¹ O pobado leni Hamana go den yegi ki gedi o pobado Esita n go den hanbi bipo ya jaanjiema po. ² Bi gediliema daali, ban den ñu duven ya yogunu, o bado go den yedi Esita: Esita a miabu tie be ? Li ya tie baa n diema boagidima a baa ba. ³ O pobado Esita den goa ki yedi o: Fini pali ya mani npo han gaa n miali ki teni nni, lani n tie n miabu. Han go faabi n nibuolu, lani n tie min bua yaala. ⁴ Kelima bi kuadi mini leni n nibuolu yeni, ki baa kodi ti ki bolini ti cain. Li ya bi tie ke bi kuadi ti ke tin tua yonbi, n bi baa ya hmini, ama lan tie maama yeni, ti yibali kan fidi ki hanbi wan biidi fini o bado po yaala. ⁵ O bado Asuelusi den yedi o pobado Esita: Yua n jagi ke o baa tieni laa bonla tie hme ? O ye le ? ⁶ Esita den goa ki yedi o: Ti yibalo, yua n wangi ti fala tie Hamana, ya nibiado n tie na. Ti jawaanciandi den cuo Hamana o bado leni o pobado Esits nintuali. ⁷ O bado pali den beni boncianla ke o fii ki ñani mi jaanjiema kani ki gedi o diegu sadinga nni, ama Hamana den baa ki ka, kaa bua ki mia sugili o pobado Esita wan ciadi o, kelima o den la ke o bado jagi ke o baa kpa o. ⁸ O bado n den ñani o diegu sadinga nni ki guani mi jaanjiema kani, o den ke Hamana nagini ki baa Esita n ye ya duanu po, ki yedi o: Naani o joa ne go bua ki bibi o pobado n diegu nni, n nintuali mo ? O bado n den maadi yeni bi den pini Hamana nunga li cabili. ⁹ Ya moagilimu n den ye leni o bado siiga nni yendo, ban yi yua Halibona den yedi o bado: Diidi ki le Hamana den bogini ku daagu Malidoke po, wan yua ya maama n den faabi o bado miali. Ku daagu caa Hamana diegu nni, ke ku foagimu pundi nukpanduna piimu. O bado den yedi: Ban ban joani Hamana ku daagu yeni po ki soadi o. ¹⁰ Lani bi den joani Hamana wan den bogini ya daagu Malidoke po yeni, ki soadi o. Li ya puoli o bado pali den kuugi.