¹ Jelusalema bado Adoni Sekeda den gbadi ke Josue den paadi Ayi diema ki den bolini u leni wan den soani u maama lenu u bado nani wan den soani Jeliko maama leni u bado, ke Gabaono yaaba mo den loli ku danligu leni Isaalele yaaba ki den ye siiga. ² Ti jiwanciandi den cuo ba; kelima Gabaono den tie dogu ciamu nani bi batieba n kaa yaa dogi nni, ki den yabi ki cie ba Ayi diema, ke u jabi mo kuli den tie jakoanda. ³ Lan yaapo Jelusalema bado Adoni Sedeka, den soani ban yedi Ebiloni bado, Hohama, leni Jalimuti bado Pileyama, leni Lakisi bado Jafiya leni Egilona yaa bado Debili: ⁴ Cua mani n kani, ki todi nni ke tin tuogi leni Gabaono yaaba leni bu toabu, kelima bi loli ku danligu leni Josue leni Isalele yaaba. ⁵ Amola yaa batieba bonbi mu, Jelusalema yua, leni Ebiloni yua, leni Jalimuti yua, Lakisi yua, leni Egilona yua, bi kuli den taani ki fii leni bi toagola; bi den jiidi bi toanagili Gabaono diema kulima, ki den baa u leni bu toabu. ⁶ Gabaono yaaba den soani giligali po Josue kani, ban yedi o: ŋan da ŋa a naacenba, ŋan jaligi cua ne, ki ga ti , ŋan pa ti mi todima; kelima Amola yaaba batieba yaaba n ye a juana nni kuli taani ki baa tuogi ti leni bu toabu. ⁷ Lan Josue den fii Giligali wani leni o toatieba, leni o joakoanda kuli. ⁸ Li Miali Diedo den yedi Josue: ŋan da jie ba, n ñaa ba a nuu nni, bi niini o ba kuli kan fidi ki moa leni ŋa. ⁹ Josue den fii ki ñani Giligali, ki den cuoni ñiamungu ki pundi ki ludiba. ¹⁰ Li Miali Diedo den teni ke bi teliba ke bi lebidi ki sani Isalele yaaba nintuali; Isalele yaaba den paadi ba cain ki kuu Gabaono kani, bi den ŋoadi ki nandi ba yaa sanu n do ki cuubi Beti Holoni, bi den cili ki kpaani ba hali ki ban pundi Aseka leni Makeda. ¹¹ Nani ban den tiini Isalele yaaba nintuali, ki ji Beti Hola, Li Miali Diedo den teni ke a tatanciama ña tanpoli ki baali bipo hali ki ban pundi Aseka dogu, ke bi kuli den bodi; a tatanciama n kpa yaaba den yaba ki cie yaaba ke Isalele yaaba den kpa leni mu jugisiemu. ¹² Lan wani Josue den maadi ki mia Li Miali Diedo, yaa daali ke Li miali Diedo ŋa Amola yaaba Isalele yaaba nuu nni, o den yedi Isalele yaaba kuli nintuali: fini u Yienu ŋan sedi Gabaono yuli po, fini, o ŋmalo, a mo n sedi Ayalona joaloangu yuli po. ¹³ U yienu den sedi, o ŋmalo moko den jidi o cenli, hali Isalele yaaba n tu bi yibalinba bi panpaani. naani laa bonla ki diani o Niteginka tili nni? u Yienu den sieni u cenli tanpoli yuli siiga, u den sedi kaa ba hali danmunli bolee. ¹⁴ Laa daali buolu da kpa tieni, ba ciama bi ba leni moala, naani kani ke Li Miali Diedo cengi o nisaalo miabu yeni; kelima Li Miali Diedo wani o yaa ba den todi Isalele yaaba bu toabu nni. ¹⁵ Lan wani Josue leni Isalele yaaba kuli den lebidi ki guani li nagili po Giligali. ¹⁶ Bi Batiemuudiba yeni den sani ki ban wuoni Makeda jualonku nni. ¹⁷ Bi niba den gedi ki ban wani Josue ki yedi: bi batiemuudiba yeni wuo Makeda jualongu nni. ¹⁸ Josue den yedi: bindi mani a tanciama ki luoni ku jualongu yeni buliñoabu, ki sieni bi niba li kani bani n yaa guu ba. ¹⁹ Yi mo, yinda sedi yin sani ki ŋoadi yi yibalinba. yin ga bi puoli po; ki kpedi jia ba ban da kua bi dogi nni, kelima Li Miali Diedo , yi Tienu, ŋaa ba yi nuu nni. ²⁰ Josue leni Isalele yaaba n den teli ki paadi ba cain, yaaba n den fidi ki sani kiadi den ban kua yaa dogi yaa niini n lindi ki cebini leni i bilinciami, ²¹ Li yaa puoli, bi kuli den guani Makeda li nagili po Josue kani leni yanduama, nilo ba kuli naa go kpa lanbu ki yenbidi leni Isalele yaaba. ²² Lan wani Josue