¹ U yianbiadpuodkou ń pendi, ODiedo den maadi yeni Moyiisi yeni Haarɔn bijua Eleyasari, salga yidkaciamo. O den yedi, ² "ŋan cɔdi Israyeli nitaanli kuli, yaaba n pia bina piilie, bii ki cie, yuakuli yeni o buolu nni yeni o cugli nni, yaaba n ba fidi ki gedi bu tɔbu, Israyeli yaaba po." ³ Lanwani ii, Moyiisi yeni, salga yidkaciamo, Eleyasari den maadi yeni li nitaanli, Mowabi tialu nni, Jurden kpenjaali po, Jeriko dogu nni, ki yedi, ⁴ Cɔdi mani li nitaanli niba yaaba n pia bina piilie, ki maani, nani O Diedo ń puogi Moyiisi yeni Israyeli yaaba yaaba n ñani Ejipti diema nni maama yeni." ⁵ Rubeni n den tie Israyeli bijakpelo. Ki cili o bijua Enɔki, yua n tie Enɔki cugli nni yaaba yaaja. Palu mo n tie Palu cugli nni yaaba yaaja. ⁶ Hesirɔn mo n tie Hsirɔn cugli nni yaaba yaaja. Karmi mo tie Karmi cugli nni yaaba yaaja. ⁷ Ban den cɔdi Rubeni puolŋuani yaaba den tie jaba tuda piina n tuda taa n kobilele n niba piitaa (43.730). ⁸ Eliyabi den tie Palu bijua i. ⁹ Eliyabi mo ya bijaba den tie, Nemuyeli, Datani, yeni Abirami. Bani Datani yeni Abirami n den ŋɔdi Kore, ke bi yie Moyiisi yeni Haarɔn po yeni, ki fiini mi yenyiema O Diedo po yeni. ¹⁰ Ki tinga den yaadi ki ñɔbu, ki nali bani yeni Kore, ke bi nicagli nni yaaba den kpe. Lanyognu i ke u mupienu den dini niba kobilie n piimu (250), ki jieni ya niba n sieni, ke ban fangi bi yula. ¹¹ Ama, Kore ya bijaba wani naa den kpe. ¹² Simeyɔn puolŋuani den tie: Ki cili Nemuyeli, yua n tie Nemuyeli cugli nni yaaba yaaja, Jamini mo n tie Jamini cugli nni yaaba yaaja, Jacini mo n tie Jacini cugli nni yaaba yaaja, ¹³ Sara mo n tie Sera cugli nni yaaba yaaja, Cawuli mo n tie Cawuli cugli nni yaaba yaaja ¹⁴ Ban den cɔdi Simeyɔn buolu yaaba n yeni, bi den tie jaba piilie n tuda lie n niba kobilie (22.200). ¹⁵ Gaadi buolu puolŋuani den tie: Ki cili Sefoni, yua n tie Sefoni cugli nni yaaba yaaja, Hagi mo tie Hagi cugli nni yaaba yaaja, Cuni mo tie Cuni cugli nni yaaba yaaja, ¹⁶ Osini mo tie Osini cugli nni yaaba yaaja, Eri mo tie Eri cugli nni yaaba yaaja, ¹⁷ Arodi mo tie Arodi cugli nni yaaba yaaja, Areli mo tie Areli cugli nni yaaba yaaja, ¹⁸ Ban den cɔdi Gaadi buolu puoŋuani yaaba n yeni. Bi den tie jaba tuda piina n kobimu (40.500). ¹⁹ Juda bijaba den tie Eri yeni Onani, ama, li jaba den kpe Kanana diema nni. ²⁰ Juda buolu nni, bi puolŋuani go den tie bine: Celahi den tie Celahi cugli nni yaaba yaaja, Peresi mo den tie Peresi cugli nni yaaba yaaja, Serahi mo n den tie Serahi cugli nni yaaba yaaja, ²¹ Peresi puolŋuani den tie: Hesirɔn den tie Hesirɔn cugli nni yaaba yaaja, Hamuli mo den tie Hamuli cugli nni yaaba yaaja, ²² Ban den cɔdi Juda buolu puolŋuani yaaba n yeni. Bi den tie jaba tuda piilele n tuda luoba n kobimu (76.500) ²³ Isakari buolu puolŋuani den tie bine:Lan cili