba baa ki ta ki ye Jelusalema dogu nni hali dinla.