¹ Li binli ŋmaalelelo, o daacincinli, li buali ke yin tieni taancianli, ki jaandi, ki kpiagi O Diedo yeli. Li daali, i kan sɔni tuonliba kuli. Li daali ba tiadi yin den piebi a naatuna ya daali. ² I ba bobni bu paabu, a padjuukaana po, ki teni O Diedo u nuulmanu. I paabu baa tie: naatonpanga, patonli, yeni binyenli patonbila alele, li padyandi kuli ń da pia pɔdiba kuli. ³ I ba pugni padyanga po kuli, o jiema paabu, mi yoma yaama n nugi yeni mi kpama: kilo ayian, li naatonli po, ⁴ kilo a luoba, li patonli po, patonbilalele yeni mo, patonga kuli kilo ataa. ⁵ Li buali ke yin padi ŋuabuali mo, ki mia O Diedo nintuali i tuonbiadi sugli. ⁶ Li ŋmaalelelo ya pada ba pugni, ŋmaalo kuli daacincinli padli, yeni li paabu padjuukaana, yeni li jiema paabu. Lankuli ba pugni yin maani, ki tiendi daali kuli ya padjuukaana, yeni li jiema paabu yeni li ñincabli daama kuli. I ya bobni lanya paabu kuli, yin fangi i yula ki li padjuukaana nani lan buali maama, ki teni O Diedo ya nuulmanu n ba mangi o pali. ⁷ Li binli ŋmaalelelo, o danpiiga daali, li buali ke yin tieni taancianli, ki jaandi, ki kpiagi O Diedo yeli. Yin fangi i yula, ki da sɔni i touonceli li daali. ⁸ I ba bobni paabu, li padjuukaali po, lan teni O Diedo ya nuulmanu n ba mangi o pali. I paabu baa tie: naatonpanga, patonli, yeni binyenli patonbila alele, li padyandi kuli ń da pia pɔdiba kuli. ⁹ I ba pugni padyanga po kuli, o jiema paabu, mi yoma yaama n nugi yeni mi kpama: kilo ayian, li naatonli po, kilo a luoba, li patonli po, ¹⁰ patonbilalele yeni mo, patonga kuli, kilo ataa. ¹¹ I ba padi ŋuabuali mo, ki mia O Diedo nintuali i tuonbiadi sugli, ki pugni yognu kuli ya tuonbiadi sugli ya miabu, yin padi ya padjuukaana kuli, yeni li jiema paabu, yeni li ñincabli daama mo. ¹² Li binli ŋmaalelelo, o piiga n daamuuli daali, li buali ke yin tieni taancianli, ki jaandi, ki kpiagi O Diedo yeli. I kan sɔni i tuoncelu li daali, i ba jaani mi jaanma hali dana lele, ki kpiagi O Diedo yeli. ¹³ I ba bobni bu paabu, a padjuukaana po, ki teni O Diedo ya nuulmanu n ba mangi o pali. I ba padi piiga n naatonpana taa, patona lie, yeni binyenli patonbila piiga ana. Li padyandi kuli kan ya pia pɔdiba kuli. ¹⁴ I ba pugni li padyandi po, mi jiema paabu, ya yoma n nugi yeni mi kpama, piiga n naatona taa yeni, naatonli kuli yoma kilo ayia, ¹⁵ patona lie yeni mo, patonli po kuli kilo aluoba, patonbila piiga ana yeni mo ya po, patonga kuli po, kilo ataa. ¹⁶ I ba padi ŋuabuali mo, ki mia O Diedo i tuonbiadi sugli, ki pugni yin maani ki padi ya padjuukaana daali kuli, yeni li jiema paabu, yeni li ñincabli daama. ¹⁷ Mi jaanma dalieli daali, i ba padi naatonpana piiga alie, patona lie, yeni binyenli patonbila piiga ana, ya yandi n ki pia pɔdiba kuli. ¹⁸ I ba yegni ti padyandi yeni mi jiema paabu, yeni li ñincabli daama, nani lan buali maama, ke i maani ki bobindi a padjuukaana maama yeni. ¹⁹ I ba padi ŋuabuali, ki mia O Diedo i tuonbiadi sugli, ki pugni yin maani ki padi ya padjuukaana yeni li jiema paabu yeni li ñincabli daama yeni. ²⁰ Mi jaanma daataali daali, i ba padi naatona piiga n yenli, patona lie, yeni binyenli patonbila piiga ana, pɔdiba kuli ń da ye padyanga