¹ Abimeleka n den kpe, Dodo yaabili Tola Pua bijua, den fii ke o baa faabi Isalele yaaba. O den tie Isakala buolu yua ki ye Samidi dogu, Efilayima juana nni. ² O den tua Isalele yaaba gobidikoa hali piilie n bina taa. O den kpe ke bi piini o Samidi. ³ O yaa puoli Galaadi yua Jayili den tua Isalele gobidi koa hali piilie n bina lie. ⁴ O den pia bijaba piitaa, ki die dogi piitaa Galaadi diema nni. Hali dinla bi yi laa dogi Jayili dogi. ⁵ Jayili den kpe ke bi piini o Kamoni dogu nni. ⁶ Isalele yaaba didi go den tieni yaala n ki mani Li Miali Diedo. Bi den hoadi i buli Baali leni Asitate, leni Sili diema yaaba yaa buli, leni Sidoni diema yaaba ya buli leni Moabi diema yaaba ya buli leni Amoni buolu yaaba yaa buli leni Filisiti yaaba ya buli. Bi den haa Li Miali Diedo kaa go hua o. ⁷ Li Miali Diedo pali den beni Isalele yaaba po ke o taa ba ki teni Filisiti yaaba leni Amoni buolu yaaba nuu nni. ⁸ Ki cili laa binli ki yaa caa hali piiga n bina nii, bi den moni ki faligi Isalele yaaba yaaba n den ye Judena puoli, Amola yaaba diema Galaadi nni. ⁹ Amoni buolu yaaba den duodi Judana ki ba tuogi bu toabu leni Juda buolu yaaba, Benjamina buolu yaaba leni Efilayima buolu yaaba. Isalele yaaba den ye falaciamo nni. ¹⁰ Isalele yaaba den buudi ki mia Li Miali Diedo ki yedi: Ti tieni apo ti tuonbiadi kelima ti ha fini ti Tienu ki hoadi Baali. ¹¹ Li Miali Diedo den goa ki yedi ba: Ejipiti yaaba, leni Filisiti yaaba, ¹² Leni Sidoni yaaba leni Amaleki buolu yaaba, leni Mayona buolu yaaba n den faligidi yi, yi den buudi ki mia nni. Naani mii den ga yi bi nuu nni? ¹³ Ama yinba, yi haa nni ki hoadi i buli. Li tie lani yaa po yo ke n kan go faabi yi. ¹⁴ Yin gedi mani ki ban mia yin gandi ya buli yeni ban faabi yi leni yi fala. ¹⁵ Isalele yaaba den yedi Li Miali Diedo: Ti tieni ti tuonbiadi. Soani ti han bua maama. Ama han go faabi ti dinla. ¹⁶ Lani bi den (())ani i buli bi siiga ki goa ki hoadi Li Miali Diedo. Ban den ye leni ya fala den cuo Li Miali Diedo mi nihima. ¹⁷ Amoni buolu yaaba den taani ki gedi ki kpaa bi toanagili Galaadi diema nni. Isalele mo den taani ki kpa bi yaa toanaginli Mitisipa dogu. ¹⁸ Lanwani Galaadi yaaba leni bi yudanba den buali bi yaba. hme ba kpa gedi ki tuogi leni Amoni buolu yaaba bu toabu? Yua n kpa gedi wani n baa tua Galaati yaaba yu daano.