¹ Israyeli yaaba den kubi bi cenli, ki ban pundi Mowabi yaaba diema nni, ki kpaa bi jondi Jurden kpenjaali puoli, ki tieli Jeriko dociamu. ² Sipori bijua, Balaka den la Israyeli yaaba ń den tieni Amori yaaba maama. ³ Mowabi yaaba den jie Israyeli yaaba boncianla, kelima bi den yabi boncianla, ke Mowabi yaaba gbanu den wudi Israyeli yaaba nintuali. ⁴ Mowabi bado den yedi Madiani nikpelba, "U naa niwulgu ba bolini yaali n lindi ti kuli, nani i nee ń ŋmani i kuani nni muadi maama yeni i." Lanyognu, Sipori bijua, Balaka n den tie Mowabi diema bado. ⁵ O den sɔni a tonda Bewori bijua Balaama, yua n kua Petori, Efrati kpenjaali po, o nibuolu yeni o nitanli siiga. O den yedi o ya maama ne, " Diidi, Nibuolu bá ñani Ejipti diema nni, ki cua ki wuli ki gbie i kaanikuli, kaa fagiyeni n diema, hali ki kaa n miali nni. ⁶ N mia ŋa, ke ŋan cua ki soli ba npo, kelima bi pia u paalu boncianla ki cie nni. Li ki kandi min fidi ki tuogi ba, ki pua ki deli ki ñani ba li diema nni. N bani ke ŋan yadi mi yediŋanma yua ya po, o baa ye yeni mi yediŋanma, ŋan soli yua mo, baa ye yeni ti solindi i." ⁷ Lanwani ii, Mowabi nikpelba yeni Madiani nikpelba den fii, ki tugi bu paabu mi lingma po. Bi den pundi Balaama kani, ki caa o Balaka tondu. ⁸ Balaama den yedi ba, "Yin duani ne. Saala, n ba waani yi O Diedo ń yedi yaali." Lanani ii, Mowabi nikpelba den duani Balaama denpo i, li ñiagu. ⁹ U Tienu den dɔgdi Balaama po, ki yedi o, "Ya jaba n cani a yeni, tie bile i?" ¹⁰ Balaama den jiini U Tienu, "Sipori bijua, Balaka, Mowabi yaaba bado n sɔni ba n kani. O yedi, ¹¹ 'Diidi, ya nibuolu n ñani Ejipti diema nni yeni cua ki wuli ki gaani n diema nni. N mia ke ŋan cua ki soli ba npo. Li ki kandi min fidi ki tuogi ba, ki pua ki deli ki ñani ba mi diama nni.'" ¹² U Tienu den jiini Balaama, ki yedi o, "ŋan da yegi yeni li niba ki gedi. Li ki buali ke ŋan soli Israyeli nitaanli, kelima, Mini O Diedo yadi mi yediŋanma bipo o." ¹³ Balaama den yagdi ki fii, ki yedi Balaka nikpelba, "Yin guani ki kuni i diema nni, kelima O Diedo yie, ke waa cabi nni u sanu, ke min yegi yeni yi." ¹⁴ Lanwani ii, Mowabi nikpelba den guani ki kuni Balaka kani, ki yedi o, "Balaama yie ke o kan yegi yeni ti, ki cua a kani." ¹⁵ Balaka den sɔni nikpetianba yaaba n yabi, ki go pia li fangli ki cie kpiama ya tonda. ¹⁶ Bi den pundi Balaama kani, ki yedi o, "Sipori bijua, Balaka, yedi ke tin waani a ya maama ne, 'N mia ŋa, ke ŋan da cedi bonliba kuli ń pani a, ke a kan pundi n kani, ¹⁷ Kelima, n ba pa ŋa lan buali maama, ki go pugni a ti kpiagdi. N ba tieni ŋan buali nni ke min tieni yaali kuli. N mia ŋa sugli ke ŋan cua ki soli ya nibuolu ne npo.'" ¹⁸ Balaama den jiini Balaka tonda, ki yedi ba, "Bá Balaka ya teni nni o badidiegu, ke ku gbie yeni ŋanjilfa yeni wula, n kan fidi ki kandi O Diedo n Tienu ñɔbonli po ki tieni bontɔli, lan yabi, bii, lan waa. ¹⁹ Yin duani dinne, min buali ki bandi O Diedo ń ba waani nni yaali, ki pugni." ²⁰ U Tienu den dɔgdi Balaama po ku ñiagu nni, ki yedi o, "Nani bi jaba ne ń cua ki yini a yeni, ŋan fii, ki yegi yeni ba. Ama, ŋan ya bani ke a baan tieni min ba waani a ke ŋan tieni