¹ Lanwani Musa leni Isalelenba den yiini yaa yanbu n tie ne Li Miali Diedo po: N baa yiini ki pagi Li Miali Diedo. O koani mi jama ki paadi! O luni i taami leni yaaba n jagi ba kuli mi gnincianma nni. ² Li Miali Diedo tie n gbamanu leni min baa pagi yua! Wani n faabi nni! O tie n Tienu ! N baa yiini! O tie n baa ya Tienu, n baa yiini ki pagi o yabinu! ³ Li Miali Diedo tie jakoandiciamo. O yeli yi Li Miali Diedo. ⁴ O luni Ejipiti bado toatieba leni Bi tandanba kuli mi gnincianma nni. O jakoandiciama baa mi gnincianmoanma nni. ⁵ Bi mili mi gnincianma siiga nani a tana yeni, ke a gninguona milini ba. ⁶ Li Miali Diedo, a najienu pia u paalu, Li Miali Diedo, a najienu mudi a yibalinba cain! ⁷ A kpiagiciandi yaba! a guli a yibalinba, a cedi ke a pabienli buoni a yibalinba nani ti muadi yeni. ⁸ A piebi leni u paalu bebe mi gnima dogini miba. Mi gnima den dogini ki se nani Li guonli yeni. A gninguona den juagi mi gnima siiga. ⁹ Ti yibalinba den tua: Tin hoadi ba ki deli ki nandi ba ki paadi ba ki boagidi ki fagidi hali ki guo. N baa gnoadi n jugisiega ki bvolini ba. ¹⁰ Ama fini O Diedo a den piebi a fuoma, leni a fuoma po, mi gnincianma den milini ba. ¹¹ O Diedo hma n naani leni à i buli kuli siiga? Hme n naani leni fini yua n gagidi ki hani kaa pia lie? Li pundi ban jie ha ki go pagi fini. ¹² A den tandi à nijienu ke ki tinba nali ba. ¹³ Kelima à hanbili yaapo, à den gobidi ki go faabi Bi naa niba, a gedini ba kelima a paaciamu po ke ban teli a yekaanu yu n gagidi ki hani po. ¹⁴ Yaa nibuoli n lindi gbadi laa bonla ki dogini. Ti jawaanciandi cuo Filisiti yaaba. ¹⁵ Edomi ya badiba ye leni ni jeje, mi digibima cuo Moabi jakoanda kuli, Kanana yaaba kuli jigi cie. ¹⁶ I jeje leni ti jawaanciandi cuo ba. A buagu paalu teni ke Bi tua muula nani Li tanli yeni, Bi kan fidi ki Tienu liba kuli hali a niba n ban pendi, han faabi ya niba yeni. ¹⁷ A baa gobidi ki gedini ba à juali yuli po ban baan kali naani ki je li daali. Han den hanbi yaa kaanu ke li baa tua a deni yeni. A nii n den hanbi yaa kaangagidihamu po. ¹⁸ Li Miali Diedo baa kaa ti gbandi ki die hali yaa yogunu kuli. ¹⁹ Falono taami leni O toateliti leni O tandanba n den kua mi gnincianma, Li Miali Diedo den teni ke mi gnincianma gnima milini ba. Ama Isalelenba den cuoni mi gnincianma siiga ke Bi taana kuoni. ²⁰ Miliyama Alono ciamo yua n den tie sawalipualo den ta ki longa ki kubi ga o nu nni. Bi puoba kuli den hoa o puoli ki moko kubi mu lonmu ki jeli ki ciaga. ²¹ Miliyama den gaani Isalelenba po Bi hani ki tua: Yiini mani Li Miali Diedo po kelima o den doagidi O kpiagidi. o den luni o taamo leni yua n jagi o mi gnincianma nni ²² Musa den teni ke Isalelenba fii ki gnani mi gnincianmoanma kani. Bi den teli sula yaa fanpienma nni. Ban den cuoni dana taa ya cenli banlu mi fanpienma nni, baa go den laa gnima. ²³ Bi den pundi Mala, ama baa den fidi ki gnuni Mala gnima kelima mi den to. Li tie lani yaapo yo ke Bi den yini laa kaanu Mala. ²⁴ Bi niba den yenbidi Musa po ki tua: Ti baa gno be? Musa den kpaani ki mia Li Miali Diedo todima. ²⁵ Li Miali Diedo den waani daagu ba ke Musa den luni gu mi gnima nni. Mi den tua gninhanma. Lankane ke Li Miali Diedo den puni bi niba Li balimaama leni a gnoabona ki biigi ba. ²⁶ O den yedi: Yi y cengi Li Miali Diedo yi Tienu maama bonhanla , yi ya tiendi yaala ntiegi O nintuali, yi ya diadi yi tuba ki cengi O balimaama ki go Tienu O mbilikaama kuli, n kan pua yi leni min den pua Ejipiti yaaba leni ya yiani kuli. Kelima n tie Li Miali Diedo yua n paagidi yi. ²⁷ Bi den pundi Elima, naankani n den pia piiga n gninbuna lie leni kpakpatiidi piilele. Bi den jiidi ki kali likani ki guu mi gnima.