¹ Rubeni buolu yeni Gaadi buolu puolŋuani den pia i yankuli boncianla. Bi den diidi ki sua ke Yaseri diema yeni Galaadi diema tie ya kaanu n ŋani ti yandi po. ² Lanwani ii, Rubeni buolu yeni Gaadi buolu puolŋuani den cua ki la Moyiisi, salga yidkaciamo, Eleyasari yeni i buoli yudanba, ki maadi yeni ba, ki yedi, ³ Diidi mani ya dogi ne: Ataroti, Diboni, Yaseri, Nimira, Hecebɔn, Eleyale, Sabemi, Nabo yeni Bewoni. ⁴ O Diedo ń todi Israyeli yaaba ke bi paadi, ki diedi ya diema yeni ya dogi n yeni, li dogu tie ya kaani n ŋani ti yandi po. Tinba, a naacenba mo nan pia i yankuli boncianla." ⁵ Bi den yedi, "A ya bi tuo a naacenba po, ŋan bi teni ti, ti tinbiini nekanba ki diedi ma a bi ba ŋa tinba, tin ya ye nekanba, ki da puodi Jurden kpenu." ⁶ Moyiisi den jiini Rubeni buolu yeni Gaadi buolu puolŋuani, ki yedi ba, "I kpiiba ba gedi bu tɔbu, ki ŋa yinba, yin kali ne ee? ⁷ Be cedi ke i lingi ke yin wadi i kpiiba, Israyeli yaaba pala, ban da suagi ki gedi O Diedo ń puni ba ya diema nni ii? ⁸ I baanba den tieni yeni i, min den sɔni ba, ke bi ñani Kadeci Barineya, ki ban gɔndi mi diema. ⁹ Bi den gedi ki ban doni hali Ecikoli jualɔngu nni. Bi den la mi diema, ki guani ki wadi Israyeli yaaba pali, ke bi yie ke bi kan kua O Diedo ń den puni ba ya diema nni. ¹⁰ O Di pali den beni li daali. O den poli, ki yedi, ¹¹ 'Laa pia tama, ke ya jaba n ñani Ejipti diema nni ki cua nekanba, ki pia bina piilie, bii ki cie yeni kuli, obakuli kan kua min den poli ki niani i yaajanba, Abrahama, Isaka yeni Jakɔbo, ke n ba teni ba ya diema nni, kelima, baa ŋua N sani lan buali maama, lan ñani, ¹² Kenisi yua, Jefune bijua, Kalebi, yeni Nuni bijua Josuwe. Kalebi yeni Josuwe baba n ŋɔdi N sanu lan buali maama.' ¹³ Lanwani ii, O Diedo pabienli den jiidi Israyeli yaaba po. O den cedi ke bi tieni bina piina (40), ki waa mi fanpienma nni, hali ke ya nifiima n den tieni ti tuonbiadi yeni kuli bodi. ¹⁴ Diidi mani, yinba n ga i yaajanba kaanu, ki tua ti tuonbiadi benkpela, ki fiini O Diedo pabienli, Israyeli yaaba po, ki pugni. ¹⁵ I ya buli o i nunga, kaa ŋua o, O go ba ñɔli ki ŋa yi mi fanpienma nni ne, yinba li nitaanli ne kuli ń bodi." ¹⁶ Lanwani ii, bi den nagni Moyiisi kani, ki yedi, "Cabi ti tin maa a yandela, ti yankuli po, yeni a diena, ti diedi yaaba po. ¹⁷ Ama, tinba tiba ba jagi, ki taa ti tɔtiadi, ki ciani Israyeli tɔgola, ki todi ba, hali buolu kuli ń kali O Diedo ń puni wu ya tinbiinu nni. Ama, ti diedi nni yaaba wani baa ye ya dociami n pia a bilinguona nni i, naani ke mi diema nni yaaba kan nandi ba, ki tieni ba yaali n bia. ¹⁸ Ti kan guani ti diedi nni, hali yeni Israyeli buolu kuli n ban kali o tinbiinu faali nni. ¹⁹ Tinba ji ki pia tinbiinu faali yeni ba, Jurden kpenpuoli, kelima, tinba ya tinbiinu faali ye nekanba, Jurden kpenu puoli po i." ²⁰ Moyiisi den jiini ba, "Li ya tie ke i tieni, yin maadi yaali, i ya bobni i jatiadi, ki ba gedi bu tɔbu, O Diedo nintuali, ²¹ li buali