¹ Josue den podi, ke o bina mo den yabi hali boncianla. Lan wani Li Miali Diedo den yedi o:moala a podi boncianla, ke yaa diema n sieni ke a baa koani ki ga mo nan da yabi boncianla ² Diidi yaa diema n sieni: Filisiti yaaba yaa diema leni Gesuli yaama, ³ Ki cili Sikoli kpenu yu ye Ejibiti banlu ki yaa caa hali nijienu po Ekiloni dogu bianu kani. laa diema kuli tie Kanana yaame. Filisiti yaaba yaa badijamuudiba n die li kani. lan tie Gasa yua, Asidodi yua, Asikaloni yua, Gati yua, leni Ekiloni yaa yua, leni Afita yaaba; ⁴ ki cili niganu po, Kanana yaaba diema kuli, leni Sidoni yaaba dogu Meyada ki yaa hali Afeka, hali Amoni yaaba u bianu; ⁵ Gebali yaaba yaa diema, Libani yaa diema kuli puoli po, ki cili Baala-gada yu n ye li juali Helimoni tinga, ki yaa caa hali Hamati dogu; ⁶ Leni yaaba ye a juana nni, ki cili Libani ki yaa caa hali Misidofofi-Mayima yaaba, Sidoni yaaba kuli. n baa teli ba Isalele yaaba nintuali. nani min yedi ŋa maama, ŋan toa caca ki teni Isalele yaaba ban n diedi. ⁷ ŋan boagidi laa diema Isalele yaaba buolu yia siiga leni Manase buolu yaaba yaaba n den sieni. ⁸ Lubena buolu leni Gada buolu leni Manase buolu boagidima den cili ki ga bi piinu leni Musa Judana boanduoli po, nani Li Miali Diedo naacemo Musa n den boagidi ki teni ba maama. ⁹ Bi diema biani den cili Alinoni boanjaali kani leni yaa dogu n ye laa joaloandi siiga Medeba tialu, ki yaa caa hali Diboni dogu; ¹⁰ Leni Sihoni Amola yaaba bado dogi kuli, wani n den kaa Hesiboni, ke o diema den pundi hali Amoni yaaba tingi banlu. ¹¹ Galaadi, Gesuli leni Mata yaaba yaa diema, Helemoni juali kuli, ki taani leni Basana ki yaa caa hali Salika dogu. ¹² O bado Ogi Basana diema yua, yua n den diedi Asitaloti leni Edileyi, wan bebe n den sieni Lefayima buolu siiga. Musa den paadi laa batieba kuli ki den teliba. ¹³ Ama Isalele yaaba naa den teli Gesuli yaaba leni Maaka yaaba, bi baa ye Isalele yaaba siiga hali leni moala. ¹⁴ Lefi buolu yaaba bebe, ke Musa ki den teni ba biinu baa kuli; bi biinu den tie yaa badiju kaana ke bi den tiendi Li Miali Diedo Isalelenba Tienu nintuali, nani Wan den yedi bi po Musa maama. ¹⁵ Musa den boagidi ki teni Lubena yaaba buolu bi biinu ki den ŋoadi nani bi diedi n da maama. ¹⁶ Bi diema banlu den cili Aloyeli dogu yu ye Alinoni kpenu kunu kani, leni yaa dogu ye laa joaloandi siiga kuli, leni Medeba tianlu kuli, ¹⁷ Hesiboni leni yaa dogi n ye u tialu nni kuli,lan tie Diboni, Bamoti-baali, Beti-baali-Meoni, ¹⁸ Jahati, Kedemoti, Mefaati, ¹⁹ Kilijatayima, Sibima, leni Tisediti-Asasadi leni yaa joanli ye ku joanloangu nni. ²⁰ Beti-Peyoli leni Pisiga juali jiidima, leni Beti-Jesimoti, ²¹ Yaa dogi ye u tialu po kuli, leni Sihoni wani Amola bado leni o diema kuli, wan yua den dini li bali ki den kaa Hesiboni: Musa den paadi o, ki taani leni o badijabila yaaba n ye Madiana diema nni, lan tie, Efi Bekeli,Tisuli, Huli leni Leba, laa badijabila kuli den ye mi diema nni ke o bado Sihoni den die ba. ²² Isalele yaaba n den kpa yaaba bi siiga den pia Beola bijua Balama o lingido, bi den kpa o leni bi jugisiega. ²³ Judana n den u banlu leni Lubena buolu yaaba tinga. laa dociami leni li dobila tie ban den ba yaa biinu ki ŋoadi bi diedi n da maama. ²⁴ Musa den boagidi ki teni Gada yaaba buolu bi yaa biinu ki ŋoadi nani bi diedi n da maama. ²⁵ Bi tinmu den tie Jaseyedi Galaadi dogi kuli, Amoni buolu yaaba diema boagima ki ban dagini hali Aloyeli ki tiegi leni Laba, ²⁶ ki go cili Hesiboni ki ban dagini Lamati-Misepe leni Betonima , ki go ñani Mahanayimaki ban dagini Debili banlu kani, ²⁷ Ku joaloangu nni, bi den die Beti-Halama, Beti- Nimida, Sukoti leni Safoni, o bado Sihoni yua n den kaa Hesiboni, n den die laa dogi; u bianu den tie Judana ki ban dagini hali mi ñincianma Kineleti judana kandima nijienu po. ²⁸ laa dogiciami leni laa dogibila n tie Gada buolu yaaba yaa biinu ki ŋoadi nani bi diedi n da maama. ²⁹ Musa den boagidi ki teni Manase buolu boagima bi yaa biinu ki ŋoadi nani bi diedi n da maama ³⁰ Bi diema banlu den cili Mahanayima dogu, Basana diema leni li kani bado Ogi n den die yaa diema kuli, leni Jayili dogi kpagikpaamu basana diema nni, dogi biiluoba. ³¹ Bani Manase bijua Makili buolu yaaba boagidima go den diedi Galaati diema boagidima leni Basana bado Ogi dogi Asitaloti leni Edileyi. ³² Lani n tie Musa n den ye Judana duoli Moabi tialu nni Jeliko puoli ki boagidi yaa biini. ³³ Waa den boagidi ki teni Lefi buolu yaaba wan biinu kelima Li Miali Diedo Isalele yaaba Tienu n tie bi yaa biinu nani Wan den yedi maama.