yaali i." ²¹ Balaama den yagdi ki fii, ki bobni o ŋunñua, li ŋungaali, ki yegi yeni Mowabi yudanba ki gedi. Maleki yie Balaama po ²² Ama, wan den caa yeni, li den fiindi U Tienu pabienli. O Diedo Maleki den sedi ki pani u sanu, ki bua yie Balaama po. Balaama den jagi o ŋunñua, ki yegi yeni o naacenba, bilie. ²³ O ŋunbo den la O Diedo maleki ke o see u sanu nni, ki nɔdi ki jugsiega ki muubi o nuu nni. Ke o ŋunbo jadi, ki ŋa u sanu, ki kua u kuanu nni. Balaama den pua o ŋunbo, ke wan guani ki tɔgni u sanu. ²⁴ O Diedo maleki go den sedi ki pani ki sanbulga, ku daamɔngu tiidi kuanu nni, naani ke guonli ye u ganu po, ke guontɔli ye u jienu po. ²⁵ O ŋunbo den la O Diedo maleki, ki pɔni, ki gedi ki tabni Balaama taali yeni li guonli. Balaama go den pua o, mi liema. ²⁶ O Diedo maleki go den suagi liiga, ki go jia, ki pani u sanu, naani ke pegdikaanu ki ye ganu ki buali jienu. ²⁷ O ŋunbo den la O Diedo maleki, ki baa ki labni, ke Balaama jagi o. Balaama pali den beni, ke o pua o ŋunbo yeni o gbiamu. ²⁸ O Diedo den yaadi o ŋunbo ñɔbu, ke o maadi yeni Balaama, ki yedi, "N tieni a be i, ke a pua nni taalma taa n yeni?" ²⁹ Balaama den jiini o ŋunbo, ki yedi, "N pua ŋa, kelima ŋaa tie npo min bua maama. Li ya bi tie ke n pia jugsiega i, se ke n bi muu ki kpa ŋa." ³⁰ O ŋunbo den yedi Balaama, "Mini ka tie a ŋunbo, ŋan jagi ya ŋunbo a miali dana kuli, ki ban tuoni dinne ee? Li tie npo maanli i, ke n tiendi min tieni a yaali dinne ne ee? Balaama den yedi, "N-n" ³¹ Lanwani ii, O Diedo den luodi Balaama nuni, ke o la ke O Diedo maleki see, ki nɔdi ki jugsiega ki muubi o nuu nni. Balaama den tibni o yuli, ki baa, ki labni. ³² O Diedo maleki den yedi o, "Li tieni ledi i, ke a pua a ŋunbo taalma taa kuli? Diidi, N tie yua n cua ki ba yie apo i, kelima, ŋan ŋua ya sanu ne ki pia mayuli, tingbali ya sanu i. ³³ O ŋunbo bi laadi mini i, ki kpibni u sanu lani taalma taa ne kuli. O ya bi ki kpibi u sanu, ki ŋa nni, n bi ba kpa ŋa i, ki ŋa o ŋunbo yeni o miali." ³⁴ Balaama den yedi O Diedo maleki, "N tieni ti tuonbiadi. N bi ki bani ke a sedi ki jia u sanu, ki ba yie npo. Lanwani ii, li ya tie ke li cenli ne ki mani apo, n ba guani ki lebdi." ³⁵ Ama O Diedo maleki den yedi Balaama, "Tugni a cenli yeni bi jaba ne. Ama, a ba maadi min ba waani a ya maama, ke ŋan maadi i." Lanwani ii, Balaama den yegi yeni Balaka nikpelba, ki gedi. ³⁶ Balaka ń gbadi ke Balaama cua, o den ñani ki tuogi o, Mowabi dociamu yu n ye mi diema bianu, Arinoni kpenjaali po yeni nni i. ³⁷ Balaka den yedi Balaama, "N ki sɔni u tondu ki yini a aa? Li tieni ledi i, ke ŋaa cua? Mii pia ya fidu n ba jigni a aa?" ³⁸ Balaama den guani ki jiini Balaka, "Diidi, N ji cua a kani n yeni. N nan pia ya fidu n ba yedi bonliba yo oo? N li ba yedi O Diedo ń tieni ya maama n ñɔbu nni i." ³⁹ Balaama den yegi yeni Balaka, ke bi gedi Kiriyati Husoti dogu nni. ⁴⁰ Balaka den padi a naatona yeni a patona, ki ñani ti padnandi, ki teni Balaama yeni ya yudanba n den ciani o. ⁴¹ Lan fiifaa, Balaka den taa Balaama, ke bi doni li juacianli yuli po, o bulo Baali kani. Li kani, Balaama den nua Israyeli jondi kuni po ya niba.