¹ O Diedo den maadi yeni Moyiisi, ki yedi, ² "Gedi ki pua bu tɔbu, ki diedi Madiana yaaba, ki tuu ban tieni Israyeli yaaba yaali. A ya tieni lani ki gbeni, a ba kpe, ki ŋɔdi a yaajanba nitaanli." ³ Lanwani ii, Moyiisi den maadi yeni li nitaanli, ki yedi, "Bobni mani i tɔtieba bu tɔbu po, yin gedi ki tuogi Madiani yaaba bu tɔbu, ki baa ba, ki tuu O Di po li panli yeni ban tieni Israyeli yaaba yaali ya po. ⁴ Israyeli buoli siiga, buolu kuli ba bobni tɔtieba tudli (1.000) bu tɔbu po." ⁵ Lanwani ii, Israyeli buolu kuli den sɔni niba tudli, bu tɔbu po, ke bikuli taani tɔtieba piiga n tuda lie (12.000). ⁶ Moyiisi den sɔni li tɔtieba bu tɔbu, buolu kuli niba tudli yeni, ki yegni ba yeni salga yidkaciamo, Eleyasari bijua, Finehasi, ke o kubi u kaangagdiŋamu nni tiadi yaadi n gagdi ki ŋani O Diedo po, yeni ban piebi ya naatuna, ki wangi bu tɔbu. ⁷ Bi den gedi ki kɔni, ki paadi Madiani yaaba, nani O Diedo ń den puogi Moyiisi maama yeni. Bi den kpaa bi jaba kuli. ⁸ Bi den kpaa Madiani badtieba yeni bi kpaaga kuli, bani n tie: Efi, Rekemi, Suuri, Huuri, yeni Reba, Madiani badtieba bimu. Bi go den kpaa Bewori bijua Balaama yeni ki jugsiega. ⁹ Israyeli tɔtieba den cuo Madiani puoba yeni bi bila ti yonbdi, ki fagi bi naapagi, bi yankuli, yeni bi piama kuli. Bi den taa lankuli ke li tua bipo tiafagikaadi. ¹⁰ Bi den juu bi dociami kuli yeni bi jondi kuli. ¹¹ Bi den tugu ti tiafagikaadi kuli yeni i yonbi kuli, bi niba yeni ti yandi kuli. ¹² Bi den taani i yonbi, ti tiafagikaadi yeni ban fie ya piama kuli, ki waani Moyiisi yeni salga yidkaciamo Eleyasari yeni Israyeli nitaanli kuli. Bi den cua yeni lankuli Mowabi tiali nni, ti jondi kani, Jurden kpenjaali po, ke li tiegi yeni Jeriko dogu. ¹³ Moyiisi, salga yidkaciamo, Eleyasari yeni li nitaanli yudanba den ñani ki tuogi ba ti jondi niinpo. ¹⁴ Ama, Moyiisi pali den beni a tɔgola yudanba po, tudli tudli tɔtieba jakɔndcianba, yeni kobga kobga tɔtieba yudanba yaaba n den ñani bu tɔbu, ki kpeni po. ¹⁵ Moyiisi den yedi ba, "I ŋa bi puoba ke bi fo yo oo? ¹⁶ Diidi mani, Li puoba n den ga Balaama tunda, Pewori maama po, ki tulni Israyeli yaaba ke bi tieni ti tuonbiadi o Diedo po, lanyapo i, ke u yianbiadu den baa O Diedo nitaanli po. ¹⁷ Lanwani ii, yin kpa a bila siiga yaaba n tie bonjala, ki kpa ya puoba n bandi ja kuli. ¹⁸ Ama, yin ŋa ya jafanba n dá ki bandi ja kuli, ki ya kubi ba. ¹⁹ Yinba mo, yaaba n kpaa nilo kuli, yeni yaaba n sii nikpiema kuli, yin ña, ki ban ya ye ti jondi niinpo, hali dana lele. I ba ŋuudi ki ŋanbi i yula, li daataali daali yeni li daaleleli daali, yinba yeni i yonbi kuli. ²⁰ I ba ŋuudi ki ŋanbi ban tieni ya tiadi yeni yangbangu kuli, yeni ban lugi yaadi yeni ŋuakobdi yeni pakobdi kuli, yeni yaadi n tieni yeni daagu kuli." ²¹ Salga yidkaciamo Eleyasari den yedi bi tɔtieba, yaaba n ñani bu tɔbu, ki kpeni yeni kuli, "Ne tie ya maabilkaama ke O Diedo bili Moyiisi, ke wan waani yi i: ²² Yaali n tie wula, ŋanjilfa, ti kumɔndi, ti kubɔndi, ti nɔbindi yeni sinkaali, ²³ yeni ya tiadi n kan buodi mu nni kuli, yin tieni ti u mu nni, ŋuudi ki ŋanbi ti. Ya tiadi n sieni, ki ba fidi ki buodi u mu nni kuli, li buali ke yin ŋuudi ki ŋanbi ti yeni ti jɔgindi ñima i. ²⁴ Li buali ke yin ŋuudi i tiayiekaadi, li daaleleli daali, yeni i, ke i ba ŋuudi ki ŋanbi i yula. Lani ya pendi, i ji ba fidi ki kua ti jondi nni." ²⁵ O Diedo den yuandi ki maadi yeni Moyiisi, ki yedi, ²⁶ Fini, salga yidkaciamo, Eleyasari, yeni i buoli yudanba, yin cɔdi ban kpeni yeni ya tiafagikaadi kuli, yeni ya yonbi, yeni