¹ O Diedo den maadi yeniMoyiisi, Mowabi tiali nni, yii n kuuli Jurden kpenu, ki tiegi yeni Jeriko yeni, ki yedi, ² " Waani Israyeli yaaba, ke ban teni Lefi buolu yaaba ban ba ga ya tinfanma nni yeni. Li buali ke yin teni ba ya dogi ke bi baa ye lienni, yeni i yankpaakaani yii n kaagi li dogi. ³ Lefi buolu yaaba ba baa li dogi i, ki ya kua i niinni. I yankpaakaani baa tie bi yankuli yeni biyandi kuli po i. ⁴ Yin ba teni ba ya yankpaakaani yeni u dogu bilinguonli kani baa tie nuukpanduna tudli i (1.000), i kaani kuli. ⁵ I ba bigni nuukpanduna tuda lie (2.000), ki cili u dogu niinpo, puoli po, nuukpanduna tuda lie (2.000), nintuali po, nuukpanduna tuda lie (2.000), niganu po, yeni, nuukpanduna tuda lie (2.000), nijienu po. Lanya fanfanma n baa tie bi yankpaakaani, i dociami nni. I dociami baa ye siigs nni i. ⁶ Yin ba teni Lefi buolu yaaba ya dogi nni, dogi luoba baa tie wuonkaani i. I ba bobni li dogi, li ya tie ke yua n kpaa nilo, o ba fidi ki sani ki wuoni li dogi nni. Yin go bobni piina n dogi lie (42), ki pugni. ⁷ Yi ba teni Lefi yaaba ya dogi ba taani ki ya tie piina n dogi niin i ( 48). I ba teni ba li dogi yeni i yankpaakaani i. ⁸ Ya buolu n yabi, ki pia ya tinfanma n yabi, ba teni Lefi yaaba ya dogi n yabi. Y dogi n waa, ke bi tinfanma mo waa, bi ba teni Lefi yaaba, ya dogi n waa. Buolu kuli ba teni Lefi buolu yaaba mi tinfanma, nani wun baa ya tinbiinu ń dɔa maama i." ⁹ O Diedo den yuandi ki maadi yeni Moyiisi, ki yedi, ¹⁰ Maadi yeni Israyeli nitaanli, ki yedi ba, 'I ya puodi Jurden kpenu, ki kua Kanana diama nni, ¹¹ Yin gandi ya dogi n baa tie wuonkaani iyapo, ya dogi nni, ke nilo ya kpaa o nisaallielo, ke laa tie o yanbuama, wan sani ki gedi ki wuoni li dogi nni. ¹² Li dogi n baa tie yin ba sani ki wuoni naankani, ban da nandi yi, ki tuu o kpiemo po li panli. Lanwani ii, yua kpaa nilo, bi kan kpa o, ki tuu panli, ki dá ki jia o, ti buudi li nitaanli nintuali. ¹³ Li buali ke yin gandi dogi luoba i, yin ya tie wuonkani dogi. ¹⁴ Li buali ke yin gandi dogi taa (3), Jurden kpenpuoli, ki go gandi dogi taa (3), Kanana diema nni, yin tua wuonkaani dogi. ¹⁵ Li wuonkaani dogi baa tie yinba Israyeli yaaba po, bi nilanba yaaba n ye yeni yi po, lanyaaka ya niba n li kua yeni yi, mi diema nni kuli, yua n kpaa nilo, ke laa tie o yanbuama, o ba fidi ki sani ki wuon li dogi nni. ¹⁶ Ama, yua n tugi tagli, kelima o janbi nilo yeni kudi jatiagu, ke o kpe, ban jalgi yua yeni li tie nikpalo i. Li buali ke ban kpa o. ¹⁷ Yua n mubni tanli, ki pua bii ki lugdi nilo, ki bua kpa o, li nilo ya kpe, lanwani ii, yua n tugi i tagli yeni, li tie nikpalo i. Li buali ke ban kpa o. ¹⁸ Yua n pua nilo yeni daagu jatiagu, ki jagi ke wan kpa o, li nilo ya kpe, lanwani ii, yua n tugi i tagli