¹ Lan wani Joba den taa mi maama ki yedi: ² ooh! li yaabi baa tuo yin biigi n fala ki le lan kpiagi ki da maama yeni, bi yaabi cieni n yebiadima kuli ban biigidi yaala yaa niini, ³ Li baa kpiagi ki cie baa yaa kpenciamu tanbiima. lan yaapo n teni ke n maama tie nani gaadi maama yeni! ⁴ U Paaliciamu piemi muu ki lugidi nni, ke naano ñuu li loabidi; ke U Tienu jiwanciandi moa leni nni. ⁵ Nani o fuaŋunbo baa se ti moasoangidi ki yaa go mua? bi o nua baa yaa duni wan baa ŋmani yaa muadi kani? ⁶ nani yaa jiema n sa kaa pia yaama baa tuo jiema? nani mi jenli kpibiema pia u manu? ⁷ Min kaa bi sugini ki sii yaala, lani n tie n jiema, baa leni lan pia ti sensendi. ⁸ N bua min bi mia yaala n baa mi gbienma, ke U Tienu n tieni n po min bi sugini maama! ⁹ Li yaa bi dagidi U Tienu po wan ñii ki midi nni, Wan tandi O Nuu ki dudi nni cabi yenma! ¹⁰ N den baa yaa pia laa baagi wani, n bi baa pia li pamanli baa leni min ye fala nni: kelima ba yenma mii kpa miidi yua gagidi ki ŋani maama. ¹¹ N go baa yaa dugi bepo yaa yogunu ke mii go pia fidu baa kuli? n go pia bee sugima n yaa bani ke juodima yogunu pundi. ¹² Nani n pia u paalu nani li tanli yen bii? nani n gbanandi moko juagi nani ti kumoandi yene? ¹³ Mii go pia loagu baa kuli, naani mii fuagi leni u gaapo? ¹⁴ Yua n ye leni fala bi pundi ki baa o danli kani mi ñinŋingbadima baa o yaa go pia fangili U Paaliciamu kuli daano po. ¹⁵ N kpiiba ñani n puoli nani i kpeni yeni, nani yaa kpeni yaa ñima yen ñuudi ki bodi yeni. ¹⁶ Nani a tatana yen gbidi yu, ke ku gbangbadugu mo cua ki piini ki mundi u; ku wulu yogunu yaa pundi, i yen ñuudi ¹⁷ kelima ki yiegi fantama po, i yen kuodi cain. ¹⁸ Lipo teni ke bi sancenba jadi ki yaadi bi sancenli nni ki ban bodi mi fanpiema nni ¹⁹ Tema diema sancenba den nua ki bua ki le, Seba diema yaaba sancenba moko den pia tama; ²⁰ Ama ban den pundi i fe den cuo ba leni ban sua ke i kpeni yeni kuodi, li den lidinba. ²¹ Yi tie yene nani yaaba kaa ye ki fo; yi nua n ye biadima, ke ti jiwaandi cuo yi! ²² Naani n yedi: baa mani bonliba ki pa nni, yin todi nni leni yi piama, ²³ gaa mani nni n yibalinba nuu nni, yin daa ki faabi nni a nubiada nuu nni? ²⁴ Teni mani min bandi n tagili lan tie min suo; wani mani min tudi nan kani? ²⁵ Yaa maama n tie moamoani ki yen pia ban tuoma! ama yi mo yaa fuugu pia bee mayuli yo? ²⁶ yii tuo min yedi yaali bii, ki nua yua n ye leni li paboanli maama nani yaa maama n ki pia yuli bii? ²⁷ Yi tundi ki cienbiga yaa tugili n ciagi, ki wangidi i danli fala. ²⁸ N miadi, yin nuanli mani nni! naani n baa pua yi faama i nunbu nni? ²⁹ goa cua mani, da tieni mani yaali n ki tiegi; guani ki cua mani ke mii tieni tagili baa kuli. ³⁰ Naani n lanbu po pia i tagili ke ñoabu ki bani ki gagidi yaalin bia?