¹ Li Miali Diedo den maadi leni Musa ki yedi o: ² " Maadi leni Isalele yaaba ke ban magidi nintuali, Migidole leni mi ñincianma siiga, naankani n teli Baali-Tisifoni. Li tie laa kaanu yaa nintuali ke yi ba jiidi ki ya ku mi ñincianma. ³ Falono ba maadi Isalele yaaba ki yedi: 'Bi yaadi mi diema nni ke mi fanpienma nni bolini ba.' ⁴ N baa teni Falono pali n juagi wan fii ki hoadi ke o baa cuoba, ama Falono leni o minteela baa teni o yeli n ba ti piagidi. Ejipiti yaaba baa bandi ke n tie Li Miali Diedo. Isalele yaaba den tieni yeni. ⁵ Bei den waani Ejipiti bado ke Isalele yaaba sani. Lanyogunu Falono leni o naacenba den lebidi be yama bi po ki yedi: "Ti tieni be mo yeni ki cedi ke Isalele yaaba gedi ki kan go yaa tuuni ti tuana?" ⁶ Falono den teni ke bi cuani o teliku ki taa o niba ke bi yega. ⁷ o den taa Ejipiti telite kobiluobaa yaadi n hani ki cie yaadi n siena. A minteela den kua niba taa taa boyengu kuli nni. ⁸ Li Miali Diedo den teni ke Ejipiti bado Falono pali juagi ke o den deli ki bua ki cuo Isalele yaaba. Isalele bila den ñani mi diema nni ki cuoni ki gaani. ⁹ Ejipiti yaaba ki bua ki cuo ba, Falono teliti leni o taami leni o tandanba leni o minteela kuli den nandi ba ya yogunu ke bi jiidi mi ñincianma kani, naankani n tiegi Pi-Hahiloti ki ye Baali-Tisefoni nintuali. ¹⁰ Falono den nagini. Isalele yaaba den gbegidi ki laa, ke Ejipiti yaaba hua bi puoli, ti jawaandi den cuo Isalele yaaba ke bi buudi ki yii Li Miali Diedo. ¹¹ Bi den yedi: " Musa naani a sua ke kakula ki den ye Ejipiti diema nne ke a cuani ti ke tin kpe mi fanpienma nni? ¹² A soani ti bee ya tuonli mo n yeni ki teni ke ti ñani Ejipiti nni? Tii den tuodi ki maadi a ki yedi a: 'Cedi tin ya tie Ejipiti' yaaba yonbi, ke li cie tin baa kpe mi fanpienmi nni?" ¹³ Musa den goa ki yedi: "Yin da jie mani liba kuli. Sedi mani yi ba laa Li Miali Diedo n baa faabi maama dinla, kelima Ejipiti yaaba ke yi nua ba dinla yeni, yi kan go laba hali abada. ¹⁴ Li Miali Diedo n ba koani ki ga yi, yinba wani n sedi mani suoo" ¹⁵ Li Miali Diedo den yedi Musa: "Bee ya po ke a kpaani ki miadi n todima? Maadi leni Isalele yaaba ke ban fii ki ya cuoni. ¹⁶ Fini yugidi a gbianu, tandi a nuu mi ñincianma po ki teni man boagadi. Isalele yaaba ba kua mi ñincianma siiga ke bi taana kuoni. ¹⁷ M mo ba teni Ejipiti yaaba pala n juagi, ban hoadi mi ñima nni. Falono leni o minteela , o teliti leni o tandanba baa n teni n piagidi n gedi foagima. ¹⁸ Ejipiti yaaba baa bandi ke n tie Li Miali Diedo, Falono leni o teliti o tandanba n baa teni n kpiagidi n doagidi ya yogunu." l ¹⁹ U Tienu ya maleki yua n yen ye Isalele yaaba goli liiga den lebidi ki guani bi puoli po. Ku tawaligu yaagu n den ye bi liiga, den lebidi ki guani puoli po. ²⁰ Ku den se Ejipiti yaaba goli siiga leni Isalele yaaba ya goli siiga. Li den biigi bine po ki yieni bine po. Laa ñiagu kuli a golieda yeni naa den nagini a yaa. ²¹ Musa den tandi o nuu mi ñincianma po. Li Miali Diedo den teni ke ku tafaaciangu ñani puoli po ki tudi mi ñincianma, ku den figi boncianla laa ñiagu kuli. ku den teni ke mi ñincianma paadi ke siiga nni kuodi . ²² Isalele yaaba den poandi mi ñincianma siiga nni ke bi taana kuoni. Mi ñincianma den tua nani a guona bi jienu leni bi ganu kuli po. ²³ Ejipiti yaaba den deli ki bua cuo ba. Falono taami, o teliti leni o tandanba kuli den kua Isalele yaaba puoli po mi ñincianma siiga. ²⁴ U yenu den pudi ya yogunu, Li Miali Diedo den ye ku tawaligu nni leni mi Fantama ya tawaligu nni ki nua Ejipiti yaaba goli. O den teni ke Ejipiti yaaba goli lengidi boncianla. ²⁵ O den teni ke bi teliti taana ñana ke bi cenli paagi bi po hali boncianla. Lani yaa po Ejipiti yaaba den yedi: " Tin sani ki foagidi leni Isalele yaaba kelima Li Miali Diedo koani bi po ki yie Ejipiti yaaba po." ²⁶ Li Miali Diedo den yedi Musa: "Tandi a nuu mi ñincianma po, mi ñima ba goani Ejipiti yaaba po, bi teliti leni bi tandanba po kuli." ²⁷ Musa den tandi o nuu mi ñincianma po. lani den bua ki faa mi ñincianma go den guani leni u paaciamu ke Ejipiti yaaba den sani kelima mi den bua ki nandi ba. Ama Li Miali Diedo den teni ke Ejipiti yaaba baa mi ñincianma siiga. ²⁸ Mi ñima den guani ki milini ti teliti, bi tandanba leni Falono yaa minteela kuli yaaba n den kua mi ñima nni ki hoadi Isalele yaaba. ba niyendo naa den ñani lieni. ²⁹ Isalele yaaba den cuoni mi ñincianma siiga ke bi taana kuoni mi ñincianma siiga nni ke mi ñima den fii nani a guona yeni bi jienu leni bi ganu po. ³⁰ Laa daali Li Miali Diedo den faabi Isalele yaaba Ejipiti yaaba nuu nni. Isalele yaaba den laa Ejipiti yaaba yaaba n den kpe ke bi bili mi ñincianma boanjaali po. ³¹ Isalele yaaba den laa Li Miali Diedo den pua Ejipiti yaaba o nuu yu n pia u paaciamu maama. bi niba den jie Li Miali Diedo, leni o naacemo Musa.