¹ Laa daali liga, o bado Asuelusi den puni o pobado Esita yibalo Hamana diegu. Esita den waani o bado wani leni Malidoke n kpi maama. Lanwani o bado den teni bi yini Malidoke ke o cua okani. ² O bado den pidi o ñoagibili wan yaali Hamana kani, ki teni Malidoke . Esita mo den teni ke Malidoke diedi Hamana diegu. ³ Esita go den gedi o bado kani ki maadi leni o. O den gbaani o bado taana kani ki buudi, ki mia o ke wan da tuo ke Agagi buolu yua Hamana n yaa ya biadima ki bili ke o baa bolini jufinba yeni n tieni. ⁴ O bado den tandi o badigbianu yu n tie wula Esita po, ke o fii ki sedi o nintuali, ⁵ ki yedi o: Fini o bado ya laa ke li hani ki dagidi, a ya baa tuo npo, a pali ya mani npo, han ñani a ñoabonli ban diani li tili ki yie Hamana n den jagi ki diani ya tila yaa po. Wani Hamana, Agagi buolu yua Hamedata bijua den jagi ki diani a tila ke ban bolini ya Jufinba n ye a diema nni kuli. ⁶ Kelima n baa ga lede ki ya nua ya janda n baa cua n niba po, n baa ga lede ki ya nua ban baa bolini n buolu maama ? ⁷ O bado Asuelusi den yedi o pobado Esita leni Malidoke yua Jufi: Diidi ki le, n puni Esita Hamana diegu, min den teni ke bi joani yua ku daagu po ki soadi o kelima o den tandi o nuu ki bua ki bolini Jufinba. ⁸ Moala yin diani yin sua maama, yaala n baa todi Jufinba, lan ya tie nani mini o bado n diani yeni, ki poabini poabini, ki taa n ñoagima ki tieni mi maalima, kelima ban diani ya tili nani li tie mini n diani yeni kuli, ki taa n maalima ki tieni kuli, li kan lebidi. ⁹ Laa yogunu, ya hmaalo n yi Sifana ki tie citaa piilie n dantaali daali, bi den yini o bado tidianla ke bi diani Malidoke n yedi ba yaala kuli. Bi den diani ki soani Jufinba po, leni bi yudancianba leni a koanbala leni a baditiebila yaaba n die mi diema kobiga n piile n diebileleeda, ki cili puoli po, Indu diema ki ya caa hali Etiopi diema nintuali.Bi den diani ki soani ki soani diebiga kuli po nani ban dangi laa diebiga nni maama, leni ya nibuolu n ye ki niinni n maadi maama. ¹⁰ Bi den diani ke li tie nani o bado Asuelusi n diani yeni, ki poabini poabini ki ta o bado ñoagima ki tieni mi maalima. Bi den soani laa tila leni ya tonda n jagi i taami leni yaaba n jagi i buomi. ¹¹ A tila yeni niinni, o bado den puni Jufinba u sanu, ban ye ya dogi kuli nni ban taani leni biyaba ki moandi ki gaa bi yula, ki kpa, ki bolini yaaba n baa taa toatiadi ki bua ki kpa ba kuli. Ban tie ya nibuolu leni ya ñani ya diebiga kuli, ban bolini bani leni bi bila leni bi puoba ki go faa bi piama. ¹² Li go den diani ke likuli n tieni danyenli Asueluis diema kuli nni, lani n tie piiga cita yua n yi Adadi, ya piiga n dantaali daali. ¹³ A tila yeni den pia o bado ñoabonli ban baa kpaani yaali diebiga kuli nni. ¹⁴ Lanyogunu a tonda den jagini i taami leni i buomi ki fii ki gedi tonma nani o bado n den bili maama. Bi den kpaani li ñoabonli yeni u dociamu Suse nni moko. ¹⁵ Malidoke den ñani o bado deni ki laa ya badiliadili n hmadi li bonpienla leni suudi, ki goli ya kpalibu n luni leni len ya gaali leni ti kpiagidi. ¹⁶ O bado bali maama leni o ñoabonli yeni ¹⁷ n den pundi ya diebiga leni ya dociamu kuli nni Jufinba leni li pamancianli ki tieni mi jaanma leni mi jaanjiema. Ya nibuoli n den ye mi diema nni siiga, bi niba boncianla den lebidi ki tua Jufinba kelima bi den jie Jufinba boncianla.