ya yandi. ²⁷ Yin bɔgdi lankuli kaani lie, ki taa kaanyendu, ki bɔgdi ya tɔtieba n den gedi bu tɔbu, yu n sieni mo, yin bɔgdi ya nitaanli n sieni. ²⁸ Yin ñani ya tɔtieba n den gedi bu tɔbu yeni, tiafagikaadi nni, ban ba pa nni ya lonpo. Li pani baa tie, biini kobimu siiga nni, biinyendu, lan tie niba bii , yandi; nee ee, ŋunbi ii, pee ee, bii ŋuabi ii. ²⁹ Yin taa li pani, ki teni salga yidkaciamo, Eleyasari, yin tua paabu Mini O Diedo nintuali. ³⁰ Ya bɔgdima n sieni, Israyeli yaaba mo ya po, i ba ñani biini piimu kuli nni, biinyendu, ban ba pa ya lonpo Mini O Diedo po. lan tie niba bii , yandi; nee ee, ŋunbi ii, pee ee, bii ŋuabi ii. ³¹ Yin taa li pani, ki teni Lefi buolu yaaba, yaaba n den guu li gbandieli." Lanwani ii, Moyiisi yeni salga yidkaciamo, Eleyasari, den tieni nani O Diedo ń den bili Moyiisi, li ñɔbonli maama yeni. ³² Bi tɔtieba ń den ñani bu tɔbu, ki kpeni yeni ya tiafagikaadi kuli den taani ki tie, pee, tuda kobiluoba n tuda pilele n tuda mu (675.000), ³³ i nee tuda piilele n tuda lie (72.000), ³⁴ i ŋunbi, tuda piiluoba n tudyenli (61.000), ³⁵ yeni ya puoba n dá ki bani ja, tuda piitaa n tuda lie (32.000) ³⁶ Bi tɔtieba ń den ga ya bɔgdima den tie: i pee tuda kobitaa n tuda piitaa n tuda lele (337.000). ³⁷ O Diedo ya biinu den tie, pee kobiluoba n piilele n pee mu (675). ³⁸ I nee den tie, tuda piitaa n tuda luoba (36.000), ke O Diedo biinu den tie, piilele n nee lie (72). ³⁹ I ŋunbi den tie, tuda piitaa n kobimu (30.500), ke O Diedo biinu tie, piiluoba n ŋunyendo (61). ⁴⁰ Bi niba den tie, ya puoba n dá ki bani ja, piiga n tuda luoba (16.000), ke O Diedo biinu tie, puoba piitaa n puoba lie (32). ⁴¹ Moyiisi den taa ya pani n tie O Diedo yii, ke bi ba cua yeni yii o nintuali, ki teni salga yidkaciamo, Eleyasari, nani O Diedo ń den waani Moyiisi maama yeni. ⁴² Moyiisi ń den ñani ti tiafagikaadi, bɔgdima ki teni ya tɔtieba n den gedi bu tɔbu, ⁴³ wan den sieni ya bɔgdima Israyeli nitaanli po den tie, i pee tuda kobitaa n tuda piitaa n tuda lele n kobimu (337.500), ⁴⁴ i nee tuda piitaa n tuda luoba (36.000), ⁴⁵ i ŋunbi, tuda piitaa n kobimu (30.500), ⁴⁶ yeni bi puoba piiga n tuda luoba (16.000). ⁴⁷ Israyeli nitaanli tiafagikaadi bɔgdima nni, Moyiisi den ñani, biini piimu nni kuli, biinyendu, O Diedo lonpo po, ti yandi yeni bi niba po kuli. O den taa O Diedo biini, ki teni Lefi yaaba, bani yaaba n den guu li gbandieli, nani O Diedo ń den bili o li ñɔbonli ke wan tieni maama yeni. ⁴⁸ Li den yuandi ke bi tɔtieba yudanba, lani n tie, tɔtieba tudli tudli gobdikaaba, yeni tɔtieba kobga kobga yudanba den cua Moyiisi kani. ⁴⁹ Bi den yedi o, "A naacenba cɔdi ban gobdi ya tɔtieba, baa luo bá tɔtieyendo bi tɔcaga nni. ⁵⁰ Ti cua yeni bu paabu O Diedo po. Ti taani jakɔndo kuli ń baa yaali, lani n tie, wula tiadi: a biana, mi nubiñɔgma, a tutuuda yeni i laani, ki bua puni O Diedo, ki mia sugli ti tuonbiadi po o nintuali." ⁵¹ Moyiisi yeni salga yidkaciamo Eleyasari den ga bikani ban duadi ya wula tiadi yeni mi tuonsɔnbanma yeni. ⁵² Ban den teni O Diedo ya wula tiadi, lani n tie tɔtieba tudli tudli gobdikaaba yeni tɔtieba kobga kobga yudanba ń den puni O Diedo ya paabu yeni, kpiagu kuli den taani ki tie, kilo kobga n piilele (Kg 170). ⁵³ Tɔtielo kuli den kubi o yuli po wan baa ya tiafagikaadi. ⁵⁴ Moyiisi yeni salga yidkaciamo, Eleyasari den ga tɔtieba tudli tudli gobdikaaba yeni tɔtieba kobga kobga yudanba kani bi paabu. Bi den taa bu ki kuani ki bili u kadkaanu gbandieli nni, ke bun tua tiadma Israyeli nitaanli kuli po yeni O Diedo po.