¹ Selofehadi bisiaba, Mahila, Nowa, Hogila, Milika, yeni Tirisa den cua Moyiisi kani. Josefi den mali Manase, ke omo mali Miciiri, ke omo mali Gileyadi, ke omo mali Heferi, ke Heferi mo mali Selofehadi. Wani ya bisiaba n den cua Moyiisi kani. ² Selofehadi bisiaba yeni den sedi Moyiisi, salga yidkaciamo, Eleyasari, bi yudanba, yeni li nitaanli kuli nintuali, u kadkaanu gbandieli bulñɔbu kani. Bi den yedi, ³ "Ti báa den kpe mi fanpienma nni i. O den ki ye Kore nicagli yaali n den fiini mi yenyiema O Diedo po yeni nni. O tuonbiacedi po i ke o den kpe, ama, o den ki pia bonjaga. ⁴ Li tieni ldi i, ke bi kan taa ti báa ya yeli o cugli yaaba siiga, kelima o den ki mali binjaga? Yin teni timo mi tinfanma ti báa kpiiba siiga." ⁵ Lanwani ii, Moyiisi den taa li maama ki gedi O Diedo nintuali. ⁶ O Diedo den maadi yeni Moyiisi, ki yedi, ⁷ "Selofehadi bisiaba maama tiegi. Li buali ke yin teni ba mi tinfanma, man tua bi faali bi báa kpiiba siiga nni, yin kpaagi ki diidi bi ya ga bi báa tinbiinu faali. ⁸ ŋan maadi yeni Israyeli nitaanli, ki yedi ba mine, 'Ja ya kpe, kaa pia bonjaga, lanwani ii, yin taa o faali ki teni o bisalo. ⁹ O kpiema yaa pia bonpuoga mo, yin taa o faali ki teni o ninjaba. ¹⁰ O ya ki pia ninjaba, yin taa o faali, ki teni o báa ninjaba. ¹¹ O báa ya den ki pia ninjaba, yin taa o faali ki teni wan ŋanbi ki kpii yeni yua bi cugli nni, lan tua o bonceli. Ne tie ya ñɔbonli ke Israyeli yaaba kuli ba cɔlni nani O Diedo ń bili Moyiisi o ñɔmaama maama yeni i.'" ¹² O Diedo den yedi Moyiisi, "Do Abarimi juali yuli po, ki diidi min puni Israyeli yaaba ya diema. ¹³ Ama a ya diidi li diema ki gbeni, amo ba ŋɔdi ki taani yeni a yaajanba nani a kpelo Haarɔn yeni. ¹⁴ Li ba tieni yeni, kelima, amo den ki cɔlni, ki kandi N ñɔmaama po Sini fanpienma nni. Lipo, mi ñima ń den ku tangu nni, ki puubi, a pabienli po, a den ki tiadi ki kpiagi N yeli yeni n gagdiŋanma li nitaanli nintuali." Mani n tie Meriba ñima, Kedeci dogu nni, Sini fanpienma nni. ¹⁵ Lanwani ii, Moyiisi den maadi yeni O Diedo, ki yedi, ¹⁶ "O Diedo, U Tienu yua n puni pia miali kuli yeni bi nisaalba kuli mi fuoma, gandi niyendo li nitaanli siiga, ¹⁷ ya nilo n baa gobdi a nitaanli, ki gaani bi liiga, ki ñangi ba ki gɔa ki kuandi ba, a nitaanli ń da tie nani ye yandi n ki pia kpankpaalo yeni." ¹⁸ O Diedo den yedi Moyiisi, "ŋan taa Nuni bijua Josuwe, o tie ya ja ke N foŋanma kua o yuli nni, ki ye yeni o, maani a nuu opo. ¹⁹ ŋan sieni o Eleyasarinyeni li nitaanli kuli nintuali, ki puogi o bi nunbu nni ke wan ya gobdi ba. ²⁰ ŋan bɔgdi a yudandi, ki teni o li nitaanli nintuali, bikuli ń taani ki tuo, ke bi baa ŋua o, ki cɔlni o maama. ²¹ O ba yi cua salga yidkaciamo, Eleyasari nintuali, wan buali Urimi, ki bandi yaali n tie N yanbuama. Wani yeni bi yudanba yeni li nitaanli kuli baa ŋua ki cɔlni Eleyasari ñɔbona. O ya yedi ke ban ña, ban ña; o ya yedi ke ban kua, ban kua." ²² Lanwani ii, Moyiisi den tieni nani O Diedo ń den waani o maama yeni. O den taa Josuwe, ki sieni o salga yidkaciamo Eleyasari yeni Israyeli nitaanli kuli siiga. ²³ O den maani o nuu opo, ki puogi o ke wan ya gobdi li nitaanli nani O Diedo ń bili o ñɔbonli, ke wan tieni maama yeni.