¹ Li Miali Diedo den maadi leni Musa ki yedi o: ² "Gagidi n po bonjakpiaga n tu bonjakpiaga kuli Isalele yaaba bila siiga leni ti yandi siiga kuli kelima mini n dieba." Musa den yedi bi niba: "Ya tiadi mani li naa daali po, ya daali ke yi ñani Ejipiti ti yonbidi nni." ³ Musa den yedi bi niba:"Ya tiadi mani li naa daali po, ya daali ke yi ñani ti yonbidi kaanu Ejipiti diema nni. Li tie leni o nuu paalu ke Li Miali Diedo ñani mi Diema nni. landaali oba kuli n da ŋmani ya dupen n pia li dabinli. ⁴ Yi ñani dinla ti kpaandi n be yaa yogunu. ⁵ Li Miali Diedo ya teni ke yi kua Kanana, Heta, Amola, Hefa leni Jebusa diema nni, wan den poli yi baanba po ke o baa pa yi ya diema, mi nahanma leni ti siadi n dua naani, yin ya tiendi mi naa jaanma binli kuli, ya ŋmaalo yene ya niinni. ⁶ Yi baa ya di ya dupen n ki pia dabinli hali danaalele, li danleleeli daali ba yaa tie jaanma Li Miali Diedo piagidi po. ⁷ Daali kuli yi ba yaa di ya dupen n ki pia dabinli hali danaalele, yi da pia yi diedi nni ya dupen n pia dabinli ba waamu. ban da la dabinli yi diema nni. ⁸ Landaali, a ba yedi a bijua: 'Li tie Li Miali Diedo n den tieni po yaala, min den ñani Ejipiti diema nni ya yogunu, ya tiadime.' ⁹ Li ba tua po nani mi maalima a nuu po, ki tua a yutunli po tiadima. Yeni Li Miali Diedo bali maama baa yaa ye a ñoabu nni, kelima leni o nuu paalu yo, ke o den teni ke yi ñani Ejipiti nni. ¹⁰ Binli kuli li yogunu ya pundi a ba kuani laa ñoabona kuli. ¹¹ Li Miali Diedo yaa teni ke a kua kanana yaaba diema nni yaa yogunu, nani wan den poli fini leni a baanba po maama ke o go puni a ma, ¹² a ba gagidi ki cuani bonjakpiaga kuli Li Miali Diedo po,ba han pia ya yandi bontonkpiamu kuli Li Miali Diedo n die. ¹³ A ba taa ki pebiga ki daa ki faabi o hunbo bontonkpia. A yaa da ki faabi o, a ba mudi o yukpanjuoga. A ba daa ki faabi bi niba bonjakpiala kuli a bijaba siiga. ¹⁴ A bijua ya buali a ya daali: 'Line mo bundi be?' A ba guani ki yedi o: 'Li Miali Diedo den teni ke be ñani ti yobidin kaanu, Ejipiti diema nni leni o nuu ya paalu. ¹⁵ Nani Falona n den yie ke o kan tuo tin gedi, Li Miali Diedo den teni ke Ejipiti diema bonjakpiala kuli kpe, ki cili bi niba bonjakpiala, ki ban taani leni ti yandi bontonkpiamu. Li tie lani yaa po yo, ke n padi Li Miali Diedo po, ti yandi bontonkpiamu,ki nan daa ki faabi n bi jaba bonjakpiala.' ¹⁶ Li ba ya tie nani mi maalima a nuu po, ki go ya nani leni mi tiadima tila a yutunli po. Li tie o nuu yu n pia u paalu po yo, ke Li Miali Diedo den teni ke ti ñani Ejipiti diema nni." ¹⁷ Falono den cedi ke ku niligu ñani, U Tienu naa den teni ke bi tagini Filisiti yaaba diema nni, ba ke lankani n den kuu ki cie. U Tienu den yedi:" Bi niba ba fidi ki le bu toabu ki jie sani ki guani Ejipiti diema nni." ¹⁸ Ama U Tienu den teni ke ku niligu lagadi ki tagani mi fanpienma po ya sanu, ki hodi mi ñincianmoanma po. Isalele yaaba den ñani Ejipiti diema nni ki bogini bu toabu po. ¹⁹ Musa den taa Josefi kpaba, kelima Josefi den teni ke Isalele bi jaba poli . O den yedi ba: "U Tienu ya ti goandi yi ya yogunu,yin ñani n kpaba nakanba." ²⁰ Bi den fii Sukoti ki jiidi Etami , naani n ye mifanpiema juodima. Li Miali Diedo wani o ba n den ye bi liiga. O yen ye ku tawaligu nni u ²¹ yensiinu, ki gobidi ba bi sanu nni.Ku ñiagu, o yen ye mi fantama yaa tawaligu nni, ki yendi bi po ke ban ya cuoni ku ñiagu leni u yensiinu kuli. ²² Yensiinu kuli ku tawaligu yen yiini bi po, ñiagu mo kuli ku tawaligu yen yendi bi po.