Tola, ke o tie Tola cugli nni yaaba yaaja Pufa mo tie Pufa cugli nni yaaba yaaja, ²⁴ Yacubi mo tie Yacubi cugli nni yaaba yaaja, Cimirɔn mo tie Cimirɔn cugli nni yaaba yaaja, ²⁵ Ban den cɔdi Isakeaari buolu puolŋuani yaaba den tie, tuda piiluoba n tuda na n kobitaa (64.300) ²⁶ Sebulɔn buolu puolŋuani n ne: Seredi n tie Seredi cugli nni yaaba yaaja, Eloni n tie Eloni cugli nni yaaba yaaja, Yaleyeli n tie Yaleyeli cugli nni yaaba yaaja, ²⁷ Sebulɔn buolu nni, ban den cɔdi yaaba n yeni. Bi den tie jaba tuda piiluoban n kobimu (60.500) ²⁸ Josefi buolu puolŋuani den tie Manase yeni Efrayima. ²⁹ Manase puolŋuani den tie bine i: Maciiri den tie Maciiri cugli nni yaaba yaaja, (Maciiri den tie Gileyadi ya báa i), Gileyadi mo n den tie Gileyadi cugli nni yaaba yaaja. ³⁰ Gileyadi buolu puolŋuani tie bine i : Iyeseri n tie Iyeseri cugli nni yaaba yaaja, Heleki mo n tie Heleki cugli nni yaaba yaaja, ³¹ Asiriyeli mo n tie Asiriyeli cugli nni yaaba yaaja, Cecemi mo n den tie Cecemi cugli nni yaaba yaaja, ³² Cemida mo n den tie Cemida cugli nni yaaba yaaja, Heferi mo n den tie Heferi cugli nni yaaba yaaja. ³³ Heferi bijua, Selofehadi den ki pia bonjaga, ama, o den pia a bonpola wani. O bonpola yela den tie, Mahila, Nowa, Hogila, Milika, yeni Tirisa. ³⁴ Manase buolu nni, ban den cɔdi yaaba n yeni. Bi den tie, jaba tuda piimu n tuda lie n kobilele (52.700). ³⁵ Efrayima buolu puolŋuani den tie bine i: Cutela n de tie Cutela cugli nni yaaba yaaja, Beceri mo n den tie Beceri cugli nni yaaba yaaja, Tahani mo n den tie Tahani cugli nni yaaba yaaja. ³⁶ Cutela puolŋuani den tie: Erani den tie Erani cugli nni yaaba yaaja. ³⁷ Ban den cɔdi Efrayima buolu puolŋuani yaaba n yeni. Bi den tie jaba tuda piitaa n tuda lie n kobimu (32.500). Ban den Josefi buolu puolŋuani, yuakuli o cugli nni n yeni. ³⁸ Benjamina buolu puolŋuani den tie bine i: Bela den tie Bela cugli nni yaaba yaaja, Acibeli mo den tie Acibeli cugli nni yaaba yaaja, Ahirami mo n den tie Ahirami cugli nni yaaba yaaja, ³⁹ Cefufami n den tie Cefufami cugli nni yaaba yaaja, Hufami mo n den tie Hufami cugli nni yaaba yaaja, ⁴⁰ Bela bijaba den tie, Aridi, yeni Naamani Aridi n den tie Aridi cugli nni yaaba yaaja, Naamani mo n den tie Naamani cugli nni yaaba yaaja. ⁴¹ Ban den cɔdi Benjamina buolu puolŋuani yaaba n yeni, Bi den tie, jaba tuda piina n tuda mu n kobiluoba (45.600). ⁴² Daani buolu puolŋuani den tie bine i:Cuhami den tie Cuhami cugli nni yaaba yaaja, Bani n den tie Daani buolu yaaba puolkŋuani. ⁴³ Cuhami cugli nni yaaba ya jaba den tie tuda piiluoba n tuda na n kobina (64.400). ⁴⁴ Aseri buolu puolŋuani den tie bine i: Imina den tie Imina cugli nni yaaba yaaja, Icifi mo n den tie Icifi cugli nni yaaba yaaja,Beriya mo n den tie Beriya cugli nni yaaba yaaja, ⁴⁵ Beriya