den yedi: luodi mani ku jualongu yeni buliñoabu, ki ñani bi badimuudiba yeni ki cuani ba n kani. ²³ Bi den tieni nani wan yedi maama, ban den ñani yaa badimuudiba ku jualongu nni yeni bi den cuani ba o kani, lan tie Jesulema yaa bado, Ebiloni yaa bado, Jalimuti yaa bado, Lakisi yaa bado leni Egilona yaa bado. ²⁴ Ban den cuani laa batieba kuli Josue kani, Josue den yini Isalele yaaba, ki den yedi bitoatieba yudanba yaaba n den yegi leni o ki gedi bu toabu: nagini mani ne, yin ta yi taana ki ŋma bi batieba yeni tuli. bi nagini, ki ta bi taana ki ŋma bi tuli. ²⁵ Josue den yedi ba: yin da jie pu kuli , yin da yagi yi yama, yin paagi yi ba , ki baa li papaali kelima yene Li Miali Diedo ba soani yi yibalinba yin moa leni yaaba kuli. ²⁶ Li yaa puoli, Josue den pua ki kpa ba, ki teni ke bi joani ba tiidi muu po. bi den juani li kani hali ku yenjuagu. ²⁷ ki yienga n den baa kua yaa yogunu, Josue den teni ke bi jiini ba i tiidi po, ki den luni ba ban den wuo yaa jualongu yaa niini, ki luoni ku jualongu buliŋoabu yeni leni a tanciama, ŋa baa ye li kani baa leni moala. ²⁸ Laa daali Josue den paadi Makeda dogu leni o jugisiegu, ki den bolini u nubi kuli leni bi bado. waa den ŋa baa niyendo, o den soani Makeda bado nani wan den soani Jeliko bado maama yeni. ²⁹ Josue leni Isalele yaaba den ñani Makeda ki gedi Libina ki ban baa Libina dogu. ³⁰ Li Miali Diedo den ŋa laa dogu moko leni u bado Isalele yaaba nuu nni, bi den bolini u leni u nuba kuli, baa den ŋa ba niyendo, bi den soani u bado nani ban den soani Jeliko bado maama yeni. ³¹ Josue leni Isalele yaaba den ñani Libina ki gedi Lakisi; bi den kpa bi toanagili ki nagini u dogu yeni ki den ba u. ³² Li Miali Diedo den ŋa Lakisi dogu Isalele yaaba nuu nni, ke bi paadi u li danlieli daali, leni bi jusiemu bi den bolini u leni u niba kuli, nani ban den soani libina maama yeni. ³³ Lan wani Geseli bado Holama den gedi ki baan todi Lakisi yaaba. Josue den paadi o, wani leni o nuba kuli, baa den ŋa baa niyendo. ³⁴ Josue leni Isalele yaaba den ñani Lakisi ki gedi Egilona, bi kpa bi toanagili u nintoali ki den ba u. ³⁵ Bi den paadi u laa daali, leni bi jusiemu bi den bolini u leni u nuba kuli, baa den ŋa baa niyendo. Bi den kpa u nuba kuli laa daali nani wan den soani Lakisi maama yeni. ³⁶ Josue leni Isalele yaaba den ñani Egilona ki gedi ki ban ba Ebiloni yaaba. ³⁷ Bi den paadi u, leni bi jugisiemu, ki bolini u ki kpa u bado, leni u tinkundogi, leni yaa nuba n den ye yi niini kuli. Josue naa den ŋa baa nuyendo,nani Egilona yeni, o den bolini u cain leni u nubi kuli. ³⁸ Josue leni Isalele yaaba, den jigidi ki nuanli Debili ki gedi ki ban baa u. ³⁹ O den paadi, wuni leni u bado leni u tinkundogi kuli; bi den kpaniba leni mu jusiemu, bi den bolini yaaba n den ye u niini kuli, baa den ŋa baa niyendo; Josue den soani Debili leni u bado nani wan den soani Ebiloni leni Libina li bado maama yeni. ⁴⁰ Josue den paadi mi diema kuli; yaaba n ye a juana nni, leni naganu yaaba, leni u tialu nni yaaba, leni yaaba n ye a juana baalima, o den padi laa batieba kuli; waa den ŋa baa niyendo, o den bolini yaala n fo kuli, nani Li Miali Diedo, Isalele yaaba Tienu n den bili maama. ⁴¹ Josue den paadi ba, ki cili Kadesa Balineya ki ban pundi Gasa, o den paadi Gosena diema kuli ki yaa caa hali Gabaono. ⁴² Josue den paadi laa batieba leni bi diema kuli cabi yenma, kelima Li Miali Diedo Isalele yaaba Tienu den ye leni ki todiba bu toabu nni. ⁴³ Li yaa puoli Josue leni Isalele yaaba den lebidi ki guani Giligali po, bi nagili nni.