¹ Diidi Isalele yaaba n den ba yaa tinbiinu Kanana yaaba diema nni, leni o Kopaciamo Eleyasala, leni Nuni bijua Josue leni Isalele buolu yaaba yudanba n boagidi yaala bi ñiali nni. ² Bi den toani caca ki boagidi ki tenteni buolu yia yaaba leni yaa boagidima sieni buolu yaaba bi yaa tinmu , nani Li Miali Diedo n den waani Musa maama. ³ Kelima Musa den boagidi ki teni i buoliedi leni boagidima buolu yaaba bi yaa biinu Judana duoli po. ama waa den teni Lefi buolu yaaba wani biinu. ⁴ Josefi yaabila den boagidi ki tie buoli lie, lani tie Manase leni Efalayima; Lefi yaaba buolu ki den baa biinu mi diema nni, li yaa tie ban baa yaa ye yaa dogi nni, leni lan kani yaa lindi gaama yaa tinmu bi yandi leni bi bonpiakaala po bebe. ⁵ Isalele yaaba den boagidi mi diema ki den ŋoadi nani Li Miali Diedo n den wani Musa maama. ⁶ Juda yaaba buolu den nagini Josue kani ban den ye Giligali; Jefune bijua Kalebi, wan yua n tie Kenesa buolu yua, den yedi Josue: ŋa bani Li Miali Diedo n den kadi ki waani Musa wani U Tienu naacemo yaala mini leni fini yaa po, tin den ye Kedesa-Balineya yaa. ⁷ N den pia bina piina ke Musa Li Miali Diedo naacemo den soani nni Kedesa-Balineya ki ban goandi mi diema. min den guani n den togidi o leni n pali tugu nni min la yaala li kuli cain. ⁸ N kpiiba yaaba n den yegi leni nni ki gedi, den maadi ki wudi bi niba gbani, ama mini wani , n den ŋoadi Li Miali Diedo n Tienu sanbili cain. ⁹ Laa daali Musa den poli ki yedi: a taali n ŋma yaa diema nni kuli tie a biinu hali u yogu kuli fini leni a puoliŋoani po. kelima a den ŋoadi Li Miali Diedo n Tienu sanbili cain. ¹⁰ Diidi moala Li Miali Diedo teni ke baa ki li miali nani Wan den niani maama. dinli n tie piina n bina muu leni Li Miali Diedo n den teni Musa yaa ŋoabonli yaa yogunu ke Isalele yaaba cuoni mi fanpiema nni; hali laa yogunu ki tu moala n pia piini n bina muu. ¹¹ N da go li baa ki pia u gbamanu nani yaa daali po ke Musa den soani nni. baa leni moala n pia laa gbamanu nani laa yogunu po, ki baa fidi ki gedi bu toabu bi ki yaa ca ki goa. ¹² ŋan teni nni yaa joali n tie nne nani Li Miali Diedo n maadi maama laa yogunu po; kelima a den gbadi ke Anaka buolu yaaba ye lie nni ke bi go pia dogiciami n maa ki lindi leni i bilinciami. Li Miali Diedo yaa ye leni nni n baa teli ba nani Wani O ba n den yedi maama ¹³ Josue den gaali Jefune bijua Kalebi ki teni o Ebiloni ke u tua o yaa biinu. ¹⁴ Li tie yene ke Jefune bijua Kalebi Kenisa buolu yua yaabila diedi hali leni moala Ebilona kelima o ŋoadi Li Miali Diedo Isalele yaaba sanbili cain. ¹⁵ Ciama bi den yi Ebiloni Kilijati-Aliba lani n tie Aliba dogu. Aliba tie yaa ja yaa yeli n den n ñani Anaka buolu yaaba siiga. hali mani mu toabu den gbeni mi diema nni ke yua kuli fuodi.