¹ Musa den kpaa o cuado Jetilo, Madiana kopadiciamo yangoli; o den gedini li yankoli yeni hali mi fanpienma pendima ki ban pundi hali U Tienu juali kani, Holebi. ² Li Miali Diedo Maleki den doagidi o po yaa Tugangou n co niini. ³ Musa den gbegi nuanli; ki sua ku Tugangou yeni kuli den co fantama, ama ki naa sia. ⁴ Li Miali Diedo den laa ke o jadi ki baa diidi ki le lan tie yaala. U Tienu den yini o ku tugangu yeni niini, ki yedi: Musa! Musa! o goa ki yedi: Mini nne. ⁵ U Tienu den yedi o: ŋan da nagini na kanba, pidi ki ñani a cacaadi, kelima ŋan se nani yeni tie tingagidi kaaga. ⁶ O go den pugini ki yedi o: N tie ŋa ba yaa tienu, Abalahama Tienu, Isaka Tienu, leni Jakobo Tienu. lan wani Musa den ŋoagini o nunga, kelima o den jie ki da nuanli U Tienu. ⁷ Li Miali Diedo den yedi: N laa N nuba yaaba n ye Ejibiti n ye leni yaa fala, N go gbani bi bubula yaabi n wangidibi fala nuu nni, kelima N bani bi loma. ⁸ N jiidi ki baa cua ki faabi ba Ejibiti yaaba nuu nni, ki gnanba yaa diema n tie nne niini, ban gedi yaa diema mani ki go yaba, mi naaŋanma leni ti siadi n wuli naani,kanana yaaba leni Heta yaaba, leni Amola yaaba, Felesa yaaba leni Jebusa yaaba n ye yaa diema nni. ⁹ Diidi n nuba bubula pundi hali n kani, N go laa Ejibiti yaaba n wangidiba yaa fala. ¹⁰ Moala gedi, N ba soani ŋa Falona kani, ŋan gnani N nuba, Isalele yaaba Ejibiti nni. ¹¹ Musa den yedi U Tienu : n tie ŋme yo ke n baa fidi ki gedi Falona kani, ki teni Isalele yaaba n ña Ejibiti nni. ¹² U Tienu den yedi: N baa ye leni ŋa; lani n baa tua yaa maalima n baa wani ke mini n soani ŋa. a yaa ti ñani N nuba Ejibiti nni yi baa tuuni U Tienu po li naa juali yuli po. ¹³ Musa den yedi U Tienu: lan wani n ba gedi Isalele yaaba po, ki yedi ba: I yajaanba Tienu soani nni yi kani.ama bi yaa buali nni O yi lede? n baa guanba be? ¹⁴ U Tienu den yedi Musa: N TIE MIN TIE YUA. O go den pugini ki yedi o: a baa yedi Isalele yaaba yene: yua n yi "N YE" n soani nni yi kani. ¹⁵ U Tienu go den yedi Musa: a go baa maadi leni Isalele yaaba ki yediba yaa maama n tie nne: Li Miali Diedo i yajaanba Tienu, Abalahama Tienu, Isaka Tienu, leni Jakobo Tienu n soani nni i kani. N yeli yeni yaa yogunu n tu yaa yogunu, N yeli n yeni nufiima ki tu nufiima. ¹⁶ Gedi ki ban taani Isalele yaaba nikpela ki yedi ba: Li Miali Diedo, i yajaanba Tienu den doagidi n po, wani yua n tie Abalahama tienu, Isaka Tienu, leni Jakobo Tienu. O den yedi : N nua yi, ki go nua ban tiendi yi yaala Ejibiti nni. ¹⁷ Ke N yedi: N baa ñani yi Ejibiti nni, nani kani ke yi laadi fala ki teni yin ban kua Kanana yaaba, Heta yaaba, Amola yaaba, Elesa yaaba, Hefa yaaba, leni Jebusa yaaba yaa diema nni, mi naaŋanma leni ti siadi n wuli naani. ¹⁸ Bi baa cengi ŋa maama; lan wani a baa gedi, fini leni Isalele yaaba nikpela, Ejibiti bado kani ki yedi o: Li Miali Diedo, Ebulu yaaba Tienu, den doagidi ti po. pati u sanu tin cuoni dana ta cenli mi Fanpienma nni, ki ban padi Li Miali Diedo ti Tienu po a pada. ¹⁹ N bani ke Ejibiti bado kan cedi yin gedi, li yaa tie leni N paaciamu. ²⁰ N baa tanti N Nuu ki pua Ejibiti leni mi banciama buoli kuli, min baa tieni yaama bi diema nni. li yaa puoli o baa cedi yin gedi. ²¹ N baa teni ban baa li ŋanbili Ejibiti yaaba kani, maama ke i kan fii leni nikuomi. ²² Pua kuli baa mia o kuantalieba leni o yieninlieba ŋanjilifa leni wula tiadi, leni yaa tiadi ke yi baa yiendi yi bila. yene ke yi baa faa Ejibiti yaaba.