ke i jakɔnda kuli ń puodi Jurden kpenu, O Diedo nintuali i, ki guudi wan kua liiga ki deli ki yaani o yibalinba, ²² hali yeni tin ban paadi, ki diedi mi diema, o nintuali, lani ya puoli, i ji ba fidi ki guani, i diedi nni. Yeni, i kan ya pia tagliba kuli O Diedo yeni Israyeli yaaba nintuali. I ji ba fidi ki kali, ki diedi mi diema ne, O Diedo nintuali. ²³ Ama, i ya ki tieni lan buali maama, yin bandi ke i tieni ti tuonbiadi ki fali O Diedo. Yin ya bani mo ke i ba tugi i tagli, ki pa li panli O Diedo nintuali. ²⁴ Maa mani a diena, i diedi nni yaaba po, ki tii a yandela, i yankuli po, ki yuandi ki tieni yin yedi maama yeni." ²⁵ Gaadi buolu yeni Rubeni buolu puolŋuani den yedi, "A naacenba ba tieni nani Fini, ti canbaa ń bili ti li ñɔbonli maama yeni i." ²⁶ Ti bila, ti puoba, ti naapagi yeni ti yankuli kuli baa ye nekanba i, Galaadi dociami nni. ²⁷ Ama, tinba a naacenba yaaba n bobni ti jatiadi kuli, ba puodi u kpenu, bu tɔbu po, O Diedo nintuali, nani ti daano ń yedi maama yeni." ²⁸ Lanwani ii, Moyiisi den teni salga yidkaciamo, Eleyasari yeni Nuni bijua, Josuwe, yeni Israyeli buoli yudanba a ñɔbona, ke a nua Gaadi buolu yeni Rubeni buolu puolŋuani po. ²⁹ Moyiisi den yedi ba, "Li ya tie ke Gaadi bulu yeni Rubeni buolu puolŋuani ya yegi yeni yi, ki puodi u kpenu yeni bi jatiadi, bu tɔbu po, O Diedo nintuali, ke i fidi ki paadi, ki diedi mi diema, lanwani ii, yin teni ba Galaadi diema, ban kali ki diedi ma. ³⁰ Ama, bi ya ki yegi yeni yi, ki puodi u kpenu, lanwani ii, bi ba lingi bi kuakaanu tinfanma Kanana diema nni, nani yinba yeni i." ³¹ Lanwani ii, Gaadi buolu yeni Rubeni buolu puolŋuani den jiini, ki yedi, "Nani O Diedo ń yedi maama yeni, tinba a naacenba ba tieni yeni i. ³² Ti ba puodi u kpenu yeni ti jatiadi, O Diedo nintuali, ki gedi Kanana diema nni, ama, ti tinbiinu faali baa ye ya Jurden kpenjaali ne po i." ³³ Lanwani ii, Moyiisi den teni Gaadi buolu yeni Rubeni buolu puolŋuani, yeni Josefi bijua, Manase buolu, bɔgdima, Amori badciamo Siyɔn dogjigu, yeni Bacani bado, Ogi dogi. O den teni ba mi diema, ki bɔgdi ba ya dogciami n lindi ba. ³⁴ Gaadi puolŋuani den guani, ki maa Dibɔn, Ataroti, Aroweri, ³⁵ Atroti, Cofani, Yaseri, Jogbeha, ³⁶ Beti Nimira, yeni Beti Harani, yii n den tie ya dociami n pia a bilinguona, ki go pia a yandela, i pee po. ³⁷ Rubeni buolu yaaba den guani ki maa Hecibɔn, Eleyale, Kiriyatayimi, ³⁸ Nabo, Baali Meyoni, yeni Sibima, bi den ti lebdi ban den guani ki maa ya dogi yela, ki teni yi yetɔla. ³⁹ Manase bijua, Maciri buolu puolŋuani den gedi Galaadi diema nni, ki baa ma, ki fie Amori niba, yaaba n den kua mi niinni. ⁴⁰ Moyiisi den yuandi ki teni Manase bijua, Maciri yeni o nitaanli, Galaadi diema, ke bi kua mi niinni. ⁴¹ Manase bijua, Yayiri den gedi ki pua ki fie mi dociami, ki yini yi Hafoti Yayiri. ⁴² Noba mo den gedi ki kɔni mi jama, ki fie Kenati dogu yeni u tinkundogi, ki lebdi ki yini li dogu, Noba, wani mono ya yeli.