¹ O Diedo den maadi yeni Moyiisi, ki yedi, ² "Bili Israyeli yaaba po ya ñɔbona ne, ki yedi ba, 'I ya ban kua Kanana diema nni, ya diema n ba tua i yaama nni, yin bandi li diema tinbiani, ³ Mi diema ganu po bianu ba tandi ki cili Sini fanpienma, ki ban gedi ki balini Edomi diema bianu. Puoli po bianu ba balini mi ñinyaama mɔgli ganu po jaali i. ⁴ U bianu ba pegdi ki teli ganu po, ki cili Akrabimi, ki balini Sini fanpienma. U ba tandi lankani, ki gedi Kadici Barineya ganu po, ki pendi kigedi Hasari Adari, ki suagi ki gedi Asimoni. ⁵ U bianu go ba pegdi Asimoni, ki teli Ejipti kpenu, ki ŋɔdi yeni, hali yeni ku mgciangu. ⁶ Nintuali po bianu baa tie ku mɔgciangu jaali. I diema bianu, nintuali po n yeni. ⁷ U jienu po bianu ba ŋɔdi juudi, ki cili ku mɔgciangu, ki ban tuoni Hori juali. ⁸ U ya ñani Hori juali, un suagi, ki gedi Lebo Amati, ki suagi, ki gedi Sedadi. ⁹ U bianu ba tandi ki gedi Sifroni, ki ban kpaa Hasari Enani. I diema jienu po bianu n yeni. ¹⁰ Puoli po bianu ba cili Hasari Enani ganu po, ki ban tuoni Cefami. ¹¹ Puoli pobianu ba tɔgni, ki jiidi, ki cili Cefami, ki gedi Ribila, Ayini puoli po. U bianu ba suagi ki gedi Cinereti ñincianma puoli. ¹² U bianu ba suagi ki gedi ganu po, ki balini Jurden kpenu, ki ban tuoni mi ñinyaama mɔgli, ki suagi liiga, ki jiidi ki ban tuoni puoli po mi ñinyaama mɔgli. I diema yeni mi biani kuli, yii n cebni ki lindi ma n yeni.'" ¹³ Lanwani ii, Moyiisi den waani Israyeli yaaba li ñɔbona, ki yedi ba, "Yin ba tɔa tiatia, ki bɔgdi ya diema tinbiini faali n yeni, O Diedo ń den niani ke o ba puni buoli yian yeni buolu bɔgdima ya diema n yeni. ¹⁴ Rubeni buolu puolŋuani, ki ŋɔdi bi cuga ń dɔa maama, yeni bi tinbiini, yeni Gaadi buolu puolŋuani, ki ŋɔdi bi cuga ń dɔa maama yeni bi tinbiini, yeni Manase buolu bɔgdima yeni bi cuga wani ga bi tinbiini faali o. ¹⁵ Lani buoli lie yeni buolu bɔgdima ga bi ya tinbiini, Jurden kpenpuoli, Jeriko puoli po kpenjaali po i." ¹⁶ O Diedo den maadi yeni Moyiisi, ki yedi, ¹⁷ "Ya jaba n ba bɔgdi mi diema tinbiini faali n ne: Salga yidkaciamo, Eleyasari, yeni Nuni bijua, Josuwe. ¹⁸ Li buali ke yin gandi yudanyendo, buolu kuli nni, ban bɔgdi mi diema tinbiini bi buoli po. ¹⁹ Li jaba yela n ne: Juda buolu puolŋuani siiga, o yudaano tie, Jefune bijua, Kalebi i. ²⁰ Simeyɔn buolu puolŋuani siiga, o yudaano tie, Amihudi bijua, Cemuyeli i. ²¹ Benjamina buolu puolŋuani siiga, o yudaano tie, Cisiloni bijua, Elidadi i. ²² Dani buolu puolŋuani siiga, o yudaano tie, Yogili bijua, Buki i. ²³ Josefi buolu puolŋuani siiga, Manase cugli nni ya puolŋuani siiga, o yudaano tie, Efodi bijua, Haniyeli i. ²⁴ Efrayima buolu puolŋuani siiga, o yudaano tie, Cifitani bijua, Kemuyeli i. ²⁵ Sebuloni buolu puolŋuani siiga, o yudaano tie, Parinaki bijua, Elisafani i. ²⁶ Isakari buolu puolŋuani siiga, o yudaano tie Asani bijua, Palitiyeli i. ²⁷ Aceri buolu puolŋuani siiga, o yudaano tie, Celomi bujua, Ahihudi i. ²⁸ Nafitali buolu puolŋuani siiga, o yudaano tie, Amihudi bijua, Pedaheli i." ²⁹ O Diedo den puogi lanya jaba i, ke ban bɔgdi Kanana diema tinfanma, ki teni buolu kuli yeni o tinbiinu.