¹ O Diedo den maadi yeni Moyiisi, ki yedi, ² "Puogi Israyeli nitaanli, ki yedi ba, 'Li buali ke yin puni nni bu paabu, ki padi lan buali ya yognu, n paabu jiema tie ban juu yaama u mu nni, ke mi ba teni nni u nuulmanu i.' ³ ŋan go yedi ba, 'Ya paabu n dagdi yeni padjuukaali, ke i ba padi O Diedo po n ne: binyenli patonga, yaaga n ki pia pɔdi, daali kuli, alie; lani tie daali ń tuu daali ya padjuukaana n yeni. ⁴ I ba padi patonyenga ku siŋaagu nni, ki ti padi yaaga n tua ku yenjuogu. ⁵ I ba bobni mi jiema mo ya paabu, mi yoma kilo bona taa, ke mi nugi yeni mi kpama, liiryenli yeni bɔgdima. ⁶ Li tie daali ń tuu daali salga, O Diedo ń den puogi yi ya padili sinaayi juali po, ke i den maani ki yidi, ki padi, ki juugi ke li tieni O Diedo u nuulmanu yeni i. ⁷ Li ñincabli po, i ba bobni ku daamɔngu, liiryenli yeni bɔgdima, patonga kuli po. Li buali ke yin cabi u kaagagdiŋamu kani, mi daapaalma, O Diedo po. ⁸ Ya patonga n sieni mo ba padi ku yenjuogu, yeni mi jiema paabu, nani ku siŋaagu nni ya padli yeni. Mi daapaalma baa ye li ñincabli po, likuli ba taani ki tua padjuukaali, yaali n tieni O Diedo u nuulmanu. ⁹ Saba daali, mi fuodma daali, li buali ke yin padi binyenli patonmu bonmulie, yaamu n ki pia pɔdi yeni mi yoma, kilo bona luoba, ke bi nugi ma yeni mi kpama, ki pugni ku daamɔngu. ¹⁰ Ya padli ne tie Saba padjuukaali n yeni, ki pugni yin maani ki padi ya padjuukaana daali kuli yeni li ñincabli. ¹¹ Li binli nni, ŋmaalo kuli cilma, li buali ke yin padi O Diedo po li padjuukaali. Li padli buali naatonmu lie, patonyenli, yeni binyenli patonbimu lele, ya yandi n ki pia pɔdi. ¹² mi jiema paabu mo baa pugdi, ki tie mi yoma kilo bona yian, ke mi nugi yeni mi kpama, naatonga kuli po, li patonli padli baa pia mi yoma kilo bona luoba, ke mi nugi yeni mi kpama. ¹³ patonbiga kuli mo baa pia mi yoma kilo bona taa, ke mi nugiyeni m kpama. Lankuli n ba taani ki tua padjuukaali, yaali n ba teni O Diedo u nuulmanu. ¹⁴ Yin ba bobni yaali li ñincabli po, naatonli kuli baa pia ku daamɔngu, liira taa, li patonli baa pia liira lie, patonbiga kuli mo baa pia liiryenli yeni bɔgdima. Ne tie o ŋmaalo ya padjuukaali n yeni, ke i baa tie, li binli nni, ŋmaala kuli. ¹⁵ Li go buali ke yin padi ŋuabuali mo, ki mia O Diedo ti tuonbiadi po sugli, lan pugni yin maani ki padi daalikuli ya padjiikaana po. ¹⁶ Li binli ŋmaacincinli, o piiga n dana na, yin jaani mi pendima jaanma, ki kpiagi O Diedo yeli. ¹⁷ Li ŋmaalo piiga n daamuuli daali tie jaanma i. I ba tieni dana lele, ki ŋmani ya kpanu n ki tieni dabinli. ¹⁸ Li daacincinli daali, i ba tieni li taancianli, ki jaandi kikpiagi O Diedo yeli. I kan sɔni tuonliba kuli, li daali. ¹⁹ Ama i ba teni O Diedo bu paabu, li padjuukali po, i paabu baa tie naatonpana lie, patonyenli, yeni binyenli patonbimu alele, ke pɔdiba kuli ki ye li padyandi po. ²⁰ Yin ba pugni yaali bu paabu po tie, naatonli kuli baa pia mi yoma kilo bona yian, ke mi nugi yeni mi kpama, li patonli mo baa pia mi yoma kilo bona luoba, ke mi nugi yeni mi kpama. ²¹ Patonbila lele yeni mo, patonga kuli baa pia mi yoma kilo bona taa, ke mi nugi yeni mi kpama, ²² li ŋuabuali mo baa ye, yin padi li, ki mia O Diedo nintuali i tuonbiadi po sugli. ²³ I ba padi lankuli, ki pugni yin maani ki padi daali kuli ya padjuukaana po i. ²⁴ Nani lan dugni maama yeni, li buali ke mi pendima jaanma danleleda yeni, daali kuli li buali ke yin padi yeni i, li padjuukaana ń puni O Diedo ya nuulmanu n ba mangi o pali. Li padjuukaana ba pugni daali kuli padjuukaali po, yieni li ñincabli daama po. ²⁵ Li daaleleli daali, i go ba tieni taancianli, ki jaandi, ki kpiagi O Diedo yeli, i kan sɔni tuonliba kuli li daali mo. ²⁶ Ku jetaagu jaanma po, yin ba puni ODiedo ku kpaangu jiepaadi ya daali, li buali ke yin tieni taancianli, ki jaandi, ki kpiagi O Diedo, i kan sɔni tuonliba kuli li daali. ²⁷ Li buali ke yin teni bu paabu, li padjuukaali po, lan puni O Diedo ya nuulmanu n ba mangi o pali. I paabu baa tie, naatonpana lie, patonyenli, yeni binyenli patonbimu, alele, ke pɔdiba kuli ki ye li padyandi po. ²⁸ Mi jiema paabu mo baa ye, ki tie yoma, ke mi nugi yeni mi kpama. Naatonli kuli baa pia mi yoma kilo bona yian, ke mi nugi yeni mi kpama, li patonli baa pia yoma kilo bona luoba. ²⁹ Patonbila lele yeni mo, patonga kuli baa pia mi yoma kilo bona taa, ke mi nugi yeni mi kpama, ³⁰ Li ŋuabuali mo baa ye, yin padi li, ki mia O Diedo nintuali i tuonbiadi po sugli. ³¹ I ba padi lanya padyandi kuli, ke pɔdiba kuli ki ye bipo, ki pugni daali kuli ya padjuukaana po, yeni li ñincabli daama yeni mi jiema paabu kuli.'"