¹ Israyeli yaaba den gedi ki kali Citimi dogu nni, ke bi jaba den cili mi conconma yeni Mowabi puoba. ² Kelima Mowabi yaaba den puogi ba, bi ya bua padi bi buli ya yognu. Lanwani ii, bi niba den ŋmani ti padnandi, ki gbaandi ki pugi bi buli. ³ Israyeli jaba den yuandi ki todi, ke bi pugi o bulo Pewori Baali. O Diedo pali den beni Israyeli yaaba po. ⁴ O Diedo den yedi Moyiisi, "ŋan kpa i buoli yudanba kuli, ki jɔni ba n nintuali, ban ya nua ba u yensiinu, lani n tie N pali ń guani ki sɔngi Israyeli yaaba po. ⁵ Lanwani ii, Moyiisi den yedi Israyeli yudanba, "Yuakuli ń kpa o buolu nni yua n todi ke bi pugi Pewori Baali." ⁶ Israyeli ja den cua, ki yegi yeni Madiani yaaba bisalo, ki kua o jongu nni. Li den tieni Moyiisi yeni Israyeli nitaanli nunbu nni i, ban den kaa ya yognu, ki buudi u kadkaanu gbandieli bulñɔbu kani. ⁷ Haarɔn yaabili, Eleyasari bijua, Finehasi ń den la lanya bonli, o den fii li nitaanli siiga, ki taa li kpaanli, ki mubni o nuu nni. ⁸ O den ŋɔdi Israyeli ja, o jongu nni, ki ban muu o ja yeni o pua puantinmu, ke bi kpe. Lanwani ii, O Diedo ń den sɔni ya yianbiadpuodkou yeni den sedi. ⁹ Yaaba n den kpe li yianbiadpuodkou po den pundi niba piilie n tuda na. ¹⁰ O Diedo den maadi yeni Moyiisi, ki yedi, ¹¹ Haarɔn yaabili, Eleyasari bijua, Finehasi, salga yidkaciamo cedi ke n pabienli kagdi Israyeli yaaba po, kelima o ye bi siiga, ki pia min pia ya nunponli bipo. Lanyapo i, ke n ninponli pabiencianli ki bolini Israyeli yaaba. ¹² Lanyapo, ŋan yedine, 'O Diedo yedi, "Diidi, N loli mi yanduanma ŋantaadi yeni Finehasi. ¹³ Wani yeni o puolŋuani, li baa tie salga yidma tuona ya ŋantaado, hali yeni ya yognu kuli, kelima o sɔni li papientuonli Mini, o Tienu po. O mia sugli Israyeli nitaanli kuli po."" ¹⁴ Wan den kpaa Israyeli ja yua yeni Madiani pua yeni den yi Simiri, ke o báa tie Salu, ki tie Simeyɔn buolu nni, cuga siiga, cugyenli yudaano. ¹⁵ Ban den kpaa ya Madiani pua yeni mo den yi Cosibi, ke o báa tie Suri, ki mo tie Madiani nibuolu cugli nni yudaano. ¹⁶ Lanwani ii, O Diedo den maadi yeni Moyiisi, ki yedi, ¹⁷ Yin cedi Madiani yaaba ń tua i yibala, yin tuogi ba yeni bu tɔbu. ¹⁸ Kelima, bi den taa yi ki tieni bi yibalinba i, ki kuani yi i janbi nni, ke i tudi u sani ki tieni ti tuobiadi Pewori maama nni yeni bi ninsalo Cosibi, Madiani yudaano bisalo, ban den kpaa yua, u yianbiadpuodkou daali yeni, kelima Pewori conconma po yeni."