¹ Lidantaali daali Esita den bobi o pobaditiadi ki kua o bado luolu nni ki gedi wani o bado diegu nintuali. O bado den kaa o badidieli nni o bali kalikaanu po, ke o nunga tiegi bu buliñoabu. ² Wan den laa o pobado ke o se o luolu nni ya yogunu, o pali den mangi boncianla ke o tandi opo wan muubi ya badigbianu. Esita den nagini o kani ki sii o badigbianu yeni joma. ³ O bado den yedi o: Esita be yia ha ? A bua be ? N baa a ya bua n diema boagidima n baa pa ha. ⁴ Esita den goa ki yedi o: Li ya tie ke fini o bado laa ke li hani, gan cua dinla, fini Hamana kuli min hanbi yipo ya jaanjiema. ⁵ O bado den tuo Esita miabu ki soani tontoni ke bi ban yini Hamana. O bado leni Hamana kuli den gedi ki baan je Esita n hanbi ya jaanjiema. ⁶ Ban den ñu duven, o bado den yedi Esita: A miabu tie be ? A bua be ? Baa li ya tie n diema boagidima a baa baa. ⁷ Esita den goa ki yedi o: Min bua yaala leni min mia yaala tie line: ⁸ Fini o bado pali ya mani leni nni ke a baa guani npo n miabu leni min bua yaala, fini leni Hamana n go cua min baa hanbi yipo ya jaanjiema saala. Lanwani saala n baa guani a mi maguankaama nani han yedi maama. ⁹ Lan daali Hamana den ñani o pobado kani ke o pali mani boncianla. Ama wan den laa Malidoke o bado diegu buliñoabu kani ke waa fii ki sedi ki digibi o nintuali leni i jeje, o pali den beni Malidoke po boncianla. ¹⁰ Ama baa yeni o den fidi ki ñi o pali ki ban kuni. Lanwani o den soani bi yini o danlinba leni o pua, yua n yi Seleyi. ¹¹ Hamana den waani ba o piama n yaba maama leni o bijaba n pundi maama leni o bado n puni o ya kpiagiciandi ki teni ke o cie o bado koanbala leni o naacenba maama kuli. ¹² O go den yedi: Yaala n cie likuli tie ke o pobado Esita den yini mini bebe leni o bado ke ti gedi ki ban dini wan den hanbi ya jaanjiema. O go yini nni saala ke mini leni o bado n cua okani. ¹³ Ama lankuli naa tie npo liba, n ya nua ke Malidoke Jufi yua yeni ke o baa tuuni o bado diegu buliñoabu kani. ¹⁴ O pua Seleyi leni o danlinba kuli den yedi o ya maama n tie ne: Han teni ban caani ya dafoagidigu n pundi nukpanduna piimu ke saala ku tasoangu han mia o bado wan teni ban joani Malidoke ki soadi o ku daagu yeni po, lani ya pendi han yegi leni o bado ki gedi mi jaanjiema po ke a pali mani. Laa maama den mangi Hamana ke o den teni ke bi caani ku daagu.