¹ Hasoli bado Jabina n den gbadi laa bonla kuli, o den soani a tonda Madona dogu bado Johabi kani, leni Simidoni bado , leni Akesafi bado yaa batieba kani, ² O den soani u tondu yaa batieba n den ye u najienu po a juana nni, yaaba n ye u tialu nni Kineleti naganu po,leni yaa batieba n ye ku Joalongu nni, leni yaa boanjaali n kuu leni Doli yaa batieba yaa kani, ³ O go den soani Kanana yaaba kani, yaaba n ye nintuali leni puoli, leni Amola yaaba, leni Heta yaaba, leni Felesa yaaba, leni Jebusa yaaba yaaba n ye a juana nni, leni Hefa yaaba yaaba n ye Helimoni juali baalima Mitisipa diema nni. ⁴ Bi kuli den ñani bani leni bi toatieba, baa den pia coali nani mi ñinciama tanbiima yeni, bi taami leni toateliti den yaaba ki kandi. ⁵ Laa batieba kuli den juogi ki bili ban baa taani kadi naani, lan wani bi den taani Medoma ñimi kani ki baa tuogi leni Isalele yaaba bu toabu. ⁶ Li Miali Diedo den yedi Josue: ŋan da jieba, kelima saala u naa yogunu , N baa kpa bi kuli Isalele yaaba nintuali. a baa jia bi taami gadibanjiini, ki go juu leni mi fantama bi toateliti kuli. ⁷ Josue, leni o toatieba den pundi ki ludi ki baa bi po, Medoma ñima kani, bi den jaligi ki jiidi bi siiga. ⁸ Li Miali Diedo den ŋa ba Isalele yaaba nuu nni; bi den paadi ba ki ŋoadi ki teli ba hali Sidoni doguciamu nni , leni Miside-foti- Mayima, leni Misitipa jualoangu nni nintuali po; bi den paadi ba, baa den ŋa baa niyendo ⁹ Josue den tieni ba naani Li Miali Diedo yedi tieba maama. o den jia bi taami gadibanjiini, ki go den juu bi toateliti leni mi fantama ¹⁰ Laa yogunu po , Josue den lebidi ki baa Hasoli dogu, ki den kpa u bado leni o jugusiegu: Hasoli den tie yogunu ba po laa batieba doguciamu ¹¹ Leni bi jugisiemu bi den bolini ki kpa u nuba kuli . baa den ŋa yaala n fo ki pia miali kuli, bi den juu Hasoli dogu. ¹² Josue go den paadi ki fie laa batieba dogi kuli leni li batieba, ki kpa ki bolini ba, nani Li Miali Diedo naacemo Musa n den bili maama. ¹³ Ama Isalele yaaba ki den juu yaa dogi n den ye mu juamu po, li yaa tie Hasoli bebe, ke Josue n den juu. ¹⁴ Isalele yaaba den ta bi yula po laa dogi piama kuli leni li yandi; ama leni bi jusiemu bi den kpa u niba hali ki den bolini bi kuli cain, baa den ŋa li baa kuli ke li fo. ¹⁵ Josue den tieni yaa ñoamabona ke Li Miali Diedo den teni O naacemo Musa; ke Musa mo den teni o . waa den loadi ki ŋa li ba kuli Li Miali Diedo n den yedi Musa n tieni yaala. ¹⁶ Yene ke Josue den diedi laa diema kuli, a juana po yaama, u naganu yaama , Gosena diema kuli, ku joaloangu yaama, leni u tialu yaama kuli, Isalele yaaba joana leni li joaloandi kuli, ¹⁷ Ki cili li juafanli kani baali leni Seyili hali Baala-gada, Libana yaa joaloangu nni,Helimona juali jiidima. o den taa laa dogi batieba kuli ki den pua ki kpaba. ¹⁸ Josue n den tuogi leni laa batieba ya toabu den waagi boncianla. ¹⁹ Dogu baa kuli ki den tieni kudanligu leni Isalele yaaba, li yaa tie Hefa yaaba yaaba n ye Gabaono; yi sieni kuli bi den paadi yi leni bu toabu. ²⁰ Kelima Li Miali Diedo den teni ke bi juagi bi pala ki tuogi Isalele yaaba leni bu toabu, lan tie Isalele yaaba den kpa ki bolini ba cain kaa den pia bipo ninñingbadima ba kuli bi bolini ba nani Li Miali Diedo n den wani Musa maama. ²¹ Laa yogunu Josue den gedi ki ban baa Anaka buolu yaaba, yaaba n den ye Ebiloni juana nni, Debili juana nni, Anabi yaa juana nni, Juda leni Isalele juana kuli, Josue den bolini ba cain leni bi dogi kuli ²² Anaka yaaba buolu baa yendo ki den sieni Isalele yaaba diema nni, li yaa tie Gasa, leni Gati leni Asidodi yaa dogi nni yaa ka. ²³ yeni Josue den paadi mi diema kuli, nani Li Miali Diedo n den waani Musa maama kuli. Josue den boagima Isalele yaaba ban diedi yua kuli leni o biinu, li yaa puoli Isalele yaaba den fuodi leni bu toabu.