yeni, li tie nikpalo i. Li buali ke ban kpa o. ¹⁹ Lan buali ke yua ń tuu o kpiemo panli, ba kpa o nikpalo, ki tuu li panli. O ya cendi o naani kuli, o ba fidi ki kpa o, ki tuu o kpiemo panli. ²⁰ Yua n pua nilo yeni yibalma, bii nanga, lanyaaka o ya lugdi o bonli, bii o ya tudi ki luni o, bii, ki ñii o yeni ti jadi, ke li nilo kpe, ²¹ bii o ya pua ki guli o, yeni ki nanga, ke li nilo kpe, li buali ke ban kpa yua n pua yeni, kelima, o tie nikpalo i. Yua n ba tuu o kpiemo panli yeni ya kadi yeni o naani, o ba fidi ki kpa o. ²² Ama, bi ya jalgi nilo, kelima, o pua o nisaalilielo, ke laa tie yibalma po, bii nanga po; ki naa bi jagi ke wan kpa o, ²³ Lanyaaka, o ya lugdi tanli, kaa nua o, ke li cuo o, ke o kpe, lanwani ii, yua n tugi i tagli yeni, ki tie o kpiemo yibali ka, o bi ki lingi biadma ka o kpiemo po. Li ya tie ke li nilo kpe, li maama ń ba cuoni maama n ne. ²⁴ Lanya maama ya baa, li nitaanli ń ba tɔgni ya sanbila, ki jia yua n tugi i tagli yeni yua n ba tuu o kpiemo panli yeni siiga n ne. ²⁵ Li nitaanli ba ga o nikpalo, yua n ba tuu o kpiemo panli nuu nni. Li nitaanli ba todi o nikpalo, lebdi ki gedi wan bi sani ki gedi ya wuonkaanu dogu nni yeni. O baa ye li dogu nni i, hali li kani salga yidkaciamo, ban den sɔgi yua mi kpagagdiŋanma yeni ya ti kpe. ²⁶ Ama, o nikpalo ya ñani wan sani ki wuoni ya dogu nni yeni, niinpo, ²⁷ Li ya tie ke o pantuudaano kadi yeni o, o wuonkaanu dogu niinpo, o ya kpa o, o kan tugi o kuuma tagli. ²⁸ Li buali ke o nikpalo ń ya ye wan sani ki wuoni ya dogu nni i, hali likani salga yidkaciamo ya ti kpe. Li wuonkaanu dogu nni salga yidkaciamo kuuma puoli po, o nikpalo ji ba fidi ki guani ki kuni o denpo. ²⁹ Ya yikodi ne ń tua ipo maabikaama, nifiima ń tuu nifiima kuli, yin ba kua ki kali naani kuli. ³⁰ Yua n kpaa nilo, li buali ke ban kpa omo i, ama, li buali kasiedinba ń tieni kasiedi yo, wan tugi i tagli. Kasiedi yendo baba ya po, ki dagdi ke ban tugni nilo kuuma tagli. Li buali ke kasiedinba ń ya yabi, ki fidi ki tuni nikpalo mi kuuma tagli, ki fidi ki kpa o. ³¹ Yaali n pugdi, li ki buali, ke nilo n tuo ki ga suuli, ki tieni tofaama kasiedi, ki faabi nikpalo, li buali ke ban kpa o i. ³² Li ki buali ke yin tuo ki ga suuli, ki cabi nikpalo wan sani ki gedi wuonkaanu dogu nni. I go kan ga suuli, ki cabi yua n ye wuonkaanu dogu nni, wan guani o denpo, ke salga yidkaciamo da ki kpe. ³³ Da tuo mani suuli, ki ti jɔgni yin ba kua ki kali ya diema nni, kelima bi ya wuli nilo sɔma, tugtongu, li jɔgindi mi diema. Sugliba kuli ki ye yua n wuli nilo sɔma mi diema nni, tugtongu po, kase ban wuli o nikpalo mo ya sɔma. ³⁴ Lanwani ii, yin da jɔgni yin baa ye ya diema nni, kelima, Mini O Diedo mo ye mi niinni. Mini O Diedo ye Israyeli yaaba siiga nni.'"