¹ Laa ñiagu o bado ki den fidi ki guani. O den teni bi cuani okani bi badiba jama tila ban diani ya yaa nii nni mi diema togida, ki teni ke bi cogi opo. ² Bi den cogi Bigitani leni Selesi, yaaba n den tie o bado moagilimu ki guu bu buliñoajabu , n den jagi ke bi baa kpa wani o bado Asuelusi maama ke Malidoke doagidi ki waani bi janbi. ³ Lane wani o bado den yedi: Malidoke den baa ya gagidima leni be ya kpiagidi lipo ? O bado naacenba yedi: Waa den baa liba kuli. ⁴ Lanwani o bado den yedi; hme n ye u luolu nni ? Li den sua ke lanyogunu liga Hamana pundi ki kua u luolu nni ki bua ki mia o bado wan teni ban joani ⁵ Malidoke wan caani opo ya daagu yeni po ki soadi o. ⁶ Lanwani o bado naacenba den goa ki yedi ke Gamana n ye u luolu nni o den yedi ke wan kua. ⁷ Hamana den kua ke o bado yedi o: Mini o bado ya bua ki kpiagi o nilo, n baa tieni o lede. ⁸ Hamana den kpaagi line: o bado baa ya bua ki kpiagi hme li ya ki tie mini yaaka? Lani o den goa ki yedi o bado: ⁹ Fini o bado ya bua ki kpiagi o nilo, ban taa han laa baditiadi leni han jagi ya taamo ke o yili li bali tannungayeni, ki teni a paatieba yudanba siiga nni yendo ti tiadi o taamo yeni wan boboni han bua ki kpiagi yua yeni, ki jagini o a taamo ki ya dia ki goadi u dogu fanfangu nni, ki kpaani o liiga ki tua: Line n tie ban baa tiendi maama o bado n bua ki kpiagi yua. ¹⁰ O bado den yedi Hamana: "Jaligi ki taa ti tiadi leni o taamo ki tieni Malidoke yua n tie Jufi po nani han yedi maama, wani yua n tuuni n diegu buliñoabu kani. Han tieni likuli ki da poadi liba." ¹¹ Hamana den taa ti tiadi ki bobini Malidoke ki teni ke o jagini o taamo ke o dia o ki goadi u dogu fanfangu nni ki kpaani o liiga ki tua line: Line n tie ban baa tieni o bado n bua ki kpiagi yua maama. ¹² Lani yaa puoli Malidoke den goa ki cua o bado diegu buliñoabu kani ke ¹³ Hamana mo jaligi ki kuni o denpo, ki liibi o yuli leni bu kpalibu kelima o paboanli po. O den o pua seleyi leni o danlinba kuli yaala n den tieni o kuli. O tundikaaba o pua Seleyi den yedi o: Han cili ki wadi Malidoke yua ya nintuali yeni o ya tie Jufi buolu a kan fidi ki tieni o liba, a baa suagi liiga ki ya wadi hali ki ban tua fanma. ¹⁴ Ban da den maadi leni o ya yogunu, o bado moagilimu den cua ki gedini o tonma Esita n go den hanbi ya jaanjiema po.