puolŋuani den tie bine i: Heberi den tie Heberi cugli nni yaaba yaaja,Maliciyeli mo n den tie Maliciyeli cugli nni yaaba yaaja. ⁴⁶ Aseri bisalo den tie Sera. ⁴⁷ Ban den cɔdi Aseri buolu puolŋuani, yaaba n yeni. Bi den tie jaba tuda piimu n tuda taa n kobina (53.400). ⁴⁸ Nafitali buolu puolŋuani den tie bine i: Yasiyeli n den tie Yasiyeli cugli nni yaaba yaaja, Guni mo n den tie Guni cugli nni yaaba yaaja, ⁴⁹ Yeseri n den tie Yeseri cugli nni yaaba yaaja, Cilema mo n den tie Cilema cugli nni yaaba yaaja. ⁵⁰ Ban den cɔdi Nafitali buolu puolŋuani yaaba n yeni, Bi den tie jaba tuda piina n tuda mu n kobina (45.400) ⁵¹ Ban den cɔdi Israyeli nitaanli kuli jaba ki la ya cɔli n ne, jaba tuda kobiluoba n tudyenli n kobilele n jaba piitaa (601.730) ⁵² O Diedo den maadi yeni Moyiisi, ki yedi, ⁵³ "Li buali ke ŋan bɔgdi mi diema tinfanma, ki teni buolu kuli yeni cugli kuli ya biinu n cɔlni bi nibima ń dɔa maama i. ⁵⁴ Ya buolu niba n yabi ki cie, bi biinu mo baa yabi, ya buolu n waa, ki cie, u biinu mo baa waa i. ŋan teni cugli kuli, lan ŋɔdi ban cɔdi ya jaba ń dɔa maama. ⁵⁵ Ama, li buali ke yin tɔa tiatia i, ki bɔgdi buolu kuli yeni u biinu Bi ji ba bɔgdi u buolu cuga siiga i bi biinu. ⁵⁶ Li buali ke ban bɔgdi ban tɔni tiatia ki baa ya tinfanma faali yeni, a cugciama yeni a cugbila siiga nni i." ⁵⁷ Ban den cɔdi Lefi buolu yaaba cugli cugli, ke li baa maama n ne: Gericɔni n den tie Gericɔni cugli nni yaaba yaaja, Kohati mo den tie Kohati cugli nni yaaba yaaja, Merari mo, Merari cugli nni yaaba yaaja. ⁵⁸ Lefi yaaba cuga n den ne: Lebini cugli nni yaaba, Hebrɔn cugli nni yaaba, Mahili cugli nni yaaba, Muci cugli nni yaaba, Korahi cugli nni yaaba. Kohati n den tie Amirami cugli yaaja. ⁵⁹ Amirami denpua yeli den tie Yokebedi, ke o tie Lefi bisalo, ban den mali opo yua Ejipti diema nni. Yokebedi n den mali Amirami po ya bila n tie Haarɔn, Moyiisi yeni bi ninsalo Miriyama. ⁶⁰ Bi den mali Haarɔn po, Nadabi, Abihu, Eleyasari yeni Itamari. ⁶¹ Nadabi yeni Abihu den kpe ban den kuani O Diedo nintuali mutianu, ke wuu tie li gbandieli nni mu. ⁶² Ban den cɔdi ya bonjala bi siiga den tie piilie n tuda taa (23.000), bikuli bonjala yaaba n pia ŋmaayendo bii ki cie yeni. Ama, bi den ki taani ba Israyeli yaaba siiga, kelima, bi den ki pia tinfanma biinu Israyeli yaaba faali nni. ⁶³ Moyiisi yeni salga yidkaciamo Eleyasari ń den cɔdi yaaba n yeni. Bi den cɔdi ba Mowabi tialu nni, Jurden kpenu kunu, ki tiegi Jeriko dogu. ⁶⁴ Ama, ban den cɔdi yaaba siiga nni, bá niyendo den ki ye, ke Moyiisi yeni salga yidkaciamo, Haarɔn den cɔdi o, ya cɔdli n den tieni Siinaayi fanpienma nni yeni. ⁶⁵ Kelima O Diedo den yedi, ke lanya niba kuli ba kpe mi fanpienma nni. Ja ji den ki sieni bi siiga nni, lan ñani, Jefune bijua Kalebi yeni Nuni bijua Josuwe.