¹ Josefi puolŋuani, Manase yaabili, Maciri bijua, Galaadi cugli yudanba, den cua ki maadi Moyiisi yeni Israyeli buoli yuadanba nintuali, ki yedi, ² "O Diedo den bili fini ti daano, li ñɔbonli, ke ŋan tɔa tiatia, ki bɔgdi Israyeli buoli i tinbiini. O Diedo go den bili li ñɔbonli, ke ŋan taa ti kpelo, Selofehadi tinbiinu faali, ki teni o bisiaba. ³ Ama, o bisiaba ya kuni jaba, nibuolami nni, ke yii taa yeni Israyeli ya buoli, lanwani ii, bi tinbiini ba wadi ti buolu nni, ki gedi ki pugni ban kuni ya nibuoli nni ya piama po ka aa. Ti diidi ki sua ke li ba wadi ti buolu faali n yeni. ⁴ Li ya tieni yeni, ke bina piimu jaanma, mi daafaabima po pendi, li buali ke li tinbiinu ń gedi ki taani ban kuni ya nibuoli ya piama po i. Lanwani ii, bi tinbiinu ba wadi ti buolu piama nni, ki gedi ki pugni nibuoltoe ya piama po i." ⁵ Moyiisi den waani Israyeli yaaba, O Diedo ń bili ya ñɔbona, ki yedi, "Josefi buolu puolŋuani ń maadi ya maama ne tie mɔni i. ⁶ Lani n cedi ke O Diedo bili ya ñɔbonli ne, ke li nua Selofehadi bisiaba. O yedi, 'Yin cedi ban kuni ban faadi ya jaba, ama, bi ba kuni bi buolu, bi cugli nni ya jaba i.' ⁷ Israyeli buoli biinu kan kandi, u buolu, ki gedi buoltou po. Israyeli buolu kuli ba bandi wun ba tieni maama, ki ya muubi u danba faali u buolu nni bonŋanla. ⁸ Israyeli nitaanli nni, ya pua n pia faali biinu kuli, li buali ke wan guani ki kuni o baadiegu cugli nni ya ja i. Lan ba tieni maama, buolu kuli ń fidi ki diedi o danba faali. ⁹ Biinu kan ña buolu bii cugli faali nni, ki puodi ki gedi buoltou nni. Li buali ke Israyeli buolu kuli ń ŋanbi ki kubi u danba faali bonŋanla i." ¹⁰ Lanwani ii, Selofehadi bisiaba den tieni nani O Diedo ń den bili Moyiisi a ñɔbona maama yeni i. ¹¹ Lanwani ii, Selofehadi bisiaba, Mahila, Tirisa, Hogila, Milika, yeni Nowa den kuni Manase buolu puolŋuani siiga nni i. ¹² Bi den kuni Josefi bijua, Manase buolu puolŋuani cugli nni i. Ban den tieni maama ke bi faali sedi bi baadiegu cugli nni, ki tie bi piama n yeni. ¹³ O Diedo ń den bili Moyiisi, ya ñɔmaama yeni ya ñɔbona, Mowabi tiali nni, Jurden kpenkunu, Jeriko diema nni, ke o waani Israyeli yaaba n yeni.