¹ Yaa batieba n den ye Judana diema nintuali, a juana nni leni ku jualoangu nni, leni yaama n baali mi ñinciama ki tandi ki gedi hali Libani diema, Heta yaaba, Amola yaaba, Kanana yaaba, Felesa yaaba, Hefa yaaba, leni Jebusa yaaba yaa batieba yeni kuli, ban den gaa labaali yaala n den tieni yeni po, ² den taani ñoabu ki bua ki tuogi Josue leni Isalele yaaba kuli bu toabu. ³ Gabaono dogu yaaba moko n den gbadi Josue n den soani Jeliko leni Ayi maama, ⁴ Bi den tieni u fanu, ki fii li sancenli, ki bogini mi sancenjiema.bi den taa a kpalipacala ki tuni bi ŋunbi, leni yaa dayuadi n cadi ke bi gua ki ŋanŋali, ⁵ Bi go pili a cacakpela ki lani a tiacala;banden pia yaa dupen kuli den tie bonkuoma, ki tie nani bani dini ki sieni yaala yeni. ⁶ Bi den gedi Josue kani wan den ye Giligali li nagili nni yaa yogunu,ki yedi wani Josue leni Isalele yaaba kuli: Ti ñani hali yaa diema n foagi ki cua ki miadi yi yin loli ku danligu leni ti. ⁷ Isalele yaaba den goa ki yedi bani Havila yaaba: li fidi ke yi ye ti siiga, ti baa gaa lede ki loli ku danligu leni yi? ⁸ Bi den yedi Josue: ti tie a naacenba yo. Josue den yedi ba, yi tie ŋmeba? ki ñani le? ⁹ Bi den goa ki yedi o: a naacenba ñani hali yaa diema n foagi, kelima ti den gbadi Li Miali Diedo a Tienu maama, wan tieni yaala kuli Ejibiti nni, ¹⁰ Leni wan den soani Amola yaaba batieliediba yaaba n den ye judana kpenu puoli maama. lani n tie Sihoni Hesiboni bado, leni Ogi Basana yaa bado yua den ye Asitaloti. ¹¹ Lanwani ti nikpela leni ti diema yaaba kuli den yedi ti: yin taa mani mi jiema li sancenli po, ki tuogiba ki yedi li ne: ti tie yi naacenba ti miadi yi yin loli yen ti ku danligu. ¹² Diidi mani ti dupen: ti cua da den li tuone ti den ñani o ti diedi nni yaa yogunu, tin den fii li sancenli yaa daali ki baa tuogi yi. moala o kuli kuodi ki cabicabidi. ¹³ Yaa dayuadi n tie nne den tie bonpandi yaa yogunu ke ti gbieni ti, diidi mani ki le tin papadi maama. ti tiadi leni ti cacaadi kuli cadi kelima li sancenli n foagi maama yaapo. ¹⁴ Isaalele yaaba den tuo ki ga bi sancenjiema ki naa den mia Li Miali Diedo ki baa bandi ban baa tieni maama. ¹⁵ Josue den dagidi leni ba ki den tuo ki loli leni yaa danligu n baa teni ke o kan kpa ba.lan wani Isalele yaaba yudanba den poli ke li baa yaa tie yene. ¹⁶ ban den loli laa danligu li puoli dana ta, ISalele yaaba den gbadi ke bi tie bi kuantalieba ki ye bi siiga. ¹⁷ kelima Isalele yaaba den cuoni dana ta sancenli bebe ki den pundi bi dogi; bi dogi den tie, Gabaono, Kefila, Beeloli leni kilijati-jealima ¹⁸ Baa den kpaba kelima Isalele yaaba yudanba den poli leni Li Miali Diedo, Isalele n ba Tienu po, ke bi baa ŋaa ba leni limiali. ama Isalele yaaba den yenbidi yenbidi bi po. ¹⁹ Bi yudanba den yediba: moala kan fidi ki siiba kelima ti den taa ki poli Li Miali Diedo Isalele n ba Tienu yeli po ki yedi ke ti kan siiba ²⁰ Ti kan kpaba ki da teni Li Miali Diedo pabienli n djiiddi ti po kelima tin den poli ki nianba yaala yaapo , diidi mani tin baa tienba maama: ²¹ Liigi yaaba den yedi ba ti baa cedi yii ye. bi den teni ke bi pe ti daadi ki go lu mi ñima bi po nani liiga yaaba n den yedi ba maama. ²² Josue den teni ke bi yinba, ki den yedi ba: be n teni ke yi boandi ti ki yedi ke yi ñani hali foagima, ki naa ña yi ye ti siiga? ²³ Moala yi ye leni ti solindi yi kan ña ti yonbidi nni, yi baa ya pe ti daadi ki go lu mi ñima n Tienu diegu po. ²⁴ Bi den goa ki lebidi Josue ki yedi: tinba a naacenba, ti gbadi ke Li Miali Diedo a Tienu den teni O naacemo Musa li ñoabonli ke pa yi mi naa diema kuli ke yin diedi ma ki go bolini mi nuba,yi cuama ti siiga jienti hali bonciala kelima ti miana po lani teni ke ti tieni laa bonla. ²⁵ Moala ti ye a nuu nni, tieni ti nani ŋan sua ke li pundi ki go tiegi a po maama. ²⁶ Josue den tieni nani lan den bili maama; ki den gaa ba Isalele yaaba nuu nni ki baa den kpaba; ²⁷ Ama ki cili laa daali bi tua yaaba n baa pe ti daadi ki go lu mi ñima li nitanli po leni Li Miali Diedo padibinbinli po, naani kani wani Li Miali Diedo baa gandi; bi tiendi yene hali yen moala.