¹ Li miali Diedo den yedi Musa : ''Gedi Falono kani , kelima mini den teni ke o pali juagi, ke o naacenba moko yaa pala juagi, kelima n den bua ki teni n sinankeeninba n doagidi bi siiga. ² Li tie ke n go bua a moko n faa ki togidi a bijua leni a yaabili, min den tieni Ejipiti yaaba yaala leni min den doagidi bi siiga ya sinankeeninba. Yeni, yi baa bandi ke n tie Li miali Diedo.'' ³ 3 Musa leni Alono den gedi Falonokani ki yedi o " Li miali Diedo Ebilu yaaba T ienu yedi: A baa yaa yiedi ke a kan miini a yuli n tuali ki pundi u laa yogune ? Cedi n niba n gedi ki kpiagini. ⁴ A ya yie ke n niba kan gedi, n baa teni a dodoba cua saala ki yadi a diema nni kuli . ⁵ Bi baa hoagini u tingbani kuli, hali ke nilo kan go le tinga. Bi baa ŋmani yaala n sieni kuli , atatana den ha yi po yaala. Bi baa ŋmani yaa tiidi n pudi yi kuani kuli nni . Bi baa gbieni a diedi, ki gbieni anaacenba diedi leni gbieni Ejipiti yaaba kuli diedi. ⁶ Hali a baanba leni a yaajanba n mali , ki taa ki pundi hali dinla, bi daa kpa la, laa bonla buolu." Musa den ñani Falono kani ki ban caa. ⁷ Falono naacenba den yedi o: "O naa joa baa yaa tie ti po nani ku diagu ki pundi hali u laa yogune ? Cedi laa niba n gedi ki kpiagi Li miali Diedo, bi Tienu . Haa nua ke Ejipiti diema baa bodi ? " ⁸ Bi den teni ke Musa leni Alono guani Falono kani. O den yedi ba : " Gedi mani ki kpiagi Li miali Diedo yi Tienu . ŋmenba n tie yaaba n ba gedi ? " ⁹ Musa den guani ki yedi : " Ti baa gedi leni ti nikpela , ti bila , ti bijaba leni ti bisiaba kuli . Ti go baa taa ti pe leni ti ne, kelima li tie ti po ya badu n baa kpiagi Li miali Diedo." ¹⁰ Falono den yedi : " To, n baa cedi yin gedi yinba leni yi bila. De yin nan bandi ke yi lingi yaala n bia yi yula po. O den pugini ki yedi ba , yeni ka ! ¹¹ Yinba bijaba bebe n gedi ki ban kpiagi Li miali Diedo, kelima yin den mia yaala kuli n yeni. " Bi deliba Falono nintuali . ¹² Li miali Diedo den yedi Musa: "Tandi a nuu Ejipiti diema po , ke adodoba n cua ki yadi Ejipiti diema nni kuli. Ban ŋmani yaala n pudi ki tinga nni kuli , atatana den haa yaala kuli . " ¹³ Musa den tandi o gbienu yeni Ejipiti diema po Li miali Diedo den teni ke ku tafaaligu ñani puoli po, ki figi mi diema po landaali leni laa ñiagu kuli . Ku tafaaligu yeni den cuani adodoba yeni ke li daa fa. ¹⁴ Adodoba den yadi Ejipiti diema nni kuli , ki baa Ejipiti tinfanma kuli nni. Bi den yaba hali boncianla, ke bi daa den kpa laa, laa bonla buolu , ki kan go le mo hali abada. Den hoagini u tingbanu kuli , ki tinga den biigi kelima bi po . ¹⁵ Bi den ŋmani ki tinga bonpudikaala leni yi tiidi bonluonkaala kuli, atatana. Ejipiti diema nni kuli , bonsoangilaba naa den sieni yi tiidi po, ki bagi yi kuani nni. ¹⁶ Falono den yini Musa leni Alono tontoni ki yedi ba: "N tieni ti tuonbiadi Li miali Diedo yi Tienu po leni yi moko yaapo. Moala han tieni n tuonbiadi po sugili, n kan go lienla. ¹⁷ Mia Li miali Diedo yi Tienu n tieni po sugili. Mia o ke o wan gbeni n po o naa falaciamo yua n kpendi nni mi kuuma ." ¹⁸ Musa den ñani Falono kani ki jaandi Li miali Diedo. ¹⁹ Li miali Diedo den teni ke ku tafaciangu ñani nintuali po , ki taa adodoba kuli ki gedi nni ki luni ba mi ñincianmoanma nni . Baa dodobiyenli naa den sieni Ejipiti diema nni. ²⁰ Ama Diedo go den teni ke Falono pali juagi ke o yie ke Isalele yaaba kan gedi. ²¹ Li miali Diedo den yedi Musa : " Yugidi a nuu tanpoli , ke li biigili n yaa ye Ejipiti diema nni hali maama ke nilo baa fidi ki siili." ²² Musa den yugidi o nuu tanpoli , ke yaa biigilib n kpiagiboncianla den ye Ejipiti diema nni kuli, hali danata. ²³ O ba naa den nua o yua. O bakuli naa den fidi ki fii o kaanu hali laa dantaada kuli . Ama mi yenma den ye Isalele yaaba n den ye yaa kaani nni kuli. ²⁴ Falono den yini Musa yedi o "Gedi mani ki ban kpiagi Li miali Diedo . Yi pe leni yi ne bebe n baa sieni , yi bila baa fidi ki yegi leni yi." ²⁵ Musa den guani ki yedi o: "A baa teni ti fini a ba tin baa kubi yaala ki padi apada leni apadijuukaana, tin baa pa yaala Li miali Diedo po . ²⁶ Ti yangola kuli baa yegi leni ti. Li kan sieni baa tawogiyenli kelima ti baa ñani bani yaa siige ki pa Li miali Diedo ti Tienu. Ti yaa pundi li kani ti kan bandi tin baa gandi yaala ki pa Li miali Diedo. ²⁷ Li miali Diedo go den teni ke Falono pali juagi ke waa den tuo ban gedi . ²⁸ Falono den yedi Musa: " Ña n kani , fangi a yuli ki da go cua n kani, kelima a ya go cua n nintuali ya daali a baa kpe." ²⁹ Musa den guani ki yedi o: "To, fini n yedi la, n kan go cua a kani."