¹ Musa den goa ki yedi: Diidi, bi kan daani n maama, bi kan cengi n yedima mo. Bi baa yedi: Li Miali Diedo naa den doagidi apo. ² Li Miali Diedo yedi o: A kubi be a nuu nni? O den yedi: N kubi gbianu. ³ Li Miali Diedi den yedi: Lu u tiipo. O den luni o gbianu tiipo, ke u tua wa. Musa den jie ki sani. ⁴ Li Miali Diedo den yedi Musa: Tandi a nuu ki cuo o juoli po. Musa den tandi o nuu ki cuo o wa yeni juoli ke o goa ki tua gbianu o nuu nni. ⁵ Li Miali Diedo den yedi: A baan tieni yene ban daani ke bi baanba Tienu n doagidi o yuli apo, wani yua n tie Abalahama Tienu Isaaka Tienu leni Jakoabo Tienu. ⁶ Li Miali Diedo go den yedi Musa: Kuani a nuu a liadili nni. O den kuani o nuu o liadili nni, ki goa ki ñani o nuu, o den sua u cuo mi kpaadima, ki pendi nani a tatana yeni. ⁷ Li Miali Diedo den yedi: Go guani ki kuani a nuu a liadili nni. O den kuani o nuu o liadili nni ki goa ki ñani ki sua ke u hanbi ki tua nani u lielu. ⁸ Li Miali Diedo den yedi: Bi yaa daani a maama, kaa cengi mi maalikpiama, bi baa cengi mi maalijuodikaama wani. ⁹ Bi yaa daani laa maaliliedima, kaa cengi ayedima mo, a baa kabidi u kpenciamu ñima, ki wuli tiipo, han baa taa u kpenciamu ñima yaama ki wuli tiipo yeni baa tua soama. ¹⁰ Musa den yedi Li Miali Diedo: O Diedo, mii tie mi maama n dingi yua yaa po, laa cili npo wonli bi wonliyali ka bi han cili ki maadi leni mini a naacemo ka. Kelima n tie bido. ¹¹ Li Miali Diedo den yedi Musa: hme n tagi o nisaalo ñoabu? hme n yen teni o nilo n tua muuga bi tua womo, hme n yen teni o nilo n ya nua bi ki juani? Laa tie mini Li Miali Diedo kaa ? ¹² Lanwani, gedi, n baa ye leni a ñoabu, n go baa bangi a han baa yedi yaala. ¹³ Musa den yedi: Soani han bua ki soani yua. ¹⁴ Lani Li Miali Diedo pali den fii Musa po, ke O yedi: naani o ciamo Alono Lefi buolu yua naa ye likani bii? N bani ke wan wani mi maama naa pa opo. Diidi wani n kpendi ki baa tuogi a yeni. O ya laa ha, o pali baa mangi hali boncianla. Han maadi leni ki tieni mi naa maama o ñoabu nni. mini, n baa ye leni o ñoabu. Amo baa tie opo nani U- Tienu yeni. ¹⁵ A baa maadi ki tieni mi maama o ñoabu nni, n mo baa ya ye leni a ñoabu leni o ya ñoabu mo. N baa bangi yi yin baa tiendi yaala. ¹⁶ O baa maadi apo leni li nitaanli, ki tua a ñoabu, amo n ga U Tienu kaanu. ¹⁷ Taa u naa gbianu a nuu nni, yu ke a baan tieni mi maalima. ¹⁸ Musa den gedi, wan den kuni ki pundi o cuadiba Jetilo kani, o den yedi o: N mia ha han pa nni u sanu min gedi n kpiiba yaaba n ye Ejipiti po, ki ban la bi ya baa ye. Jetilo den yedi Musa: Gedi leni mi yanduanma. ¹⁹ Li Miali Diedo denyedi Musa Madiana diema nni: Goa ki gedi Ejipiti diema nni, kelima yaaba n den bua ki ñani a miali kuli kpe. ²⁰ Musa den taa o pua leni o bila ki jagini ba o hunba po ki guani Ejipiti diema nni. O den taa U Tienu gbianu ki kubi. ²¹ Li Miali Diedo den yedi musa: A ya fii ki caa Ejipiti nni ya yogunu, han diidi min baa tieni a nuu nni ya bancianma kuli, a baa tieni likuli Falono nintuali. Ama mini n baa teni o pali n juagi ke o kan tuo bi niba n gedi. ²² Han yedi Falono: Li Miali Diedo yedi mi naa maama: Isalele tie n bijua n bijakpela. N yedi a: ²³ Cedi n niba n bijua n gedi ki ban soani npo, a ya yie ki kan cedi wan gedi, n baa kpa a bijua, a bijakpelo. ²⁴ Ban den ye u sanu nni, Musa n den pundi wan baa duani naankani ku ñiagu, Li Miali Diedo den cua ki bua ki kpa o. ²⁵ Sofola den taa ya tanli n mani ki jia o bijua punjuogu, ki luni gu Musa taana po, ki yedi: A tie npo mi soama ya calo ! ²⁶ Lanwani Li Miali Diedo den cedi Musa. O pua den yedi: Mi soama ya calo kelima ku koanciagu yaa po. ²⁷ Li Miali Diedo den yedi Alono: Gedi mi fanpienma po ki ban tuogi Musa. Alono den gedi ki ban tuogi Musa U Tienu juali kani ki bibi o. ²⁸ Musa den waani Alono Li Miali Diedo yua n den soani o ya maama kuli, leni wan den teni o li ñoabonli ke wan tieni ya bancianma kuli. ²⁹ Musa leni Alono den suagi leni bi sancenli, ki den taani Isalele yaaba nikpeliba kuli. ³⁰ Alono den waani ba Li Miali Diedo n den teni Musa ya maama kuli. Musa den tieni mi bancianma bi niba kuli nintuali. ³¹ Bi niba den daani Musa yedima. Bi den bandi ke Li Miali Diedo cua ki goandi Isalele bila, ki la bi falaciamo. Bi den gbaani ki kpiagi o.