¹ 1 Li miali Diedo den yedi Musa : "N baa teni o falabiadi-juodkoa n cua Falono po leni Ejipiti yaaba po . Lani yaa pendi, o baa cedi yin ña nekanba. Wan baa cedi yin ña yaa yogunu, o baa deli yi . ² Maadi bi niba ke joa kuli mia o yieninlielo, pua kuli mo mia o yieninlielo ban paba halinjifa leni wula tiadi." ³ Li miali Diedo den teni ke Ejipiti yaaba pala mangi leni Isalele yaaba, hali yaala ke Musa wani o ba den tie niciamo Ejipiti yaaba nuni po. Falono naacenba leni bi niba kuli den fangi o, ki go kpiagidi . ⁴ Musa den yedi : "Li miali Diedo maadi ya maama n tiene: 'Li ya ban pundi ku yagisiigu n baa ña ki kua Ejipiti diema nni kuli. ⁵ Ejipiti diema nni a bonjakpiala kuli baa kpe. Ki cili Falono yua n kaa ti gbandi po yaa bijakpelo, ki yaa ca hali yaa potuado n ye li naali nni ya bijakpelo, ki taani leni ti yandi bontonkpiamu kuli baa kpe. ⁶ A bubula baa yaa ye Ejipiti diema nni kuli bocianla, hali maama ke li buolu daa kpa ki go faa ki tieni mo. ⁷ Ama Isalele yaaba siiga, cili leni bi niba ki gedi hali yandi, baa sangbanlo kan gogi. Lani n baa teni yin bandi Li miali Diedo n tieni yaa gagidima Ejipiti yaaba leni Isalele yaaba siiga.' ⁸ Lanyogunu, a naacenba yaaba n ye ne kuli, bi baa cua n kani ki labini n nintuali ki yedi: "Gedi, fini leni yaa niba n hua apuoli kuli . Lani ya pendi, n baa gedi ." Musa den ñani Falono kani ke o pali beni hali boncianla. ⁹ Li miali diedo den yedi Musa: "Falono kan cengi a maama ba." ¹⁰ Musa leni Alono den tieni lani kuli Falono nintuali ama Falono naa den tuo ke Isalele yaaba n ña o diema nni.