¹ Elifasa Temana yua den taa mi maama ki yedi: ² Ti yaa tuo ki yaadi ti ñoana ki, a pali go baa biidi ki pugini bi? ama ŋme n baa fidi ki yaa ŋmini? ³ Diidi fini yua n maani ki bangi nitoaba mi bangima, ki paagidi yaaba yaa buadi n tadi, ⁴ A maama yen fiindi yaaba n jadibi ki baa ba, a yen paagidi yaaba yaa duna n poali. ⁵ Moala lan tie fini yeni a gbanu kuli wudi! moala lan nandi fini yeni, a yagini a yama. ⁶ Naani a fangili U Tienu po ka tie a jigi? naani a papienli ka tie a sugima? ⁷ ŋan kpaagi ki le: a yaa kpa laa yaa nilo n ki pia tagili bodi? bi lee nitegini kaabi yo ke bi bolini? ⁸ Min wan laa, yaaba n ko ti tuonbiadi ki go yen buli mi biadima bi yen ciedi li yaa bonluonkaala; ⁹ U Tienu fuoma yen boliniba, bi yen buodi leni U Tienu pabienli faalu, ¹⁰ I yangbanli dunli gbeni, a yangbanbila ñina kua; ¹¹ mi jiema luoma po teni ke o yangbanlo kpe, ke o yangbanñoa bila mo sani ki yadi. ¹² Mi ŋasili maama pundi hali n kani, ke mi soabidi n tubili nni. ¹³ Yaa yogunu ke n dua ki goa ku ñiagu ki ye ti dangidi nni, bi niba yaa ye mi goakandi kaama nni. ¹⁴ Ti jiwaandi den cuo nni ke n den cie ke gbanu kuli digibi toantoani. ¹⁵ Fawaami ba den pieba n nungi nni... ke n yugbankobidi fii ki sedi ¹⁶ Bonli baa den se ke mii bandi la, ke ku junjungu den se n nintuali ke den gbadi u nialu yenbidi ki yedi: ¹⁷ naani o nisaalo baa fidi ki yaa tiegi U Tienu nintuali? naani o baa fidi ki yaa ŋani O tagido nintuali? ¹⁸ U Tienu yaa dugi o naacenba po, O ya laa i tagili bani O malekinba kani, ¹⁹ naani yaaba ke o tagi leni ti tandi kaa cie? bani yaaba yaa tagima tie leni mi tama, ke bi baa fidi ki ña ki midiba nani o sidibilo yeni! ²⁰ Yensiinu leni ñiagu bi ŋmadi ki midi ba, ke bi kpe ki bodi, o ba kuli ki faami lipo. ²¹ bi miana jia, ke bi kpe ki naa baa yanfuoma baa kuli.