po. ²¹ I ba bobni a naatona, a patona yeni a patonbila kuli yeni a jiema paabu yeni a ñincabli daama i, nani yin maani ki tiendi a padjuukaana maama yeni. ²² I go ba padi ŋuabuali, ki mia O Diedo i tuonbiadi po sugli, lan pugni yin maani ki tiendi daali kuli ya padjuukaana po, yeni li jiema paabu yeni li ñincabli daama. ²³ Mi jaanma danaali daali, i ba padi naatona piiga, patona lie, yeni binyenli patonbila piiga ana, pɔdiba kuli ń da ye padyanga kuli po. ²⁴ I ba bobni a naatona, a patona yeni a patonbila kuli yeni a jiema paabu yeni a ñincabli daama i, nani yin maani ki tiendi a padjuukaana maama yeni. ²⁵ I go ba padi ŋuabuali, ki mia O Diedo i tuonbiadi po sugli, lan pugni yin maani ki tiendi daali kuli ya padjuukaana po, yeni li jiema paabu yeni li ñincabli daama. ²⁶ Mi jaanma daamuuli daali, i ba padi naatona yian, patona lie yeni binyenli patonbila piiga ana, ke pɔdiba kuli ki ye padiyanga po. ²⁷ I ba bobni a naatona, a patona yeni a patonbila kuli yeni a jiema paabu yeni a ñincabli daama i, nani yin maani ki tiendi a padjuukaana maama yeni. ²⁸ I go ba padi ŋuabuali, ki mia O Diedo i tuonbiadi po sugli, lan pugni yin maani ki tiendi daali kuli ya padjuukaana po, yeni li jiema paabu yeni li ñincabli daama. ²⁹ Mi jaanma daaluobli daali, i ba padi naatona niin, patona lie yeni binyeni patonbila piiga ana, ke pɔdi ki ye padiyanga kuli po. ³⁰ I ba bobni a naatona, a patona yeni a patonbila kuli yeni a jiema paabu yeni a ñincabli daama i, nani yin maani ki tiendi a padjuukaana maama yeni. ³¹ I go ba padi ŋuabuali, ki mia O Diedo i tuonbiadi po sugli, lan pugni yin maani ki tiendi daali kuli ya padjuukaana po, yeni li jiema paabu yeni li ñincabli daama. ³² Mi jaanma daaleleli daali, i ba padi naatona lele, patona lie yeni binyenili patonbila piiga ana, ke bá padyanga bakuli ki pia pɔdi. ³³ I ba bobni a naatona, a patona yeni a patonbila kuli yeni a jiema paabu yeni a ñincabli daama i, nani yin maani ki tiendi a padjuukaana maama yeni. ³⁴ I go ba padi ŋuabuali, ki mia O Diedo i tuonbiadi po sugli, lan pugni yin maani ki tiendi daali kuli ya padjuukaana po, yeni li jiema paabu yeni li ñincabli daama. ³⁵ Mi jaanma daniinli daali, li buali ke yin tieni taancianli, ki jaandi ki pugi O Diedo. I kan sɔni i tuoncelu li daali. ³⁶ I ba bobni bu paabu, a padjuukaana po, ki teni O Diedo ya nuulmanu n ba mangi o pali. I ba padi naatonyenli, patonyenli, yeni binyenli patonbila alele, ke pɔdi ki ye padyanga bakuli po. ³⁷ I ba bobni mi jiema paabu yeni li ñincabli daama, li naatonli po, li patonli po yeni a patonbila po nani lan buali maama, ke i maani ki tiendi a padjuukaana yeni. ³⁸ I ba padi ŋuabuali, i tuonbiadi sugli po, ki pugni yin maani ki bobindi daali kuli padjuukaana maama yeni, yeni li jiema paabu yeni li ñincabli daama. ³⁹ Yin ba bobni maama mi jaanma, ki pugi O Diedo, ki kpiagi o yekli n yeni. Yin bobni mi jaanma po ya paabu kuli, bu ba pugni, yin niani ya ñɔniani paabu, yeni i yanbuama paabu po i. I ba padi a padjuukaana, mi jiama paabu, yeni li ñincabli daama, ki pugni mi taanyenma salga." ⁴⁰ Moyiisi den yedi ba, ki waani Israyeli nitaanli kuli, O Diedo ń yedi o ke wan waani ba yaali kuli.